సుప్రియ గురించి శేష్ మనసులో మాట!
అడివి శేష్ నిర్మాత సుప్రియ యార్లగడ్డపై ప్రశంసల వర్షం కురిపించారు. కలెక్షన్ల పరంగా దూసుకుపోతున్న ఈ సినిమా సక్సెస్ మీట్ విశేషాలు ఇప్పుడు సోషల్ మీడియాలో వైరల్ అవుతున్నాయి.
By: Madhu Reddy | 13 April 2026 2:34 PM IST
అడివి శేష్, మృణాల్ ఠాకూర్ జంటగా నటించిన ‘డెకాయిట్’ చిత్రం బాక్సాఫీస్ వద్ద సందడి చేస్తోంది. తాజాగా జరిగిన సక్సెస్ మీట్లో చిత్ర యూనిట్ తమ ఆనందాన్ని పంచుకుంది. ముఖ్య అతిథిగా వచ్చిన అల్లు అరవింద్ తనదైన శైలిలో సరదా వ్యాఖ్యలు చేయగా, అడివి శేష్ నిర్మాత సుప్రియ యార్లగడ్డపై ప్రశంసల వర్షం కురిపించారు. కలెక్షన్ల పరంగా దూసుకుపోతున్న ఈ సినిమా సక్సెస్ మీట్ విశేషాలు ఇప్పుడు సోషల్ మీడియాలో వైరల్ అవుతున్నాయి.
సుప్రియ గురించి శేష్ ఎమోషనల్ స్పీచ్:
సక్సెస్ మీట్లో హీరో అడివి శేష్ నిర్మాత సుప్రియ యార్లగడ్డ గురించి చాలా గొప్పగా మాట్లాడారు. "ఈ సినిమా ఈ స్థాయిలో వచ్చిందంటే దానికి కారణం సుప్రియ గారే. ఆమె లేకపోతే డెకాయిట్ ఇంత క్వాలిటీగా వచ్చేది కాదు" అని కొనియాడారు. వేదికపై పెద్ద పెద్ద నిర్మాతలు ఉన్నప్పటికీ, వారందరి ముందు గర్వంగా చెబుతున్నాను.. తాను చూసిన వారిలో సుప్రియే 'బెస్ట్ ప్రొడ్యూసర్' అని శేష్ ఓపెన్గా పొగిడేశారు. "సుప్రి.. ఈ సినిమాకు ఎంత ముఖ్యమో, నాకూ అంతే ముఖ్యం" అని ఆయన అన్న మాటలకు సుప్రియ ఎమోషనల్ అయ్యారు.
అల్లు అరవింద్ సరదా వ్యాఖ్యలు.. మృణాల్ సిగ్గులు:
ఈ వేడుకకు ముఖ్య అతిథిగా వచ్చిన అల్లు అరవింద్ తన ప్రసంగంతో నవ్వులు పూయించారు. హీరోయిన్ మృణాల్ ఠాకూర్ నటనను మెచ్చుకుంటూనే ఒక ఆసక్తికరమైన కామెంట్ చేశారు. "గతంలో లావణ్య త్రిపాఠిని దీవించాను, ఆమె వరుణ్ తేజ్ను పెళ్లి చేసుకుని ఇక్కడే సెటిల్ అయిపోయింది. ఇప్పుడు మృణాల్ కూడా మన తెలుగు అబ్బాయినే పెళ్లి చేసుకుని ఇక్కడే ఉండిపోవాలని కోరుకుంటున్నాను" అని అనడంతో మృణాల్ తెగ సిగ్గుపడిపోయింది. డెకాయిట్ ఒక అద్భుతమైన టీమ్ వర్క్ అని అరవింద్ ప్రశంసించారు.
బాక్సాఫీస్ వద్ద ‘డెకాయిట్’ జోరు:
ప్రారంభంలో మిక్స్డ్ టాక్ వచ్చినప్పటికీ, వసూళ్ల పరంగా డెకాయిట్ అదరగొడుతోంది. కేవలం రెండు రోజుల్లోనే దాదాపు 25 నుంచి 30 కోట్ల రూపాయల గ్రాస్ రాబట్టినట్లు సమాచారం. ఈ వీకెండ్ రేసులో డెకాయిట్ సినిమానే ముందు వరుసలో నిలిచింది. అన్నపూర్ణ స్టూడియోస్ సమర్పణలో వచ్చిన ఈ చిత్రం ప్రేక్షకులను ఆకట్టుకోవడంలో సక్సెస్ అయింది. షానీల్ డియో దర్శకత్వ ప్రతిభ, శేష్-మృణాల్ కెమిస్ట్రీ ఈ సినిమా విజయానికి ప్రధాన కారణాలని ట్రేడ్ వర్గాలు విశ్లేషిస్తున్నాయి.
టీమ్ సమిష్టి విజయం:
మొత్తానికి ‘డెకాయిట్’ సక్సెస్ మీట్ అంతా చాలా పాజిటివ్ వైబ్తో సాగింది. నిర్మాత సుప్రియ మాట్లాడుతూ.. ఇది కేవలం సినిమా మాత్రమే కాదని, స్వచ్ఛమైన ప్రేమకు ఒక ఎక్స్ప్రెషన్ అని తెలిపారు. బన్నీ వాసు, స్వప్న దత్, నందినీ రెడ్డి వంటి ప్రముఖులు కూడా పాల్గొని టీమ్ను అభినందించారు. ఒకవైపు మంచి వసూళ్లు, మరోవైపు ఇండస్ట్రీ పెద్దల ప్రశంసలతో డెకాయిట్ టీమ్ ఫుల్ ఖుషీగా ఉంది. ఈ సక్సెస్ జోష్ చూస్తుంటే రాబోయే రోజుల్లో ఈ సినిమా మరిన్ని రికార్డులు క్రియేట్ చేసేలా కనిపిస్తోంది.