రామాయణం కలెక్షన్స్.. ఓపెనింగ్స్ ఓకే కానీ!
రణబీర్ కపూర్, సాయిపల్లవి, యశ్ నటించిన ‘రామాయణం’ తొలి రోజు భారత్‌లో రూ.64.85 కోట్ల నెట్ వసూళ్లు సాధించినట్లు ట్రేడ్ అంచనాలు చెబుతున్నాయి. హిందీ వెర్షన్ నుంచి రూ.47.50 కోట్లు రాగా, తెలుగు నుంచి రూ.6 కోట్లు వచ్చాయి. ప్రభాస్ ‘ఆదిపురుష్’ తొలి రోజు వసూళ్లు రూ.86.75 కోట్లతో పోలిస్తే ‘రామాయణం’ వెనుకబడింది. విజువల్స్, యశ్ నటనకు ప్రశంసలు వస్తుండగా, కథనం, నిడివిపై మిశ్రమ స్పందన లభిస్తోంది.
By: M Prashanth | 6 Nov 2026 10:35 AM IST
రణబీర్ కపూర్, సాయి పల్లవి, యశ్ ప్రధాన పాత్రల్లో తెరకెక్కిన 'రామాయణం' బాక్సాఫీస్ గేమ్ మొదలైంది. భారీ బడ్జెట్‌తో రూపొందిన ఈ సినిమాకు మొదటి రోజు మంచి ఓపెనింగ్స్ వచ్చినట్లు ట్రేడ్ వర్గాలు చెబుతున్నాయి. అయితే ఇండియాలో వంద కోట్లకు పైగా వసూళ్లు వస్తాయని ఆశించిన వారికి మాత్రం లెక్కలు కాస్త తక్కువగానే కనిపిస్తున్నాయి. గురువారం విడుదలైన ఈ సినిమాకు ఉదయం కంటే సాయంత్రం షోల నుంచి రెస్పాన్స్ పెరిగినట్లు తెలుస్తోంది.
అంచనాల ప్రకారం నవంబర్ 5న 'రామాయణం' భారతదేశంలో రూ.64.85 కోట్ల నెట్ వసూళ్లు సాధించింది. గ్రాస్ లెక్కల్లో దాదాపు రూ.77.50 కోట్ల వరకు వచ్చినట్లు అంచనా.
అంచనాల ప్రకారం తొలి రోజు ఇండియా నెట్ కలెక్షన్స్:
హిందీ: రూ.47.50 కోట్లు
తెలుగు: రూ.6 కోట్లు
తమిళం: రూ.2.60 కోట్లు
కన్నడ: రూ.7.25 కోట్లు
మలయాళం: రూ.1.50 కోట్లు
మొత్తం: రూ.64.85 కోట్లు
హిందీ వెర్షన్ నుంచే అత్యధిక వసూళ్లు నమోదయ్యాయి. కన్నడ రెండో స్థానంలో ఉండగా తెలుగు మూడో స్థానంలో నిలిచింది. ట్రేడ్ వర్గాల లెక్కల ప్రకారం దేశవ్యాప్తంగా దాదాపు 25,200 షోలలో సినిమా మొదలైంది. తెలుగు వెర్షన్‌కు సుమారు 58.5 శాతం ఆక్యుపెన్సీ నమోదు కావడం విశేషం. అయితే హిందీ వెర్షన్‌కు ఎక్కువ షోలు లభించడంతో మొత్తం వసూళ్లలో ఆ భాష వాటా అధికంగా ఉంది.
ఇక ప్రభాస్ 'ఆదిపురుష్'తో పోలిస్తే ఓపెనింగ్స్‌లో 'రామాయణం' వెనుకబడింది. 2023లో విడుదలైన 'ఆదిపురుష్' తొలి రోజు ఇండియాలో రూ.86.75 కోట్ల నెట్ వసూళ్లు సాధించినట్లు ట్రేడ్ అంచనాలు చెబుతున్నాయి. అంటే రెండు సినిమాల మధ్య దాదాపు రూ.22 కోట్ల తేడా ఉంది. అయితే 'ఆదిపురుష్'కు మొదటి రోజు భారీ ఓపెనింగ్స్ వచ్చినా, తర్వాత నెగెటివ్ టాక్‌తో వసూళ్లు పడిపోయాయి. ఇప్పుడు 'రామాయణం'కు అలాంటి పరిస్థితి ఎదురవుతుందా లేదా అన్నది చూడాలి.
'రామాయణం'కు విజువల్ ఎఫెక్ట్స్, జటాయువు పోరాటం, యశ్ నటన విషయంలో మంచి రెస్పాన్స్ వస్తోంది. అదే సమయంలో సీతారాముల మధ్య భావోద్వేగాలు, నెమ్మదిగా సాగే కథనం, సుదీర్ఘ నిడివిపై మిక్స్ డ్ రియాక్షన్స్ వస్తున్నాయి. తొలి రోజు రాత్రి షోలకు ఆక్యుపెన్సీ పెరగడం మాత్రం బాక్సాఫీస్ పరంగా పాజిటివ్ అంశం. ముఖ్యంగా శని, ఆదివారాల్లో ఫ్యామిలీ ప్రేక్షకులు ఎంతవరకు థియేటర్లకు వస్తారనేది కీలకం.
నవంబర్ 5న గురువారం విడుదల కావడంతో ఈ సినిమాకు నాలుగు రోజుల తొలి వీకెండ్ లభించింది. మరోవైపు విదేశీ మార్కెట్ల నుంచి పూర్తిస్థాయి వసూళ్ల అంచనాలు కూడా రావాల్సి ఉంది. భారత్‌లో శుక్రవారం కలెక్షన్స్ నిలకడగా కొనసాగి, శని, ఆదివారాల్లో పెరుగుదల నమోదైతే మొదటి వీకెండ్ లెక్కలు మరింత మెరుగ్గా ఉండే అవకాశం ఉందని ట్రేడ్ వర్గాలు అంచనా వేస్తున్నాయి.