బన్నీ లైనప్.. ఏం జరుగుతోంది?

అల్లు అర్జున్ ప్రస్తుతం అట్లీ దర్శకత్వంలో 'రాకా' సినిమా పనుల్లో ఫుల్ బిజీగా ఉన్నాడు. ఈ ప్రాజెక్ట్ స్పాన్ చాలా పెద్దది. కేవలం తెలుగు వరకే పరిమితం కాకుండా పాన్ వరల్డ్ రేంజ్ లో దీన్ని భారీగా ప్లాన్ చేస్తున్నారు. ఇంతటి భారీ ప్రాజెక్ట్ సెట్స్ పై ఉన్నప్పుడు ఏ స్టార్ హీరోకైనా తన నెక్స్ట్ స్క్రిప్ట్స్ విషయంలో చాలా జాగ్రత్తలు అవసరం. దానికి తగినట్లే బన్నీ తన తదుపరి కథల ఎంపికలో ఆచితూచి అడుగులు వేస్తున్నాడు.

అయితే ఆయన నెక్స్ట్ ప్రాజెక్ట్ పై ఇప్పుడు సోషల్ మీడియాలో రకరకాల రూమర్స్ గట్టిగానే పుట్టుకొస్తున్నాయి. ముఖ్యంగా కోలీవుడ్ డైరెక్టర్ లోకేష్ కనగరాజ్ సినిమా గురించి రోజూ ఏదో ఒక గాసిప్ వినిపిస్తోంది. ఏ పాన్ ఇండియా సినిమాకైనా సెట్స్ పైకి వెళ్లే ముందు స్క్రిప్ట్ పరంగా రెగ్యులర్ గా చర్చలు జరగడం చాలా కామన్. కానీ ఈ డిస్కషన్స్ ను పట్టుకుని ప్రాజెక్ట్ క్యాన్సిల్ అవుతున్నట్లు బయట ప్రచారం జరుగుతుండటం ఆశ్చర్యం కలిగిస్తోంది.

ఇక్కడ అసలు ట్విస్ట్ ఏంటంటే.. సందీప్ రెడ్డి వంగా ప్రాజెక్ట్ ఊసే ఎక్కడా వినిపించడం లేదు. గతంలో అఫీషియల్ గా వంగాతో ఒక భారీ యాక్షన్ ఫిల్మ్ ఉంటుందని అప్డేట్ ఇచ్చారు. కానీ ఆ తర్వాత దాని గురించి ఒక్క అప్డేట్ కూడా లేదు. అసలు నెక్స్ట్ వంగాను లైన్ లో పెట్టకుండా బన్నీ సడెన్ గా లోకేష్ కనగరాజ్ ను ఎందుకు ముందుకు తెచ్చాడు అనేదే ఇప్పుడు అందరినీ తొలిచేస్తున్న అసలు సస్పెన్స్.

దీని వెనుక డైరెక్టర్ల కమిట్మెంట్స్ సమస్య ప్రధానంగా ఉండి ఉండొచ్చనే టాక్ ఇండస్ట్రీలో గట్టిగా నడుస్తోంది. యానిమల్ సెన్సేషనల్ సక్సెస్ తర్వాత వంగా వెంటనే ప్రభాస్ స్పిరిట్ వర్క్ స్టార్ట్ చేశాడు. ఆ సినిమా పూర్తయ్యాక మహేష్ బాబుతో ప్రాజెక్ట్ ఉంటుందని వార్తలు వస్తున్నాయి. ఈ లాంగ్ గ్యాప్ వల్లే బన్నీ తన లైనప్ లో మార్పులు చేసి, లోకేష్ ట్రాక్ ను ముందుకు తీసుకొచ్చి ఉంటాడని టాక్ కూడా ఉంది.

ఇప్పుడున్న ట్రెండ్ లో సినిమా బడ్జెట్ వందల కోట్లు దాటుతున్నప్పుడు హీరోలు ప్రతి చిన్న లాజిక్ ను చెక్ చేసుకోవడం కచ్చితంగా అవసరమే. లోకేష్ మార్క్ యాక్షన్ కు, బన్నీకున్న మాస్ ఇమేజ్ కు కరెక్ట్ బ్యాలెన్స్ కుదిరేలా పేపర్ మీదే అంతా సెట్ చేసుకుంటున్నారు. ఆ ప్రాసెస్ లోనే చర్చలు జరుగుతున్నాయి తప్ప, ఈ సినిమా ఆగిపోతుందనే ప్రచారంలో ఎలాంటి లాజిక్ కనిపించడం లేదు.

కానీ బన్నీ సైడ్ నుంచి ఆయన లైనప్ పై ఎలాంటి అఫీషియల్ క్లారిటీ రాకపోవడంతో ఫ్యాన్స్ లో కన్ఫ్యూజన్ కనిపిస్తోంది. ఏది నిజమో ఏది రూమరో తెలియక వాళ్ళు కూడా సోషల్ మీడియాలో బాగా కన్ఫ్యూజ్ అవుతున్నారు. అట్లీ రాకా షూటింగ్ ఒక కొలిక్కి వచ్చే వరకు బహుశా ఈ లైనప్ సస్పెన్స్ ఇలాగే కంటిన్యూ అయ్యే ఛాన్స్ ఉంది. మరి ఈ రూమర్స్ కు మేకర్స్ ఎప్పుడు ఎండ్ కార్డ్ వేస్తారో చూడాలి.