‘రేసుగుర్రం’ రీరిలీజ్ హంగామా.. థియేటర్ల వద్ద గుర్రాల సందడి!

ఐకాన్ స్టార్ అల్లు అర్జున్ బర్త్ డే అంటే సెలబ్రేషన్స్ మామూలుగా ఉండవు. సరిగ్గా 12 ఏళ్ల క్రితం బాక్సాఫీస్‌ను షేక్ చేసిన 'రేసుగుర్రం' సినిమా, బన్నీ పుట్టినరోజు సందర్భంగా మళ్ళీ థియేటర్లలోకి వచ్చి రచ్చ చేస్తోంది. 4K వెర్షన్‌లో విడుదలైన ఈ మూవీని చూసేందుకు ఫ్యాన్స్ ఎగబడుతున్నారు. థియేటర్ల ముందు గుర్రాలతో సందడి చేస్తూ, పేపర్ల వర్షం కురిపిస్తూ అభిమానులు చేస్తున్న హంగామా ఇప్పుడు సోషల్ మీడియాలో వైరల్ అవుతోంది. బన్నీ క్రేజ్ అంటే ఇదీ అని మరోసారి నిరూపితమైంది. ఆ వివరాలు ఇలా వున్నాయి..

థియేటర్ల వద్ద గుర్రాల రచ్చ:

అల్లు అర్జున్ పుట్టినరోజు (ఏప్రిల్ 8) సందర్భంగా 'రేసుగుర్రం' సినిమాను రెండు తెలుగు రాష్ట్రాల్లో భారీగా రీరిలీజ్ చేశారు. హైదరాబాద్‌లోని సంధ్య, శ్రీరాములు వంటి ఫేమస్ థియేటర్ల వద్ద ఫ్యాన్స్ చేసిన హంగామా అంతా ఇంతా కాదు. సినిమాలో బన్నీ ఇంట్రడక్షన్ సీన్‌ను గుర్తు చేస్తూ ఏకంగా గుర్రాలను థియేటర్ల ముందుకు తీసుకొచ్చారు. డీజే పాటలు, డాన్సులు, బాణసంచా కాల్పులతో థియేటర్ల వద్ద పండుగ వాతావరణం నెలకొంది. తమ అభిమాన హీరో సినిమాను మళ్ళీ వెండితెరపై చూస్తూ ఫ్యాన్స్ పూనకాలతో ఊగిపోతున్నారు.

బ్లాక్ బస్టర్ మేజిక్ రిపీట్:

సురేందర్ రెడ్డి దర్శకత్వంలో వచ్చిన 'రేసుగుర్రం' అప్పట్లో ఒక ట్రెండ్ సెట్టర్. శృతిహాసన్ హీరోయిన్‌గా నటించిన ఈ సినిమాలో బ్రాహ్మీ 'కిల్ బిల్ పాండే' క్యారెక్టర్ ఇప్పటికీ ఎవర్ గ్రీన్. థమన్ అందించిన మ్యూజిక్ ఈ సినిమాకు పెద్ద ప్లస్ పాయింట్. రీరిలీజ్‌లో కూడా అదే జోష్ కనిపిస్తోంది. ఇప్పటికే టాలీవుడ్‌లో రీరిలీజ్ ట్రెండ్ నడుస్తున్నా, బన్నీ సినిమాకు వచ్చిన రెస్పాన్స్ చూస్తుంటే ఐకాన్ స్టార్ మాస్ స్టామినా ఏంటో అర్థమవుతోంది. పాత జ్ఞాపకాలను నెమరువేసుకుంటూ కుర్రకారు థియేటర్లలో పేపర్లు చల్లుతూ ఎంజాయ్ చేస్తున్నారు.

అట్లీ మూవీ 'రాకా' సెన్సేషన్:

ఒకవైపు పాత సినిమా రీరిలీజ్ అవుతుంటే, మరోవైపు బన్నీ కొత్త సినిమా అప్డేట్స్ ఫ్యాన్స్‌ను ఊపేస్తున్నాయి. కోలీవుడ్ డైరెక్టర్ అట్లీ దర్శకత్వంలో బన్నీ చేస్తున్న భారీ ప్రాజెక్ట్ షూటింగ్ ఇప్పటికే 70 శాతం పూర్తయింది. బర్త్ డే గిఫ్ట్‌గా ఈ మూవీ టైటిల్ 'రాకా' అని ప్రకటించడంతో అభిమానుల ఆనందానికి అవధులు లేవు. చాలా సీక్రెట్‌గా షూటింగ్ జరుపుకుంటున్న ఈ సినిమాపై అంచనాలు భారీగా ఉన్నాయి. అట్లీ మార్క్ యాక్షన్, బన్నీ స్టైల్ తోడైతే బాక్సాఫీస్ దగ్గర రికార్డులు తిరగరాయడం ఖాయమని అందరూ నమ్ముతున్నారు.

కేవలం అట్లీతోనే కాదు, సెన్సేషనల్ డైరెక్టర్ లోకేష్ కనగరాజ్‌తో కూడా అల్లు అర్జున్ సినిమా చేయబోతున్నట్లు ఇప్పటికే ప్రకటించారు. లోకేష్ సినిమా అంటే ఖచ్చితంగా అది ఒక యూనివర్స్ లాగా ఉంటుందని, అందులో బన్నీ రోల్ చాలా పవర్‌ఫుల్‌గా ఉంటుందని టాక్. ఇక వరుసగా ఇలాంటి క్రేజీ డైరెక్టర్లతో సినిమాలు లైన్‌లో పెట్టడం చూస్తుంటే, బన్నీ తన పాన్ ఇండియా మార్కెట్‌ను మరింత పెంచుకునే ప్లాన్‌లో ఉన్నట్లు కనిపిస్తోంది. ఒకవైపు రీరిలీజ్ వేడుకలు, మరోవైపు కొత్త సినిమాల అనౌన్స్‌మెంట్లతో బన్నీ బర్త్ డే ఈసారి మెమరబుల్‌గా మారిపోయింది.