బన్నీ- అట్లీ మూవీ.. ఆ OTT వందల కోట్లు చెల్లిస్తుందా?

టాలీవుడ్ ఐకాన్ స్టార్ అల్లు అర్జున్, కోలీవుడ్ స్టార్ డైరెక్టర్ అట్లీ కాంబినేషన్ లో భారీ ప్రాజెక్టు రూపొందుతున్న విషయం తెలిసిందే. సైన్స్ ఫిక్షన్ నేపథ్యంలో హై-వోల్టేజ్ యాక్షన్ డ్రామాగా రూపొందుతున్న ఆ సినిమా షూటింగ్ శరవేగంగా జరుగుతోంది. ఇప్పటికే 60 శాతం చిత్రీకరణ పూర్తి అయినట్లు సినీ వర్గాల్లో టాక్ వినిపిస్తోంది.

షూటింగ్‌ ను 2026 సెకండాఫ్ లో పూర్తి చేసి, 2027 వేసవిలో ప్రపంచవ్యాప్తంగా గ్రాండ్ గా థియేటర్లలో విడుదల చేయాలనే లక్ష్యంతో చిత్ర బృందం పనిచేస్తోందని వినికిడి. అయితే ఇప్పుడు బన్నీ- అట్లీ మూవీ ఓటీటీ డీల్ కు సంబంధించిన చర్చలు కొన్ని రోజులు జరుగుతున్నట్లు ఇప్పుడు సోషల్ మీడియాలో వార్తలు వస్తున్నాయి.

ప్రముఖ ఓటీటీ దిగ్గజం నెట్‌ఫ్లిక్స్‌.. డిజిటల్‌ రైట్స్‌ ను సొంతం చేసుకునేందుకు చర్చలు జరుపుతుందని సమాచారం. నెట్‌ ఫ్లిక్స్‌ అన్ని భాషల డిజిటల్‌ హక్కుల కోసం ఏకంగా రూ.600 కోట్లు చెల్లించేందుకు సిద్ధమైందని ఇప్పుడు టాక్ వినిపిస్తోంది. దీంతో ఇప్పటి వరకు ఏ భారతీయ చిత్రానికి ఖరారు అవ్వని రికార్డు డీల్‌ అని చెప్పాలి.

ఇప్పటికే వివిధ సినిమాల ఓటీటీ రైట్స్ విషయంలో భారీ మొత్తంలో డీల్స్ జరగ్గా.. అల్లు అర్జున్- అట్లీ మూవీ మాత్రం ఇప్పుడు సరికొత్త చరిత్ర సృష్టించేలా కనిపిస్తోంది. ప్రస్తుతం ఆ విషయం అటు సినీ వర్గాల్లో.. ఇటు సోషల్ మీడియాలో హాట్ టాపిక్ గా మారింది. బన్నీ మూవీనా మజాకానా అని ఫ్యాన్స్ కామెంట్లు పెడుతున్నారు.

ఇక సినిమా విషయానికొస్తే.. అత్యాధునిక సాంకేతికతతో ప్రముఖ నిర్మాణ సంస్థ సన్‌ పిక్చర్స్‌ రూపొందిస్తోంది. ఖర్చు విషయంలో ఎలాంటి వెనుకడుగు వేయకుండా, సినిమాను గ్లోబల్‌ స్థాయిలో నిలబెట్టేలా ప్రణాళికలు రచిస్తున్నారు నిర్మాత కళానిధి మారన్. మూవీ కోసం పెద్ద ఎత్తున క్రూ అండ్ క్యాస్టింగ్ ను రంగంలోకి దించారు!

సినిమాలో అల్లు అర్జున్ తో పాటు బాలీవుడ్ స్టార్ హీరోయిన్ దీపికా పదుకొణె లీడ్ రోల్ లో నటిస్తున్నారు. మృణాల్‌ ఠాకూర్‌, రష్మిక మందన్న, జాన్వీ కపూర్‌ సహా పలువురు స్టార్‌ హీరోయిన్లు మూవీలో కీలక పాత్రల్లో యాక్ట్ చేస్తున్నారని సమాచారం. ప్రతి ఒక్కరి పాత్రకు కూడా సినిమాలో ప్రత్యేకమైన ప్రాధాన్యం ఉంటుందని తెలుస్తోంది.

హాలీవుడ్‌ కు చెందిన ప్రముఖ టెక్నీషియన్లు ప్రాజెక్టుకు వర్క్ చేస్తున్నారు. యాక్షన్‌ సన్నివేశాలు, గ్రాఫిక్స్‌, సీజీఐతో ఇండియన్‌ సినిమాకు కొత్త ప్రమాణాలను తీసుకొచ్చేందుకు వారంతా సిద్ధమవుతున్నారు. మరి రూ.1000 కోట్లకు పైగా బడ్జెట్ తో రూపొందుతున్న బన్నీ- అట్లీ మూవీ ఇంకెన్ని రికార్డులు క్రియేట్ చేస్తుందో చూడాలి.