బాల‌య్య సినిమాకు మారుతున్న ఓటీటీ లెక్క‌లు

నందమూరి బాలకృష్ణ సినిమాలంటే ఒకప్పుడు ప్రధానంగా థియేట్రికల్ మార్కెట్‌ గురించే డిస్క‌ష‌న్ జరిగేది. ముఖ్యంగా మాస్ ఆడియన్స్‌ను టార్గెట్ చేసే సినిమాలకు బాక్సాఫీస్ కలెక్షన్లే కీలకంగా కనిపించేవి. అయితే ఇప్పుడు పరిస్థితి క్రమంగా మారుతున్నట్టుగా కనిపిస్తోంది. థియేటర్లలో బాలయ్యకు ఉన్న మార్కెట్‌తో పాటు, సినిమా రిలీజ్ కు ముందే నాన్-థియేట్రికల్ రైట్స్ ద్వారా వచ్చే ఆదాయం కూడా నిర్మాతల లెక్కల్లో కీలకంగా మారుతోంది. ప్రస్తుతం గోపీచంద్ మలినేని దర్శకత్వంలో తెరకెక్కుతున్న దాదా విషయంలో కనిపిస్తున్న బిజినెస్ ఇంట్రెస్ట్ ఇదే మారుతున్న ట్రెండ్‌కు ఎగ్జాంపుల్ గా నిలుస్తోంది.

దాదా డిజిటల్, శాటిలైట్, ఆడియో రైట్స్ కలిపి భారీ మొత్తానికి క్లోజ్ అయినట్లు వస్తున్న వార్తలు కేవలం ఒక సినిమా బిజినెస్ నంబర్‌గా చూడాల్సిన విషయం కాదనే అభిప్రాయం ఇండస్ట్రీ వర్గాల్లో వ్యక్తమవుతోంది. స్టార్ హీరోల సినిమాలకు ఓటీటీ, శాటిలైట్, మ్యూజిక్ రైట్స్ ముందుగానే మంచి మొత్తాన్ని తీసుకురావడంతో థియేట్రికల్ మార్కెట్‌పై ఉండే మొత్తం రికవరీ ప్రెజ‌ర్ కొంతవరకు తగ్గే అవకాశం ఉంటుంది. అయితే ఒక సినిమా లాభాల్లోకి వెళ్లిందని చెప్పాలంటే బ‌డ్జెట్, థియేట్రికల్ రైట్స్ వాల్యూ, ఇతర ఖర్చులు వంటి పూర్తి లెక్కలు కూడా లెక్క‌లోకి తీసుకోవాల్సిందే.

ఇక్కడ మ‌రో ఇంట్రెస్టింగ్ విషయం మాస్ సినిమాలకు నాన్ థియేట్రికల్ మార్కెట్‌లో ఏర్పడుతున్న డిమాండ్. స్టార్ హీరోల సినిమాలకు థియేటర్లలో మాత్రమే కాకుండా టెలివిజన్, ఓటీటీ ప్లాట్‌ఫామ్‌లలోనూ స్పెష‌ల్ ఆడియ‌న్స్ ఉండటంతో ఈ రైట్స్ కు స్పెష‌ల్ వాల్యూ ఏర్పడుతోంది. ముఖ్యంగా యాక్షన్, మాస్ ఎంటర్‌టైనర్‌లకు రిపీట్ వ్యూయింగ్, ఫ్యామిలీ ఆడియన్స్ రీచ్ వంటి అంశాలు శాటిలైట్, డిజిటల్ బిజినెస్‌లో కీలకంగా మారుతున్నాయి. దీంతో నిర్మాతలు ఇప్పుడు సినిమా బడ్జెట్‌ను మాత్రమే కాకుండా థియేట్రికల్, నాన్-థియేట్రికల్ ఆదాయాలను కలిపి ప్రాజెక్ట్ రికవరీని లెక్కించే పరిస్థితి కనిపిస్తోంది.

ఈ నేపథ్యంలో దాదా మరో ప్రశ్నను కూడా ముందుకు తీసుకొస్తోంది. బాలయ్య సినిమాల ఓటీటీ లెక్కలు మారుతున్నాయా? గతంలో బాలయ్య సినిమాల మార్కెట్‌ను ప్రధానంగా థియేట్రికల్ కలెక్షన్లతో అంచనా వేసే పరిస్థితి ఉంటే, ఇప్పుడు నాన్-థియేట్రికల్ రైట్స్ కూడా ఆ మార్కెట్‌లో ఒక ముఖ్యమైన కొలమానంగా మారుతున్నాయి. దాదాకు సంబంధించిన తాజా బిజినెస్ ఇంట్రెస్ట్ ను క‌లిగించ‌గా, ఫ్యూచ‌ర్ లో బాలయ్య సినిమాల బిజినెస్ ప్లానింగ్‌లో ఓటీటీ, శాటిలైట్, ఆడియో రైట్స్ కు మరింత ప్రాధాన్యం దక్కే అవకాశముంది. అంటే బాలయ్య సినిమా బిజినెస్ ఇక థియేటర్ల దగ్గర మొదలై అక్కడే ముగిసే లెక్క కాకుండా.. రిలీజ్‌కు ముందే పలు దశల్లో రికవరీని నిర్మించుకునే మోడల్‌గా మారుతున్నట్టుగా కనిపిస్తోంది.