ఆ ఒక్క‌టే చిక్కు.. అది దాటితే కూట‌మిదే హ‌వా.. !

తాజాగా జ‌రిగిన స్థానిక‌, ప‌రిష‌త్ ఎన్నిక‌ల్లో కూట‌మి హ‌వాస్ప‌ష్టంగా క‌నిపించింది. అయితే.. ఈ దూకుడును వ‌చ్చే 2029 వ‌ర‌కు పార్టీలు కొన‌సాగించాలంటే.. మ‌రింత క‌ష్టించాల్సిన అవ‌స‌రం ఉంద‌న్న అభిప్రాయం వ్య‌క్త‌మ‌వుతోంది. ప్ర‌ధానంగా క్షేత్ర‌స్థాయిలో స‌మ‌న్వ‌య లోపం మూడు పార్టీల మ‌ధ్య క‌నిపించింది. దీనిని అధిగ‌మించేందుకు ఇప్ప‌టి నుంచే ప్ర‌య‌త్నాలుచేయాల్సి ఉంటుంద‌ని విశ్లేష‌కులు చెబుతున్నారు.

అస‌లు ప‌రిస్థితి ఏంటి..?

టీడీపీ, జనసేన, బీజేపీ కూటమి ప్రభావం ప్రస్తుతం చాలా బలంగా, ఆధిపత్య ధోరణితో కొనసాగుతోంది. తాజా స్థానిక సంస్థల ఎన్నికల ఫలితాలు కూటమి హవాను స్పష్టంగా తెలియజేస్తున్నాయి: పట్టణ స్థానిక సంస్థల ఎన్నికల్లో కూటమి తిరుగులేని విజయం సాధించింది. టీడీపీ 59 మున్సిపాలిటీలు/కార్పొరేషన్లను గెలుచుకోగా, జనసేన పార్టీ అద్భుతమైన స్ట్రైక్ రేట్‌ను ప్రదర్శించింది. ప్రతిపక్ష వైసీపీ కేవలం 3 మున్సిపాలిటీలకే పరిమితమైంది.

జడ్పీటీసీ, ఎంపీటీసీ ఎన్నికల్లోనూ కూటమి సునామీ సృష్టించింది. మొత్తం జ‌డ్‌పీటీసీ స్థానాల్లో టీడీపీ 229, జనసేన 36, బీజేపీ 8 స్థానాల్లో గెలుపొందగా.. వైసీపీ కేవలం 20 స్థానాలకే పరిమితమైంది. ఎంపీటీసీ స్థానాల్లోనూ టీడీపీ 4,823, జనసేన 644, బీజేపీ 130 స్థానాలు సాధించగా, వైసీపీ 1,711 స్థానాలు మాత్రమే దక్కించుకోగలిగింది. పులివెందుల వంటి వైఎస్సార్సీపీకి బలమైన కంచుకోటల్లోనూ కూటమి సత్తా చాటింది.

అయితే.. ఈ ఫ‌లితం వ‌చ్చే ఎన్నిక‌ల వ‌ర‌కు కొన‌సాగాలంటే.. సమన్వయ సవాళ్లను అధిగ‌మించాల్సి ఉంటుంది. రాష్ట్ర స్థాయిలో ప్రభుత్వ పాలన, మౌలిక సదుపాయాల అభివృద్ధిపై దృష్టి సారిస్తున్నప్పటికీ, క్షేత్రస్థాయిలో సీట్ల సర్దుబాటు విషయంలో టీడీపీ, జనసేన మధ్య చిన్నచిన్న విభేదాలు, స్థానిక సమస్యలు తలెత్తుతున్నాయి. ఎన్నికల ఫలితాల్లో కూటమి ఏకతాటిపై నిలిచి విజయం సాధిస్తుంద‌ని.. వైసీపీకి ఒక్క చోట కూడా విజ‌యం ద‌క్క‌ద‌ని అనుకున్నా.. ఇంత భారీ పోరులోనూ వైసీపీ గెలుపు గుర్రం ఎక్కింది. సో.. ఈ ప‌రిణామాల‌ను అంచ‌నా వేసుకుని స‌మ‌న్వ‌య స‌మ‌స్య‌లు అధిగ‌మించాల్సి ఉంటుంద‌ని అంటున్నారు.