'బాహుబ‌లులు' కూడా బ‌ల‌హీన‌మ‌య్యారే..!

వైసీపీలో బాహుబ‌లి నాయ‌కులుగా పేరున్న వారు కూడా ప‌రిష‌త్ ఎన్నిక‌ల్లో కుదేల‌య్యారు. ముఖ్యంగా ఉత్త‌రాంధ్ర కు చెందిన వారిలో రాష్ట్ర‌స్థాయి నాయ‌కులు, మాజీ మంత్రులు చాలా మంది ఉన్నారు. వీరిలో బొత్స స‌త్య‌నారాయ ణ, ధ‌ర్మాన ప్ర‌సాద‌రావు, కృష్ణ‌దాస్ వంటి హేమాహేమీ నాయ‌కులు ఉన్నారు. అలానే.. మాజీ స్పీక‌ర్ తమ్మినేని సీతారాం వంటి ఆలోచ‌నా ప‌రులు, దురంధరులు కూడా వైసీపీ సొంతం. అయిన‌ప్ప‌టికీ.. శ్రీకాకుళం, విజ‌య‌న‌గ‌రం రెండు జిల్లాల్లో వైసీపీకి మెరుగైన ప‌రిస్థితి క‌నిపించ‌క‌పోగా.. బొత్స వార‌సురాలు అనూష సైతం ప‌రాజ‌యం పాల‌య్యారు.

ఏంటి కార‌ణం..?

1) పాత త‌ప్పులు మ‌రువ‌ని జ‌నం

గత వైసీపీ ప్రభుత్వ కాలంలో గ్రామీణ, పట్టణ స్థాయిల్లోని సర్పంచులు, ఎంపీటీసీలు, వార్డు సభ్యుల కంటే వాలంటీర్ వ్యవస్థకే ఎక్కువ ప్రాధాన్యత లభించిందనే అసంతృప్తి క్యాడర్‌లో బలంగా ఉండిపోయింది. దీనికి తోడు స్థానిక సంస్థల పరిధిలో పనులు చేసిన కాంట్రాక్టర్లు, స్థానిక నాయకులకు బిల్లులు సకాలంలో చెల్లించకపోవడంతో వారు ఆర్థిక ఇబ్బందులు ఎదుర్కొన్నారు. ఇది ఎన్నికల సమయంలో వారి పనితీరుపై తీవ్ర ప్రభావం చూపింది.

2) అభ్యర్థుల ఎంపికలో లోపాలు

స్థానిక సంస్థల ఎన్నికలను పార్టీ అగ్రనాయకత్వం అంత సీరియస్‌గా తీసుకోలేదనే విమర్శ ఉంది. చాలా చోట్ల అర్హత, స్థానిక బలం లేని వారికి టిక్కెట్లు కేటాయించారని విశ్లేషకులు భావిస్తున్నారు. గెలుపు కోసం వ్యూహాలు రచించాల్సిన నియోజకవర్గ ఇన్ఛార్జ్‌లు, ముఖ్య నాయకులు ధ‌ర్మాన‌, బొత్స వంటి వారు సొంతంగా ఖర్చు పెట్టడానికి వెనుకడుగు వేసి చేతులెత్తేయడం అభ్యర్థుల ఓటమికి దారితీసిందనే చ‌ర్చ న‌డుస్తోంది.

3) పార్టీ నేతల రాజీనామాలు

స్థానిక ఎన్నికల నోటిఫికేషన్ వచ్చిన నాటి నుండి విజయనగరం, శ్రీకాకుళం జిల్లాల్లో వైసీపీకి చెందిన పలువురు కీలక నేతలు, ద్వితీయ శ్రేణి నాయకులు పార్టీకి రాజీనామా చేసి అధికార కూటమిలో చేరిపోయ‌రు. మ‌రికొంద‌రు మౌనంగా ఉండి పోయారు. దీంతో పార్టీ కేడర్ నైతికంగా బలహీనపడింది. మ‌రోవైపు టీడీపీ-జనసేన-బీజేపీ కూటమి ప్రభుత్వం అధికారంలోకి వచ్చిన రెండున్నరేళ్లలోనే ఈ ఎన్నికలు జరగడం వల్ల సహజంగానే ఓటర్లు అధికార పార్టీ వైపు మొగ్గు చూపారు. కూటమి నేతలు పూర్తి అంగబలం, అర్థబలాన్ని ఉపయోగించి వ్యూహాత్మకంగా వ్యవహరించారు.

ఎవ‌రికి న‌ష్టం..

శ్రీకాకుళం, విజ‌య‌న‌గ‌రం జిల్లాల్లో వైసీపీ ప‌రాజ‌యం పాల‌వ‌డానికి కార‌ణాలు ఎలా ఉన్నా.. ఈ ప‌రిణామాలు.. ముఖ్య నేత‌ల‌కు పెద్ద స‌మ‌స్య‌గా మార‌నుంది. వ‌చ్చే అసెంబ్లీ ఎన్నిక‌ల నాటికి.. క్షేత్ర‌స్థాయిలో కేడ‌ర్ లేక‌పోతే.. ఇబ్బందులు ప‌డేది ఈ నేత‌లే. గెలుపు గుర్రం ఎక్కాల‌న్నా.. పార్టీలు గెల‌వాల‌న్నా.. స్థానిక పునాదులు బ‌లంగా ఉంటే త‌ప్ప జ‌ర‌గ‌దు. ఇప్పుడు అలాంటి బాహుబ‌లులే.. బ‌ల‌హీన‌మ‌య్యే ప‌రిస్థితివ‌చ్చింద‌ని అంటున్నారు ప‌రిశీల‌కులు.