దీపావళికి కానుకే.. కార్లపై భారీ పన్ను కోతలు!

ఈ దీపావళికి ఆటోమొబైల్ కొనుగోలుదారులకు నిజంగా పండుగే! భారత ప్రభుత్వం జీఎస్టీ పద్ధతిలో విప్లవాత్మక మార్పులు తీసుకొచ్చేందుకు సిద్ధమవుతోంది. ఈ కొత్త విధానం అమలైతే, కార్ల ధరలు గణనీయంగా తగ్గే అవకాశం ఉంది. ముఖ్యంగా ఎస్‌యూవీల ధరలు భారీగా తగ్గనున్నాయి.

-కొత్త పన్ను నిర్మాణం: కీలక మార్పులు

ప్రస్తుతం కార్లపై 28% జీఎస్టీతో పాటు 1-22% పరిహార సెస్ వసూలు చేస్తున్నారు. ఈ విధానాన్ని సరళీకృతం చేస్తూ కేవలం రెండు పన్ను శ్రేణులను (5% మరియు 18%) మాత్రమే ఉంచాలని కేంద్రం యోచిస్తోంది. లగ్జరీ వస్తువులు, సిగరెట్ల వంటి "సిన్ గూడ్స్"పై మాత్రం 40% ప్రత్యేక పన్ను ఉంటుంది.

కొత్త ప్రతిపాదనల ప్రకారం, కొన్ని ముఖ్యమైన మార్పులివీ

చిన్న కార్లు: 1200cc లోపు ఇంజిన్ సామర్థ్యం గల కార్లు ఇప్పుడు 18% పన్ను పరిధిలోకి వస్తాయి. ఇంతకుముందు వాహనాల పొడవు, గ్రౌండ్ క్లియరెన్స్ వంటి క్లిష్టమైన కొలమానాలను పరిగణనలోకి తీసుకునేవారు. ఇకపై కేవలం ఇంజిన్ సామర్థ్యం ఒక్కటే ప్రమాణంగా ఉండనుంది. ఎస్‌యూవీల వర్గీకరణ ఇకపై రద్దవుతుంది. ప్రస్తుతం ఎస్‌యూవీలపై 50% వరకు పన్ను ఉన్నప్పటికీ, కొత్త విధానంలో అవి 18% శ్రేణిలోకి రావచ్చు. ఇది కొనుగోలుదారులకు భారీ ఊరట.

- ఎలక్ట్రిక్ వాహనాలు (ఈవీలు):

ఈవీలపై ప్రస్తుతం ఉన్న 5% జీఎస్టీ రాయితీ యథాతథంగా కొనసాగనుంది. ఈ నిర్ణయం ఎలక్ట్రిక్ మొబిలిటీని ప్రోత్సహించేందుకు దోహదపడుతుంది.

- ఎప్పటి నుంచి అమల్లోకి వస్తుంది?

ప్రధానమంత్రి నరేంద్ర మోదీ స్వాతంత్ర్య దినోత్సవ ప్రసంగంలో చెప్పినట్లుగా, ఈ కొత్త జీఎస్టీ విధానం 2025 దీపావళి నాటికి అమల్లోకి వస్తుందని కేంద్ర వర్గాలు చెబుతున్నాయి. దీనిపై ఆగస్టు 21న మంత్రుల బృందం చర్చించనుంది. వచ్చే నెలలో జీఎస్టీ కౌన్సిల్ తుది నిర్ణయం తీసుకునే అవకాశం ఉంది.

-వినియోగదారులపై ప్రభావం

ఈ పన్ను కోతలతో, చిన్న కార్లతో పాటు ముఖ్యంగా ఎస్‌యూవీల ధరలు భారీగా తగ్గనున్నాయి. ఇప్పటివరకు అధిక పన్నుల కారణంగా ఎస్‌యూవీ కొనడానికి వెనకడుగు వేసిన వారికి ఇది మంచి అవకాశం. ఈ మార్పుల వల్ల ఆటోమొబైల్ పరిశ్రమ కూడా ఊపందుకుంటుందని భావిస్తున్నారు. ఈ దీపావళి నిజంగానే డబుల్ ధమాకా కానుంది.