వైసీపీ ఎలక్షన్స్ ను బాయ్ కాట్ చేస్తుందా? రేపు జగన్ నిర్ణయం?

ఏపీలో ‘టామ్ అండ్ జెర్రీ’ ఫైట్ నడుస్తోంది. గతంలో వైసీపీ అధికారంలో ఉంటే టీడీపీ నామినేషన్లు దాఖలు చేయడం గగనమయ్యేది. ఇప్పుడు టీడీపీ అధికారంలో వైసీపీకి అదే పరిస్థితి.. క్షేత్రస్థాయిలో ఉప్పు-నిప్పులాంటి ఈ రెండూ పార్టీల నేతల వైరాలు ఇప్పటివి కాదు.. మంత్రులు, ఎంపీ, ఎమ్మెల్యేలే స్వయంగా స్థానిక సమరంలో హల్ చల్ చేసిన సందర్భాలున్నాయి. ఎవరు అధికారంలో ఉన్నా ఇదీ రిపీట్ అవుతోంది. అధికార, ప్రతిపక్షాలకు భిన్నమైన సవాలు ఎదురవుతోంది. ఇప్పుడూ ఏపీలో అదే జరుగుతోంది...

ఆంధ్రప్రదేశ్ రాజకీయాలు మరోసారి తీవ్ర ఉత్కంఠభరితంగా మారాయి. నామినేషన్ల ఘట్టంలో అడ్డంకులు, అధికార యంత్రాంగం దుర్వినియోగంపై తీవ్ర ఆగ్రహంతో ఉన్న వైఎస్సార్ కాంగ్రెస్ పార్టీ కీలక నిర్ణయానికి సిద్ధమవుతోంది. స్థానిక సంస్థల ఎన్నికల ప్రక్రియలో అధికార పక్షం వేధింపులకు పాల్పడుతోందంటూ మండిపడుతున్న వైఎస్సార్ కాంగ్రెస్ పార్టీ ఈ ఎన్నికలను బహిష్కరించే దిశగా తీవ్రంగా యోచిస్తున్నట్టు ప్రచారం సాగుతోంది.. ఈ క్రమంలోనే వైసీపీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి తన పులివెందుల పర్యటనను అత్యవసరంగా రద్దు చేసుకుని విజయవాడకు చేరుకుంటుండటం.. తాడేపల్లిలో పార్టీ ముఖ్య నేతలతో భేటీ అవుతుండటం రాష్ట్ర రాజకీయాల్లో సంచలనంగా మారింది.

ఆంధ్రప్రదేశ్ రాజకీయాల్లో వైఎస్సార్ కాంగ్రెస్ పార్టీకి సంబంధించి మరో కీలక పరిణామం చోటుచేసుకోబోతోందా? స్థానిక ఎన్నికల నేపథ్యంలో వైసీపీ అధినేత వైఎస్ జగన్‌మోహన్ రెడ్డి తీసుకోబోయే నిర్ణయంపై రాజకీయ వర్గాల్లో ఉత్కంఠ నెలకొంది. పులివెందుల పర్యటనను రద్దు చేసుకుని.. బెంగళూరు నుంచి నేరుగా విజయవాడకు రావాలని జగన్ నిర్ణయించుకున్నట్లు వస్తున్న సమాచారం ఇప్పుడు రాజకీయంగా చర్చనీయాంశంగా మారింది. తాడేపల్లిలోని తన నివాసంలో పార్టీ ముఖ్య నేతలతో ఆయన అత్యవసర సమావేశం నిర్వహించనున్నట్లు తెలుస్తోంది.

స్థానిక ఎన్నికలపై జగన్ కీలక నిర్ణయం తీసుకుంటారా?

రాష్ట్రంలో స్థానిక ఎన్నికల నిర్వహణకు సంబంధించి రాజకీయ వాతావరణం వేడెక్కుతోంది. ఈ ఎన్నికల్లో వైసీపీ నాయకులు, కార్యకర్తలు నామినేషన్లు దాఖలు చేయకుండా అడ్డంకులు సృష్టిస్తున్నారని జగన్ ఆరోపిస్తున్నారు. అధికార పార్టీ నేతలు, యంత్రాంగం తీరుపై వైసీపీ అభ్యంతరాలు వ్యక్తం చేస్తోంది. తమ పార్టీ అభ్యర్థులకు స్వేచ్ఛగా నామినేషన్లు వేసుకునే అవకాశం కల్పించాలని డిమాండ్ చేస్తోంది. ఈ నేపథ్యంలోనే జగన్ ఇప్పటికే గవర్నర్‌తో పాటు రాష్ట్ర ఎన్నికల సంఘానికి ఫిర్యాదు చేసినట్లు సమాచారం. ఎన్నికల ప్రక్రియలో తమ పార్టీకి ఎదురవుతున్న సమస్యలను సంబంధిత అధికారుల దృష్టికి తీసుకెళ్లిన వైసీపీ అధినేత తదుపరి కార్యాచరణపై దృష్టి సారించినట్లు తెలుస్తోంది.

పులివెందుల పర్యటన రద్దు.. విజయవాడకు జగన్

వాస్తవానికి జగన్ పులివెందుల పర్యటనకు వెళ్లాల్సి ఉండగా.. ఆ పర్యటనను రద్దు చేసుకుని బెంగళూరు నుంచి నేరుగా విజయవాడకు చేరుకోవాలని నిర్ణయించుకున్నట్లు సమాచారం. తాడేపల్లిలోని తన నివాసంలో పార్టీ నేతలతో అత్యవసరంగా సమావేశం ఏర్పాటు చేయడం ఈ పరిణామానికి మరింత ప్రాధాన్యం తీసుకొచ్చింది. ఈ సమావేశంలో స్థానిక ఎన్నికల్లో పార్టీ అనుసరించాల్సిన వ్యూహం.. నామినేషన్ల ప్రక్రియలో ఎదురవుతున్న ఇబ్బందులు.. ఎన్నికల సంఘానికి చేసిన ఫిర్యాదులపై చర్చించే అవకాశం ఉంది. పార్టీ ముఖ్య నేతల అభిప్రాయాలను తీసుకున్న తర్వాత జగన్ కీలక ప్రకటన చేసే అవకాశముందనే చర్చ రాజకీయ వర్గాల్లో సాగుతోంది.

ఎన్నికల బహిష్కరణ దిశగా వైసీపీ అడుగులు వేస్తుందా?

స్థానిక ఎన్నికల్లో వైసీపీ పోటీ చేస్తుందా? లేక ఎన్నికల ప్రక్రియపై అభ్యంతరాలు వ్యక్తం చేస్తూ బహిష్కరణ దిశగా నిర్ణయం తీసుకుంటుందా? అన్న ప్రశ్నలు ఇప్పుడు ఆసక్తిని రేకెత్తిస్తున్నాయి. నామినేషన్లు దాఖలు చేయకుండా అడ్డుకుంటున్నారన్న ఆరోపణల నేపథ్యంలో వైఎస్ జగన్ ఎలాంటి వైఖరి తీసుకుంటారన్నది కీలకంగా మారింది. జగన్ విజయవాడ పర్యటనలో పార్టీ నేతలతో సమావేశం అనంతరం మాత్రమే ఈ అంశంపై స్పష్టత వచ్చే అవకాశం ఉంది.

మరోవైపు ఎన్నికలు బహిష్కరిస్తే మాత్రం.. బలమైన కేడర్, పార్టీ కార్యకర్తలు ఉన్న వైసీపీకి ఇది భారీ దెబ్బగా మారనుంది. క్షేత్ర స్థాయిలో నేతలు వైదొలుగుతారా? నిలబడుతారా? ఈ పరిణామం రాష్ట్ర రాజకీయాల్లో ఎలాంటి ప్రభావం చూపుతుందన్నది కూడా చర్చనీయాంశంగా మారింది. ఎన్నికల బరిలో నిలవాలా? లేక ప్రస్తుత పరిస్థితులపై పోరాటాన్ని మరింత ఉధృతం చేయాలా? అనే అంశాలపై జగన్ తీసుకునే నిర్ణయం పార్టీ భవిష్యత్ కార్యాచరణకు దిశానిర్దేశం చేయవచ్చు. దీంతో రేపు విజయవాడలో జరగనున్న సమావేశం, అనంతరం వెలువడే ప్రకటనపై వైసీపీ శ్రేణులతో పాటు రాజకీయ వర్గాలు ఆసక్తిగా ఎదురుచూస్తున్నాయి.