ఫోర్బ్స్ ఇండియా కవర్ పేజ్ పై బన్నీ.. అరుదైన గౌరవం పై రియాక్షన్!

ఐకాన్ స్టార్ అల్లు అర్జున్ క్రేజ్ మరోసారి దేశవ్యాప్తంగా సంచలనం సృష్టిస్తోంది. తాజాగా అంతర్జాతీయంగా ఎంతో పేరున్న 'ఫోర్బ్స్ ఇండియా' ప్రతిష్టాత్మక కవర్ పేజీపై అల్లు అర్జున్ చోటు దక్కించుకుని అరుదైన గౌరవాన్ని పొందారు. ప్రత్యేకంగా రూపొందించిన 'షోస్టాపర్స్' ఎడిషన్‌లో కవర్ స్టార్‌గా నిలిచిన బన్నీ.. తన పెరుగుతున్న పాన్ ఇండియా ఇమేజ్, సినిమాల ప్రస్తుత పరిస్థితిపై కొన్ని ఆసక్తికర వ్యాఖ్యలు చేశారు. దాంతో ఆయన చేసిన కామెంట్స్ ఇప్పుడు సోషల్ మీడియాలో విపరీతంగా వైరల్ అవుతున్నాయి. ఆ విశేషాలు చూద్దాం..

ఫోర్బ్స్ ఇండియా కవర్‌పై ఐకాన్ స్టార్ మెరుపులు:

దేశవ్యాప్తంగా వివిధ రంగాల్లో రికార్డులు సృష్టిస్తున్న ప్రముఖ నటులు, క్రీడాకారులు, సింగర్స్ మరియు ఆర్టిస్టులతో ఫోర్బ్స్ ఇండియా 'షోస్టాపర్స్' పేరుతో ప్రత్యేక సంచికను తీసుకొచ్చింది. ఇక ఈ మ్యాగజైన్ కవర్ పేజీపై అల్లు అర్జున్ నిలవడం విశేషం. సెలబ్రిటీల బ్రాండ్ బిల్డింగ్ ప్రయాణం, వారు ఎదుర్కొన్న సవాళ్లు, తమకంటూ ప్రత్యేకమైన గుర్తింపును ఎలా సాధించారనే కథనాలతో ఈ ఎడిషన్ రూపొందింది.ఇక ఇందులో బన్నీకి కవర్ స్టార్‌గా చోటు దక్కడం ఆయన నేషనల్ స్టేచర్‌కు అద్దం పడుతోంది.

సినిమాల పరిస్థితిపై బన్నీ సంచలన వ్యాఖ్యలు:

ఈ కవర్ ఇంటర్వ్యూలో అల్లు అర్జున్ ప్రస్తుతం చిత్ర పరిశ్రమలో ఉన్న పరిస్థితులపై చాలా స్పష్టంగా మాట్లాడారు. "బాలీవుడ్ అయినా, సౌత్ సినిమా అయినా, లేక మరే ప్రాంతీయ సినిమా అయినా సరే.. పరిశ్రమ మందగించడానికి ముఖ్య కారణం యావరేజ్ కంటెంట్ మాత్రమే. ఇక ఇప్పుడు యావరేజ్ సినిమాలు థియేటర్లలో వర్కవుట్ కావడం లేదు. మంచి కంటెంట్ ఉన్న సినిమాలు ఎక్కడైనా కచ్చితంగా ఆడుతాయి. కాబట్టి ప్రేక్షకులకు గొప్ప కంటెంట్ అందించడమే ఏకైక మార్గం" అని బన్నీ తేల్చి చెప్పారు.

రూ.2,200 కోట్ల బాక్సాఫీస్ కలెక్షన్స్– తిరుగులేని క్రేజ్:

‘పుష్ప: ది రైజ్’ మరియు ‘పుష్ప 2: ది రూల్’ చిత్రాలతో అల్లు అర్జున్ పాన్ ఇండియా స్థాయిని దాటి గ్లోబల్ స్టార్‌గా ఎదిగారు. ఈ రెండు సినిమాలు కలిపి ప్రపంచవ్యాప్తంగా సుమారు రూ.2,200 కోట్ల భారీ గ్రాస్ వసూళ్లను సాధించినట్లు నివేదికలు చెబుతున్నాయి. ఇక ప్రస్తుతం ఇండియన్ సినీ పరిశ్రమలోనే అత్యంత నమ్మకమైన, గ్యారంటీ కలెక్షన్లు రాబట్టే బ్యాంకబుల్ స్టార్లలో అల్లు అర్జున్ మొదటి వరుసలో నిలిచారు.

బ్రాండ్ ప్రపంచంలో అల్లు అర్జున్ హవా:

కేవలం వెండితెరపైనే కాకుండా బ్రాండ్ మార్కెట్‌లోనూ ఐకాన్ స్టార్‌దే హవా నడుస్తోంది. ఇప్పటివరకు దాదాపు 25కు పైగా ప్రముఖ జాతీయ, అంతర్జాతీయ బ్రాండ్లకు ఆయన ప్రచారకర్తగా వ్యవహరిస్తున్నారు.ఇక ఎంటర్‌టైన్‌మెంట్ ఇండస్ట్రీలో అత్యంత డిమాండ్ ఉన్న సెలబ్రిటీలలో అల్లు అర్జున్ ఒకరిగా కొనసాగుతున్నారు. ఆయనకున్న మాస్ అప్పీల్, క్రేజ్ చూసి బ్రాండ్లు ఆయనతో ఒప్పందాలకు క్యూ కడుతున్నాయి.

తెరపై విభిన్నమైన పాత్రలతో మెప్పించడమే కాకుండా, సినీ పరిశ్రమలోని వాస్తవాలను చాలా ధైర్యంగా విశ్లేషించడం అల్లు అర్జున్ ప్రత్యేకత. ఫోర్బ్స్ ఇండియా కవర్‌పై నిలవడం ద్వారా ఆయన సాధించిన ఈ గౌరవం ప్రతీ తెలుగు ప్రేక్షకుడికి గర్వకారణం. ఇక రాబోయే రోజుల్లో కంటెంట్ ఉన్న సినిమాలతో బన్నీ బాక్సాఫీస్ వద్ద మరిన్ని కొత్త రికార్డులను తిరగరాయడం ఖాయంగా కనిపిస్తోంది.