అల్లు కుటుంబం త‌ర‌పున చిత్ర‌ప‌రిశ్ర‌మ‌కు చిన్న‌ కానుక‌

హైదరాబాద్‌లోని కోకాపేటలో అత్యంత ప్రతిష్టాత్మకంగా నిర్మించిన `అల్లు సినిమాస్` (AAA సినిమాస్) ప్రారంభోత్సవ వేడుకలో అల్లు అర్జున్ సోద‌రులు చేసిన ప్రసంగం అందరినీ ఆకట్టుకుంది. వేదికపై ఉన్న ముఖ్యమంత్రి రేవంత్ రెడ్డి .. ఇతర విశిష్ట అతిథులకు తన హృదయపూర్వక నమస్కారాలు తెలియజేస్తూ శిరీష్ త‌న ప్రసంగాన్ని ప్రారంభించారు. ఈ శుభ సందర్భానికి ముఖ్యమంత్రి స్వయంగా విచ్చేయడం పట్ల ఆయన కృతజ్ఞతలు తెలుపుతూ, సినీ పరిశ్రమపై ప్రభుత్వం చూపిస్తున్న ఆదరణ , ప్రోత్సాహాన్ని ప్రత్యేకంగా కొనియాడారు.

హైదరాబాద్ నగరం గ్లోబల్ మ్యాప్‌లో ఒక సరికొత్త ఎంటర్‌టైన్మెంట్ హబ్‌గా ఎదుగుతోందని, ఆ బ్రాండ్ ఇమేజ్‌ను మరింత పెంచడంలో తమ వంతు సహకారం అందించాలనే లక్ష్యంతోనే ఈ మల్టీప్లెక్స్‌ను నిర్మించినట్లు అల్లు శిరీష్‌ తెలిపారు. ముఖ్యమంత్రి రేవంత్ రెడ్డి అభివృద్ధి దార్శనికతకు అనుగుణంగా, అంతర్జాతీయ ప్రమాణాలతో కూడిన మౌలిక సదుపాయాలను ఇక్కడ కల్పించామని పేర్కొన్నారు. ఈ ప్రాజెక్ట్ ద్వారా హైదరాబాద్ నగర కీర్తి ప్రతిష్టలు ప్రపంచవ్యాప్తంగా మరింత విస్తరిస్తాయని ఆయన ఆశాభావం వ్యక్తం చేశారు.

సాంకేతికతకు పెద్దపీట వేస్తూ నిర్మించిన ఈ మల్టీప్లెక్స్‌లో ప్రేక్షకులకు అద్భుతమైన అనుభూతిని అందించడమే తమ ప్రధాన ధ్యేయమని వివరించారు. ముఖ్యంగా ఇక్కడ ఏర్పాటు చేసిన అంతర్జాతీయ స్థాయి డాల్బీ సౌండ్ సిస్టమ్ గురించి ప్రస్తావిస్తూ.. ఇది సినిమా వీక్షణలో ప్రేక్షకులకు ఒక కొత్త లోకాన్ని పరిచయం చేస్తుందని ధీమా వ్యక్తం చేశారు. తమ తండ్రి అల్లు అరవింద్ ఎప్పుడూ కొత్తదనాన్ని ఆహ్వానిస్తారని.. ఆయన మార్గదర్శకత్వంలోనే ప్రతి అంగుళాన్ని ఎంతో శ్రద్ధతో తీర్చిదిద్దామని ఆయన వెల్లడించారు.

తమ కుటుంబం గత కొన్ని దశాబ్దాలుగా సినీ పరిశ్రమలోనే కొనసాగుతూ.., కళాకారుల పట్ల .. ప్రేక్షకుల పట్ల ఎంతో గౌరవంతో ఉందని గుర్తుచేశారు. ఈ క్రమంలో `అల్లు సినిమాస్` అనేది తమ కుటుంబం తరపున చిత్ర పరిశ్రమకు .. అభిమానులకు ఇచ్చే ఒక చిన్న బహుమతి అని ఆయన భావోద్వేగంతో మాట్లాడారు. కేవలం వినోదం మాత్రమే కాకుండా.. ఈ మల్టీప్లెక్స్ ఏర్పాటు వల్ల ప్రత్యక్షంగా, పరోక్షంగా ఎంతోమంది యువతకు ఉపాధి అవకాశాలు లభిస్తాయని ఆయన ఈ సందర్భంగా గుర్తుచేశారు.

చివరగా.. ముఖ్యమంత్రి రేవంత్ రెడ్డి సమర్థవంతమైన పాలనలో తెలంగాణ స‌హా హైదరాబాద్ నగరం అద్భుతమైన అభివృద్ధి పథంలో దూసుకుపోతున్నాయని ప్రశంసించారు. ప్రభుత్వ మద్దతుతో భవిష్యత్తులో మరిన్ని వినూత్న ప్రాజెక్టులతో ముందుకు వస్తామని ఆయన స్పష్టం చేశారు. ఈ ప్రారంభోత్సవ వేడుకను విజయవంతం చేసిన అతిథులకు, అభిమానులకు.. ప్రతి ఒక్కరికీ ధన్యవాదాలు తెలియజేస్తూ తన ప్రసంగాన్ని ముగించారు.