యంగ్ డైరెక్ట‌ర్స్ ఆ ఛాన్స్ తీసుకుంటారా?

అల్లరి నరేష్ కెరీర్‌లో ఇప్పుడు మరో ఇంట్రెస్టింగ్ దశ నడుస్తోంది. ఒకప్పుడు పూర్తిస్థాయి కామెడీ హీరోగా తనకంటూ స్పెష‌ల్ బ్రాండ్‌ను సృష్టించుకున్న నరేష్, గత కొన్నేళ్లుగా నటుడిగా విభిన్నమైన పాత్రలను ఎంచుకుంటూ తనలోని మరో కోణాన్ని ప్రేక్షకులకు పరిచయం చేస్తున్నారు. ఇప్పుడు ఆయన చేసిన తాజా కామెంట్స్ టాలీవుడ్ యంగ్ డైరెక్ట‌ర్ల దృష్టిని ఆకర్షించేలా ఉన్నాయి.

అల్లరి నరేష్ నటించిన రంభ ఊర్వశీ మేనక సెప్టెంబర్ 4న ప్రేక్షకుల ముందుకు రానుంది. సినిమా ప్రమోషన్స్‌లో బిజీగా ఉన్న నరేష్, ఈ జెన‌రేష‌న్ లో తనకు ఇష్టమైన డైరెక్ట‌ర్ల‌ గురించి మాట్లాడారు. ముఖ్యంగా తరుణ్ భాస్కర్, రితేష్ రాణా వంటి యంగ్ డైరెక్ట‌ర్ల‌తో కలిసి పనిచేయాలనే ఆసక్తిని వ్యక్తం చేయడం ఇప్పుడు చర్చనీయాంశంగా మారింది. ఇది కేవలం అభిమానించే డైరెక్ట‌ర్ల పేర్లు చెప్పడం మాత్రమేనా? లేక ఇండస్ట్రీకి నరేష్ పంపిన ఓపెన్ సిగ్నలా? అనే ప్రశ్న ఆసక్తికరంగా కనిపిస్తోంది.

నరేష్‌లో ఉన్న అతిపెద్ద స్ట్రెంగ్త్ ఆయన కామెడీ టైమింగ్. అయితే ఆయనను కేవలం కామెడీ హీరోగా మాత్రమే పరిమితం చేయడం ఇప్పుడు సరైన అంచనా కాదని గత కొన్ని సినిమాలు నిరూపించాయి. కామెడీతో పాటూ ఎమోషన్, సీరియస్ పాత్రలు, సాధారణ మనిషి జీవితానికి దగ్గరగా ఉండే క్యారెక్టర్స్‌ను కూడా ఆయన సమర్థవంతంగా పోషించగలరని చూపించారు. ఇలాంటి నటుడిని కొత్త తరహా కథలు చెప్పే యంగ్ డైరెక్ట‌ర్లు తమ ప్రపంచంలోకి తీసుకొస్తే ఆసక్తికరమైన ఫలితం రావచ్చు.

తరుణ్ భాస్కర్ సినిమాల్లో కనిపించే నేచుర‌ల్ క్యారెక్ట‌ర్లు, నేచురల్ హ్యూమర్‌కు నరేష్ టైమింగ్ బాగా సరిపోవచ్చు. మరోవైపు రితేష్ రాణా తరహా డార్క్ కామెడీ, థ్రిల్లర్ వ‌ర‌ల్డ్ లో నరేష్‌ను ఊహించుకోవడం కూడా ఆడియ‌న్స్ కు కొత్త అనుభూతినే ఇవ్వొచ్చు. అందుకే నరేష్ చేసిన కామెంట్స్ ను ఒక కోరికగా చూడలేం. కొత్త ప్రయోగాలకు తాను సిద్ధ‌మ‌ని, కొత్త తరహా డైరెక్ట‌ర్ల‌తో వ‌ర్క్ చేయ‌డానికి ఓపెన్‌గా ఉన్నాన‌నే సందేశాన్ని ఆయన ఇన్‌డైరెక్ట్‌గా ఇండస్ట్రీకి పంపుతున్నట్టుగా కనిపిస్తోంది.

ఇప్పుడు అసలు ప్రశ్న ఒక్కటే. నరేష్‌లో ఉన్న కామెడీ టైమింగ్, యాక్టింగ్ లోని వెర్సటిలిటీని పూర్తిగా కొత్తగా ఉపయోగించుకునే కథతో ఏ యంగ్ డైరెక్ట‌ర్ ముందుకు వస్తారు? యంగ్ డైరెక్టర్స్‌కు ఇది నిజంగానే నరేష్ నుంచి వచ్చిన ఓపెన్ ఇన్విటేషన్ అయితే, త్వరలోనే ఒక ఊహించని కాంబినేషన్ తెరపైకి వ‌చ్చినా ఆశ్చ‌ర్య‌పోన‌క్క‌ర్లేదు.