ఎలాన్ మస్క్ 'టెస్లా'.. అమ్మకాలు ఢమాల్.. మూసుకోవాల్సిందే

ప్రపంచ ఎలక్ట్రిక్ వాహనాల (ఈవీ) రంగంలో అగ్రగామిగా నిలిచిన ఎలాన్ మస్క్ సంస్థ టెస్లా భారత్‌లోకి భారీ అంచనాల మధ్య అడుగుపెట్టినప్పటికీ, తొలి ఏడాదిలో ఆశించిన ఫలితాలను అందుకోలేకపోయినట్లు ఇండస్ట్రీ వర్గాలు చెబుతున్నాయి. భారత మార్కెట్‌లోకి టెస్లా అధికారికంగా ప్రవేశించి ఈ నెల 15తో ఏడాది పూర్తయింది. అయితే అత్యంత ప్రతిష్టాత్మకంగా భావించిన ఈ ఒక సంవత్సర కాలంలో కంపెనీ కేవలం 450 కార్లను మాత్రమే విక్రయించినట్లు సమాచారం. గ్లోబల్ మార్కెట్లను శాసిస్తున్న టెస్లాకు భారత మార్కెట్‌లో ఇలాంటి ఆరంభం లభించడం ఆటోమొబైల్ రంగాన్ని ఆశ్చర్యానికి గురిచేస్తోంది.

భారీ ధర.. మందగించిన అమ్మకాలు

టెస్లా భారత్‌లో ప్రస్తుతం మోడల్ ‘వై’ను మాత్రమే విక్రయిస్తోంది. ఈ ప్రీమియం మోడల్‌ను భారత వినియోగదారులకు అందుబాటులోకి తీసుకువచ్చినా.. అధిక ధర కారణంగా కొనుగోలుదారుల నుంచి ఆశించిన స్పందన లభించలేదని మార్కెట్ విశ్లేషకులు భావిస్తున్నారు. ప్రారంభ ధర ₹59.89 లక్షలు (ఎక్స్‌షోరూమ్)గా ఉండగా తగ్గించిన ధర ₹50.89 లక్షలుగా ఉంది. భారత్‌లో అమ్మకాలు ఆశించిన స్థాయిలో సాగకపోవడంతో మే 2026లో కంపెనీ ఏకంగా రూ. 9 లక్షల వరకు ధరను తగ్గించింది. అయినప్పటికీ విక్రయాల్లో పెద్దగా పురోగతి కనిపించలేదని మార్కెట్ వర్గాల ద్వారా తెలుస్తోంది.

టెస్లాకు సవాల్‌గా మారిన అంశాలు

టెస్లా విక్రయాలు ఊపందుకోకపోవడానికి ఆటోమొబైల్ నిపుణులు పలు ప్రధాన కారణాలను విశ్లేషిస్తున్నారు. భారత్‌లో ప్రస్తుతం టెస్లా వాహనాలను పూర్తిగా విదేశాల నుండి దిగుమతి చేసుకుని విక్రయిస్తున్నారు. దీనివల్ల పన్నుల భారం పడి వాహనాల ధరలు సామాన్యులకు, మధ్యతరగతికి అందనంత ఎత్తుకు చేరాయి. భారత ఈవీ మార్కెట్‌లో ఇప్పటికే టాటా మోటార్స్, మహీంద్రా, ఎంజీ మోటార్, బీవైడీ వంటి కంపెనీలు విభిన్న ధరల శ్రేణిలో బడ్జెట్ ఫ్రెండ్లీ నుండి ప్రీమియం వరకు కార్లను అందుబాటులో ఉంచాయి. ఇది టెస్లాకు పెద్ద సవాల్‌గా మారింది. భారత వినియోగదారులు ధరకు ఎక్కువ ప్రాధాన్యం ఇవ్వడంతో పాటు విస్తృత సర్వీస్ నెట్‌వర్క్, ఛార్జింగ్ మౌలిక వసతులు, విడిభాగాల లభ్యతను కీలకంగా పరిగణిస్తారు. ఈ విషయాల్లో దేశీయ సంస్థలకు ఉన్న పట్టు టెస్లాకు ఇంకా లభించలేదు.

భవిష్యత్తు వ్యూహంపైనే ఆశలు

భారత ఈవీ మార్కెట్ చాలా వైవిధ్యమైనది. ఇక్కడ కేవలం బ్రాండ్ ఇమేజ్ మాత్రమే సరిపోదు, స్థానిక పరిస్థితులకు అనుగుణంగా వ్యూహాలు మార్చుకోవాలని ఆటోమొబైల్ నిపుణులు హెచ్చరిస్తున్నారు.

తొలి ఏడాది నిరాశపరిచినప్పటికీ భారత మార్కెట్‌ను టెస్లా దీర్ఘకాలిక అవకాశాల దృష్ట్యా ఎంతో కీలకంగా చూస్తోంది. భవిష్యత్తులో భారత్‌లోనే స్థానిక తయారీ యూనిట్ ఏర్పాటు చేయడం లేదా భారత్ కోసమే ప్రత్యేకంగా తక్కువ ధర కలిగిన మరిన్ని మోడళ్లను ప్రవేశపెట్టడం ద్వారా ధరలను తగ్గించేందుకు మస్క్ బృందం యోచిస్తోంది.

మొత్తానికి ప్రపంచవ్యాప్తంగా సక్సెస్‌ఫుల్ ఈవీ బ్రాండ్‌గా పేరుగాంచిన టెస్లాకు భారత మార్కెట్‌లో తొలి ఏడాది మాత్రం 'స్పీడ్ బ్రేకర్' లాంటి అనుభవాన్నే మిగిల్చింది. రాబోయే రోజుల్లో స్థానిక ఉత్పత్తి, సరసమైన ధరలతో వస్తేనే టెస్లా ఇండియాలో దూసుకుపోయే అవకాశం ఉంది.