షూటింగ్ గ్యాప్.. ఫ్యామిలీ ట్రిప్.. ఇదే స్టార్‌ల కొత్త ఫార్ములా!

పాన్ ఇండియా స్థాయికి ఎదిగిన తర్వాత టాలీవుడ్ స్టార్‌ల పని విధానంలో గణనీయమైన మార్పు కనిపిస్తోంది. ఒకప్పుడు సినిమా పూర్తయ్యాక మాత్రమే విదేశీ పర్యటనలకు వెళ్లే హీరోలు, ఇప్పుడు మాత్రం షూటింగ్ షెడ్యూళ్ల మధ్య దొరికే చిన్న బ్రేక్ ను కూడా ఫ్యామిలీతో గడపడానికే ఉపయోగిస్తున్నారు. వరుస ప్రాజెక్టులు, అంతర్జాతీయ ప్రమోషన్లు, బ్రాండ్ కమిట్‌మెంట్స్ మధ్య ప‌ర్స‌న‌ల్ లైఫ్ కు టైమ్ కేటాయించడం కూడా వారి ప్రొఫెషనల్ ప్లానింగ్‌లో భాగంగా మారింది. స్టార్‌డమ్ ఎంత పెరిగినా, మానసికంగా రీఛార్జ్ కావడానికి ఫ్యామిలీతో గడిపే కొన్ని రోజులు అవసరమేనని ఇండస్ట్రీలో చాలా మంది భావిస్తున్నారు. అందుకే ఇటీవల టాలీవుడ్ స్టార్‌లలో షూటింగ్ గ్యాప్‌ల్లో విదేశీ వెకేషన్స్‌కు వెళ్లే ట్రెండ్ స్పష్టంగా కనిపిస్తోంది.

ఈ ట్రెండ్‌లో ఐకాన్ స్టార్ అల్లు అర్జున్ కూడా చేరారు. ప్రస్తుతం అట్లీ దర్శకత్వంలో రూపొందుతున్న రాకా షూటింగ్‌కు చిన్న బ్రేక్ దొరకడంతో ఆయన త‌న భార్య‌, పిల్ల‌లతో కలిసి ఆస్ట్రియాకు వెళ్లినట్లు తెలుస్తోంది. అయితే ఈ ట్రిప్ కంటే ఆసక్తికరమైన విషయం మరోటి ఉంది. భారీ బడ్జెట్, భారీ అంచనాల మధ్య రూపొందుతున్న సినిమా షూటింగ్ పూర్తి కాకుండానే చిన్న బ్రేక్ తీసుకుని మళ్లీ అదే ఎన‌ర్జీతో సెట్స్‌పైకి రావడం ఇప్పుడు స్టార్ హీరోల వర్కింగ్ స్టైల్‌గా మారుతోంది.

వెకేషన్ అనేది పనికి దూరంగా వెళ్లడం కాదని, తర్వాతి షెడ్యూల్‌కు మరింత ఎనర్జీతో సిద్ధమయ్యే ప్రక్రియగా చూస్తున్నారనే అభిప్రాయం ఇండస్ట్రీ వర్గాల్లో వినిపిస్తోంది. అల్లు అర్జున్ విషయంలో కూడా ఇదే డిస్క‌ష‌న్ జరుగుతోంది. ఇక స్టార్‌ల ప‌ర్స‌న‌ల్ లైఫ్ పై ప్రేక్షకుల ఆసక్తి కూడా గతంతో పోలిస్తే ఎన్నో రెట్లు పెరిగింది. ఒక ఫ్యామిలీ ట్రిప్ అయినా, లేదా ఫోటో బయటకు వచ్చినా అది సోషల్ మీడియాలో చర్చనీయాంశంగా మారుతోంది. అదే సమయంలో సెలబ్రిటీలకు పూర్తిస్థాయి ప్రైవసీ సాధ్యమేనా అనే ప్రశ్న కూడా తరచూ వినిపిస్తోంది.

ఫ్యాన్స్ తమ అభిమాన హీరోల ప‌ర్స‌న‌ల్ మూమెంట్స్ ను చూడాలని కోరుకోవడం ఒక‌వ‌ర‌కు క‌రెక్ట్ అయితే, మరోవైపు వారి ప‌ర్స‌న‌ల్ టైమ్ ను గౌరవించాలనే అభిప్రాయాలు కూడా వ్యక్తమవుతున్నాయి. అయినప్పటికీ, షూటింగ్‌ల మధ్య దొరికే చిన్న బ్రేక్ ను ఫ్యామిలీతో గడిపి, ఆ తర్వాత మళ్లీ పూర్తి ఫోక‌స్ ను సినిమాపై పెట్ట‌డం ఇప్పుడు టాలీవుడ్ స్టార్‌లలో సాధారణంగా కనిపిస్తున్న ధోరణి. అల్లు అర్జున్ కూడా ఈ వెకేష‌న్ నుంచి తిరిగి రాగానే రాకా షూటింగ్‌లో పాల్గొననున్నట్లు తెలుస్తోంది. దీంతో వెకేషన్ వార్త కంటే, సెల‌బ్రిటీలు వ‌ర్క్- ఫ్యామిలీ లైఫ్ ను ఎలా బ్యాలెన్స్ చేస్తున్నార‌నే కొత్త విధానంపైనే ఇప్పుడు ఎక్కువ డిస్క‌ష‌న్ జ‌రుగుతోంది.