చైల్డ్ ఆర్టిస్ట్ నుండి నిర్మాత ,హీరో వరకూ.. అల్లు శిరీష్ సినీ ప్రయాణం!

మెగా కాంపౌండ్ నుండి వచ్చిన అల్లు శిరీష్ మనందరికీ హీరోగానే తెలుసు. కానీ, ఆయన సినీ ప్రయాణం అంతకంటే ముందే ఎంతో ఆసక్తికరంగా మొదలైంది. మూడేళ్ల ప్రాయంలోనే బాలనటుడిగా కెమెరా ముందుకు వచ్చిన శిరీష్, కాలేజీ రోజుల్లోనే బాలీవుడ్ ఆల్ టైమ్ ఇండస్ట్రీ హిట్ మూవీ కి కో-ప్రొడ్యూసర్‌గా వ్యవహరించి అందరినీ ఆశ్చర్యపరిచారు. ఆ సినిమా ఏది ? చైల్డ్ ఆర్టిస్ట్ నుండి నిర్మాతగా, ఆపై హీరోగా మారిన శిరీష్ అరుదైన సినీ ప్రయాణం గురించి ఇప్పుడు తెలుసుకుందాం..

బాలనటుడిగా ఎంట్రీ.. అమీర్ ఖాన్ 'గజిని' వెనుక మాస్టర్ మైండ్:

అల్లు శిరీష్ కేవలం అల్లు అర్జున్ తమ్ముడిగానే కాకుండా, తనకంటూ ఒక ప్రత్యేక గుర్తింపును సంపాదించుకున్నారు. ఆయన కేవలం మూడేళ్ల వయసులో చిరంజీవి హీరోగా నటించిన హిందీ చిత్రం 'ప్రతిబంధ్'లో బాలనటుడిగా మెరిశారు. అయితే, అసలు ట్విస్ట్ ఏంటంటే.. శిరీష్ హీరో కాకముందే బాలీవుడ్ హిస్టరీలో భాగమయ్యారు. 2008లో అమీర్ ఖాన్ నటించిన 'గజిని' సినిమా ఎంతటి సంచలనం సృష్టించిందో మనందరికీ తెలిసిందే. ఆ సమయంలో కాలేజీ ఫైనల్ ఇయర్ చదువుతున్న శిరీష్, తన తండ్రి అల్లు అరవింద్‌తో కలిసి ఈ భారీ ప్రాజెక్ట్‌కు కో-ప్రొడ్యూసర్‌గా పనిచేశారు. తన అభిమాన హీరో అమీర్ ఖాన్ సినిమాతోనే నిర్మాతగా కెరీర్ స్టార్ట్ చేయడం శిరీష్ జీవితంలో ఒక మర్చిపోలేని మలుపు.

100 కోట్ల క్లబ్‌కు పునాది:

ఇటీవల ఓ ఇంటర్వ్యూలో పాల్గొన్న శిరీష్, తన కెరీర్‌లోని ఈ ఆసక్తికరమైన విషయాలను పంచుకున్నారు. "నేను చిన్నప్పటి నుండి అమీర్ ఖాన్ కి వీరాభిమానిని. ఆయనతో కలిసి పనిచేయాలనే నా కల ఇంత త్వరగా నిజమవుతుందని అస్సలు ఊహించలేదు" అని చెప్పుకొచ్చారు. అల్లు అరవింద్ దాదాపు 15 ఏళ్ల గ్యాప్ తర్వాత బాలీవుడ్‌లోకి రీ-ఎంట్రీ ఇచ్చిన సినిమా 'గజిని'. ఇండియన్ బాక్సాఫీస్ వద్ద 100 కోట్ల నెట్ కలెక్షన్స్ సాధించిన తొలి హిందీ చిత్రంగా గజిని సరికొత్త చరిత్ర సృష్టించింది. ఈ హిస్టారిక్ హిట్ వెనుక శిరీష్ కృషి కూడా ఉందన్న విషయం చాలా తక్కువ మందికి తెలుసు. ఈ సినిమాతోనే బాలీవుడ్‌లో సక్సెస్‌కు కొత్త లెక్కలు మొదలయ్యాయి.

హీరోగా ప్రయాణం:

నిర్మాతగా అంతటి భారీ విజయాన్ని అందుకున్న తర్వాత, 2013లో 'గౌరవం' సినిమాతో శిరీష్ వెండితెరకు హీరోగా పరిచయమయ్యారు. ఆ తర్వాత 'శ్రీరస్తు శుభమస్తు', 'ఒక్క క్షణం' వంటి వైవిధ్యమైన చిత్రాలతో తనకంటూ ఒక గుర్తింపు తెచ్చుకున్నారు. ఇక ప్రస్తుతం సినిమాలకు కొంత విరామం ఇచ్చినా, సోషల్ మీడియాలో మాత్రం అల్లు శిరీష్ చాలా యాక్టివ్‌గా ఉంటున్నారు. తన పర్సనల్ లైఫ్ విశేషాలను, కొత్త ఫోటో షూట్స్‌ను ఎప్పటికప్పుడు ఫ్యాన్స్‌తో పంచుకుంటున్నారు. చైల్డ్ ఆర్టిస్ట్‌గా మొదలై, నిర్మాతగా రికార్డులు క్రియేట్ చేసి, హీరోగా ఎదిగిన శిరీష్ జర్నీ నిజంగా స్ఫూర్తిదాయకం. త్వరలోనే ఆయన నుండి మరో ఆసక్తికరమైన ప్రాజెక్ట్ వస్తుందని ఫ్యాన్స్ ఆశిస్తున్నారు.