స్టార్ హీరో ఇంట్లో క‌ఠిన‌మైన రూల్స్!

బాలీవుడ్ మిస్టర్ పర్ఫెక్ట్ అమీర్ ఖాన్ తన చిన్ననాటి జ్ఞాపకాలను నెమరువేసుకుంటూ తాజాగా కొన్ని ఆసక్తికరమైన విషయాలను పంచుకున్నారు. వెండితెరపై ఎన్నో వైవిధ్యమైన పాత్రలు పోషించిన అమీర్ నిజ జీవితంలో మాత్రం చాలా కట్టుబాట్ల మధ్య పెరిగారని వెల్లడించారు. తన కుటుంబం చాలా సంప్రదాయబద్ధమైనదని చిన్నప్పుడు తమకు కొన్ని రకాల సినిమాలను చూసే అవకాశం కూడా ఉండేది కాదని పేర్కొన్నారు. ముఖ్యంగా రొమాంటిక్ సినిమాల విషయంలో ఇంట్లో చాలా కఠినమైన నిబంధనలు ఉండేవని అమీర్ గుర్తు చేసుకున్నారు.

అప్పట్లో బాలీవుడ్ లేదా హాలీవుడ్‌లో వచ్చే ప్రేమకథా చిత్రాలను చూడటానికి తమకు అనుమతి ఉండేది కాద న్నారు. సినిమాలంటే కేవలం వినోదం మాత్రమే కాదని అవి పిల్లల మనస్తత్వంపై ప్రభావం చూపుతాయని పెద్దలు భావించేవారన్నారు. ఈ పరిమితులు తన ఆలోచనా విధానాన్ని ఎలా ప్రభావితం చేశాయో కూడా అమీర్ వివరించారు. `ఇంట్లో ఇన్ని కట్టుబాట్లు ఉన్నప్పటికీ సినిమాలపై తనకున్న మక్కువ తగ్గలేదని అన్నారు. ఒకవైపు సంప్రదాయ విలువలను గౌరవిస్తూనే మరోవైపు కళ పట్ల తనకున్న ఆసక్తిని పెంచుకున్నానని చెప్పారు.

బహుశా ఆ కట్టుబాట్లే తన సినిమాల్లో కథాబలం, సామాజిక బాధ్యత ఉండేలా చూసుకోవడంలో తనకు తోడ్పడి ఉంటాయని అభిప్రాయపడ్డారు. ప్రస్తుత కాలంతో పోలిస్తే అప్పటి పరిస్థితులు చాలా భిన్నంగా ఉండేవన్నారు. నేటి డిజిటల్ యుగంలో పిల్లలకు అన్ని రకాల కంటెంట్ అందుబాటులో ఉందని కానీ అప్పట్లో కుటుంబం మరియు సమాజం విధించిన పరిమితులు క్రమశిక్షణను నేర్పేవని పేర్కొన్నారు. తన కెరీర్‌లో ఎన్నో ప్రేమకథా చిత్రాల్లో నటించిన అమీర్ తన సొంత జీవితంలో మాత్రం రొమాంటిక్ సినిమాలకు దూరంగా పెరగడం గమనార్హం.

మొత్తానికి అమీర్ ఖాన్ పంచుకున్న ఈ వ్యక్తిగత విషయాలు ఆయన అభిమానులను ఆశ్చర్యానికి గురి చేస్తున్నాయి. ఒక గొప్ప నటుడిగా ఎదిగే క్రమంలో ఆయన ఎదుర్కొన్న సామాజిక , కుటుంబ నేపథ్యం ఆయన వ్యక్తిత్వాన్ని ఎలా తీర్చిదిద్దిందో? ఆయ‌న‌ మాటల ద్వారా అర్థమవుతోంది. ప్రస్తుతం అమీర్ ఖాన్ త‌దుపరి ప్రాజెక్టుల పనిలో బిజీగా ఉన్నారు. అలాగే కుమారుడు జునైద్ ఖాన్ కూడా న‌టుడిగా బిజీ అయ్యే ప్ర‌య‌త్నాలు చేస్తున్నాడు. ఈ క్రమంలో కుమారుడికి సంబంధించిన వ్య‌వ‌హారాలు కూడా అమీర్ ఖాన్ ద‌గ్గ‌రుండి చూసుకుంటున్నారు. స్టార్ సింగర్ అర్జిత్ సింగ్ గాయ‌కుడిగా రిటైర్మెంట్ ప్ర‌క‌టించిన నేప‌థ్యంలో కుమారుడి సినిమాలో పాట కోసం స్వ‌యంగా అమీర్ ఖాన్ అర్జిత్ సింగ్ స్వ‌గ్రామం వెళ్లి మ‌రీ అత‌డిని ఒప్పించి తన సినిమాలో పాట పాడించుకున్నారు.