రీల్స్ పిచ్చి పరాకాష్ట.. యువకుడిని సజీవ దహనం చేసేందుకు యత్నం!

సోషల్ మీడియా రీల్స్ పిచ్చి రోజురోజుకూ మితిమీరిపోతోంది. ఎక్కువ వ్యూస్, లైక్స్, ఫాలోవర్ల కోసం కొందరు ఎంతకైనా తెగిస్తున్నారు. చివరకు ఇతరుల ప్రాణాలతో కూడా ఆడుకుంటున్నారు. సరదా కోసం చేసే వీడియోలు ఒక్కోసారి ఎంతటి ప్రమాదాలకు దారితీస్తున్నాయో కోల్‌కతాలో జరిగిన ఓ దారుణ ఘటన చూస్తే అర్థమవుతుంది. కేవలం రీల్ చేయాలనే ఉద్దేశంతో ఓ యువకుడిపై పెట్రోల్ పోసి నిప్పంటించారు. ఈ ఘటన ఇప్పుడు తీవ్ర చర్చకు దారితీసింది.

ఈ సంఘటన అక్టోబర్ 27న దక్షిణ కోల్‌కతాలోని గర్ఫా పోలీస్ స్టేషన్ పరిధిలో ఉన్న లెనిన్ నగర్ ప్రాంతంలో జరిగింది. పని ముగించుకుని ఇంటికి వెళ్తున్న ఓ యువకుడిని ముగ్గురు వ్యక్తులు అడ్డుకున్నారు. అతడితో ఆట ఆడదామని చెప్పి సమీపంలోని చెరువు దగ్గరకు తీసుకెళ్లారు. అక్కడికి వెళ్లిన తర్వాత అతడి తలపై హెల్మెట్ పెట్టి, కళ్లకు గంతలు కట్టారు. అనంతరం అతడిపై దాడి చేశారు.

ఇంతటితో ఆగకుండా అతడికి పెట్రోల్ తాగించేందుకు ప్రయత్నించారు. అయితే పెట్రోల్ వాసన రావడంతో అనుమానం వచ్చిన యువకుడు దానిని చేతితో పక్కకు నెట్టేశాడు. దీంతో కోపానికి గురైన నిందితులు మరింత క్రూరంగా ప్రవర్తించారు. అతడి శరీరంపై పెట్రోల్ పోసి అగ్గిపుల్ల వెలిగించి విసిరారు. దీంతో యువకుడి దుస్తులకు మంటలు అంటుకున్నాయి.

ఒక్కసారిగా మంటలు చెలరేగడంతో బాధితుడు ప్రాణాలు కాపాడుకోవడానికి అక్కడి నుంచి పరుగులు తీశాడు. తన దుస్తులను తొలగించుకుని మంటలను ఆర్పుకునే ప్రయత్నం చేశాడు. అక్కడున్న స్థానికులు వెంటనే స్పందించి అతడిని రక్షించారు. అనంతరం చికిత్స కోసం ఆసుపత్రికి తరలించారు. ఈ దాడిలో అతడి ఛాతీ, పొట్ట భాగాల్లో కాలిన గాయాలయ్యాయి.

మరో షాకింగ్ విషయం ఏమిటంటే.. ఈ దాడి మొత్తాన్ని నిందితుల్లో ఒకరు తన మొబైల్ ఫోన్‌లో రికార్డ్ చేశారు. సోషల్ మీడియాలో రీల్‌గా పెట్టేందుకే ఈ వీడియో తీసి ఉంటారని పోలీసులు అనుమానిస్తున్నారు. ఈ ఘటనకు సంబంధించి ముగ్గురిని అరెస్ట్ చేశారు. వారిలో ఇద్దరు మైనర్లు ఉన్నట్లు తెలుస్తోంది.

ఒక వీడియో కోసం మనిషి ప్రాణాలను ప్రమాదంలో పెట్టడం ఎంతటి దారుణం..సోషల్ మీడియాలో గుర్తింపు పొందాలనే కోరికకు హద్దులు లేకుండా పోతే ఇలాంటి ఘటనలే జరుగుతాయి. లైక్స్, వ్యూస్ కంటే మనిషి ప్రాణం ఎంతో విలువైనదని ప్రతి ఒక్కరూ గుర్తించాలి.