500 కోట్ల క్లబ్.. సౌత్ హీరోల్లో టాప్ ఎవరంటే!
రూ.500 కోట్ల క్లబ్‌లో అత్యధిక సినిమాలతో ప్రభాస్, రజనీకాంత్ చెరో నాలుగు చిత్రాలతో ముందున్నారు. ప్రభాస్‌కు 'బాహుబలి', 'బాహుబలి 2', 'సలార్', 'కల్కి 2898 ఏడీ' ఉండగా, రజనీకి '2.0', 'జైలర్', 'కూలీ', 'జైలర్ 2' ఉన్నాయి. అల్లు అర్జున్, యష్, ఎన్టీఆర్, రామ్ చరణ్, విజయ్, రిషబ్ శెట్టి కూడా ఈ జాబితాలో నిలిచారు.
By: M Prashanth | 11 Nov 2026 11:28 AM IST
ఒకప్పుడు రూ.100 కోట్ల వసూళ్లు సాధించడమే పెద్ద రికార్డు. ఇప్పుడు సౌత్ సినిమాలు వెయ్యి కోట్ల మార్కును కూడా దాటుతున్నాయి. అయితే అన్ని సినిమాలకూ అలాంటి వసూళ్లు రావడం లేదు. పెద్ద స్టార్ ఉన్నా, భారీ బడ్జెట్ పెట్టినా కొన్నిసార్లు రూ.500 కోట్ల మార్కును అందుకోవడం కష్టమవుతోంది. మరి ప్రపంచవ్యాప్తంగా ఈ మార్కును ఎక్కువసార్లు అందుకున్న సౌత్ హీరోలు ఎవరనే వివరాల్లోకి వెళితే..
ప్రభాస్
ఈ లిస్టులో ప్రభాస్ నాలుగు సినిమాలతో ముందున్నారు. 'బాహుబలి', 'బాహుబలి 2', 'సలార్', 'కల్కి 2898 ఏడీ' రూ.500 కోట్లకు పైగా గ్రాస్ వసూలు చేశాయి. ముఖ్యంగా 'బాహుబలి 2' దాదాపు రూ.1800 కోట్లతో ప్రభాస్ కెరీర్‌లో అతిపెద్ద విజయంగా నిలిచింది. 'కల్కి' కూడా వెయ్యి కోట్ల మార్కును దాటింది.
రజనీకాంత్
తమిళ హీరోల్లో రజనీకాంత్‌కు కూడా నాలుగు సినిమాలున్నాయి. '2.0', 'జైలర్', 'కూలీ' తర్వాత ఈ ఏడాది వచ్చిన 'జైలర్ 2' కూడా రూ.500 కోట్ల మార్కును దాటింది. ముఖ్యంగా 'జైలర్ 2' ప్రపంచవ్యాప్తంగా రూ.800 కోట్లకు పైగా వసూలు చేసింది. దీంతో ప్రభాస్‌తో సమానంగా నాలుగు సినిమాలున్న హీరోగా రజనీ నిలిచారు. ఈ ఇద్దరూ వేర్వేరు తరాలకు చెందిన స్టార్స్ కావడం విశేషం.
అల్లు అర్జున్ - యష్
మిగతా హీరోల్లో అల్లు అర్జున్ 'పుష్ప 2', యష్ 'కేజీఎఫ్ 2' సినిమాలతో భారీ రికార్డులు అందుకున్నారు. ఈ రెండు సినిమాలు ప్రపంచవ్యాప్తంగా వెయ్యి కోట్లకు పైగా వసూలు చేశాయి. ముఖ్యంగా 'పుష్ప 2' దాదాపు రూ.1742 కోట్ల గ్రాస్ సాధించింది. యష్‌కు 'కేజీఎఫ్ 2' ఒక్కటే ఈ క్లబ్‌లో ఉన్నప్పటికీ ఆ సినిమా రూ.1200 కోట్ల మార్కును దాటింది.
మిగతా హీరోలు
ఇక ఎన్టీఆర్, రామ్ చరణ్‌లకు 'RRR' రూపంలో ఒక్కో సినిమా ఉంది. ఇద్దరూ కలిసి నటించిన ఈ చిత్రం దాదాపు రూ.1230 కోట్ల గ్రాస్ వసూలు చేసింది. విజయ్‌కు 'లియో'తో రూ.500 కోట్ల క్లబ్‌లో చోటు దక్కింది. కన్నడ హీరో రిషబ్ శెట్టి కూడా 'కాంతార చాప్టర్ 1'తో ఈ మార్కును అందుకున్నారు. ఆ సినిమా ప్రపంచవ్యాప్తంగా రూ.850 కోట్లకు పైగా వసూలు చేసింది.
అయితే రూ.500 కోట్ల క్లబ్‌లో ఎక్కువ సినిమాలున్నంత మాత్రాన అన్ని విజయాలూ ఒకే స్థాయిలో ఉండవు. ప్రభాస్‌కు రెండు వెయ్యి కోట్ల సినిమాలుండగా, అల్లు అర్జున్ ఒక్క 'పుష్ప 2'తోనే భారీ వసూళ్లు సాధించారు. మరోవైపు రజనీకాంత్ వరుసగా 'జైలర్', 'కూలీ', 'జైలర్ 2' సినిమాలతో ఈ మార్కును అందుకున్నారు. హీరోల తదుపరి సినిమాలు ఈ లిస్టులో ఎలాంటి మార్పులు తీసుకొస్తాయో చూడాలి.