హతఃవిధీ... మస్క్ టెస్లా కార్లకు భారత్ లో ఈ పరిస్థితా..!

ప్రపంచవ్యాప్తంగా.. ప్రధానంగా అగ్రరాజ్యంలో ఎంతో ఫేమస్ అయిన టెస్లా కార్లకు భారత్ లో మాత్రం శుభసమయం రావడం లేదనే చెప్పాలి. భారీ డిస్కౌంట్లు ప్రకటించినా వాటివైపు జనం చూడటం లేదు సరికదా.. ఇప్పటికే బుక్కింగ్ చేసుకున్నవారు సైతం వెనక్కి తగ్గరాని అంటున్నారు. ఈ క్రమంలో గతేడాది దిగుమతి చేసుకున్న 300 మోడల్ వై కార్లలో సుమారు 100 వాహనాలు అమ్ముడవక షెడ్డుకే పరిమితమయ్యాయని చెబుతున్నారు. దీంతో.. ఈ వ్యవహారంపై చర్చ మొదలైంది.

అవును... గత ఏడాది భారతదేశానికి దిగుమతి చేసుకున్న ప్రారంభ వాహనాలలో మూడింట ఒక వంతును ఆఫ్‌ లోడ్ చేయడంలో టెస్లా ఇబ్బంది పడుతోంది. ముందస్తు బుకింగ్‌ లు చేసిన కొంతమంది వెనక్కి తగ్గారని అంటున్నారు. ఎలోన్ మస్క్ నేతృత్వంలోని కంపెనీ సుమారు 300 మోడల్ వై స్పోర్ట్ యుటిలిటీ వాహనాల బ్యాచ్‌ ను రవాణా చేసిన నాలుగు నెలల తర్వాత కూడా డిమాండ్ మందగించడం వల్ల దాదాపు 100 వాహనాలు ఇబ్బందుల్లో ఉన్నాయని అంటున్నారు.

ఈ నేపథ్యంలో అమ్ముడుపోని స్టాక్‌ ను తొలగించడానికి, టెస్లా కొన్ని వేరియంట్‌ లపై రూ. 2,00,000 ($2,200) వరకు తగ్గింపులను అందిస్తున్నట్లు చెబుతున్నారు. కంపెనీ ప్రపంచవ్యాప్తంగా డిమాండ్ క్షీణిస్తున్న సమయంలో.. భారతదేశంలో ఈ నిరాశాజనకమైన అరంగేట్రం జరిగింది. 2025లో దాని ప్రపంచవ్యాప్తంగా అమ్మకాలు వరుసగా రెండో సంవత్సరం పడిపోయాయి. దీంతో.. స్థానిక కార్యకలాపాలకు నాయకత్వం వహించడానికి లంబోర్గిని ఇండియా మాజీ అధిపతి శరద్ అగర్వాల్‌ ను నవంబర్ లో నియమించింది.

వాస్తవానికి ఈవీ తయారీదారు భారతదేశంలో మోడల్ వై కోసం దాదాపు 600 బుకింగ్‌ లను మాత్రమే పొందినట్లు గత సెప్టెంబర్ లో బ్లూమ్‌ బెర్గ్ నివేదించింది. అయితే ఆ ఆర్డర్‌ లలో గణనీయమైన భాగాన్ని ఇంకా డెలివరీలుగా మార్చాల్సి ఉందని చెబుతున్నారు. కంపెనీ గత సంవత్సరం భారతదేశానికి 500 కార్లను రవాణా చేసింది. కాగా.. టెస్లా ప్రస్తుతం భారతదేశంలో మోడల్ వైని దాదాపు $70,000 ప్రారంభ ధరకు విక్రయిస్తోంది.

భారతదేశ అధికారిక వాహన-రిజిస్ట్రేషన్ డేటా ప్రకారం.. 2025 సంవత్సరానికి టెస్లా దేశంలో కేవలం 227 కార్లను మాత్రమే నమోదు చేసింది. ఇది ప్రారంభ డిమాండ్ సంకేతాలు, వాస్తవ అమ్మకాల మధ్య అంతరాన్ని స్పష్టంగా హైలైట్ చేస్తుంది. మరోవైపు స్థానికంగా అసెంబుల్ చేసిన ఐఎక్స్1 మోడల్ కారణంగా బీఎండబ్ల్యూ ఏజీ ఇండియన్ యూనిట్ అమ్మకాలు గత సంవత్సరం దాదాపు 200% పెరిగాని చెబుతున్నారు.

ఫలితంగా.. అమ్మకాలు 3,700 వాహనాలకు చేరుకున్నాయని కంపెనీ ఇండియా హెడ్ హర్దీప్ సింగ్ బ్రార్ ఒక ఇంటర్వ్యూలో తెలిపారు. అదే విధంగా.. చైనాకు చెందిన బీవైడీ కూడా విస్తృత శ్రేణి ధరలను అందించడం, స్థానిక భాగస్వాములతో కలిసి పనిచేయడం ద్వారా గత సంవత్సరం 88% పెరిగి 5,400 కార్లకు చేరుకున్నాయని అంటున్నారు. దీంతో.. ఈ రెండు సంస్థల నుంచి టెస్లాకు భారీ పోటీ ఉందని, తాజా పరిస్థితికి అదే కారణమని చెబుతున్నారు.