అమెరికా తలుపులు మూస్తే.. భారత్‌కు కొత్త అవకాశాలు

అమెరికాలో గ్రీన్‌కార్డుల ప్రక్రియపై ఆంక్షలు.. భారతీయ ఐటీ నిపుణుల్లో ఆందోళన... కానీ ఈ పరిణామమే భారత్‌కు వరంగా మారుతుందా? స్వదేశానికి తిరిగి వచ్చి దేశ నిర్మాణంలో భాగస్వాములు కావాలని జోహో సహ వ్యవస్థాపకుడు శ్రీధర్ వెంబు పిలుపునివ్వగా.. కర్ణాటక ఐటీ మంత్రి ప్రియాంక్ ఖర్గే ఈ పరిణామాల్లో దేశీయ ఐటీ రంగానికి కొత్త అవకాశాలను చూస్తున్నారు. సంక్షోభాలను అవకాశాలుగా మలుచుకోవాలని వీరిద్దరూ పిలుపునివ్వడం విశేషం.

అమెరికాలో అనిశ్చితి.. భారతీయ ప్రతిభకు పరీక్ష

అమెరికా ఐటీ రంగంలో భారతీయుల పాత్ర గురించి ప్రత్యేకంగా చెప్పాల్సిన అవసరం లేదు. సాఫ్ట్‌వేర్ ఇంజినీర్ల నుంచి ఉన్నత స్థాయి టెక్నాలజీ నిపుణుల వరకు ఎంతోమంది భారతీయులు అమెరికా టెక్ పరిశ్రమ అభివృద్ధిలో కీలక పాత్ర పోషిస్తున్నారు. ప్రపంచ ప్రఖ్యాత కంపెనీల్లో నాయకత్వ స్థానాలను కూడా దక్కించుకున్నారు. అయితే ఇప్పుడు అదే భారతీయ ప్రతిభకు అమెరికాలో అనిశ్చిత పరిస్థితులు ఎదురవుతున్నాయి.

హెచ్‌-1బీ వీసాలపై ఆధారపడి పనిచేస్తున్న విదేశీ ఉద్యోగులకు ఉపాధి ఆధారిత గ్రీన్‌కార్డు ప్రక్రియలో కీలకమైన పర్మనెంట్ లేబర్ సర్టిఫికేషన్ (పీఈఆర్ఎం) కార్యక్రమంపై మైక్రోసాఫ్ట్, ఇన్ఫోసిస్, టీసీఎస్, హెచ్‌సీఎల్ వంటి సంస్థలకు సంబంధించి అమెరికా ప్రభుత్వం ఆంక్షలు విధించింది. ఈ పరిణామం అమెరికాలో స్థిరపడాలని ఆశిస్తున్న భారతీయ ఐటీ ఉద్యోగుల్లో ఆందోళనకు కారణమవుతోంది. అయితే ఈ పరిణామాన్ని కేవలం భారతీయ ఉద్యోగులకు ఎదురైన దెబ్బగా మాత్రమే చూడాలా? లేక భారత్‌లోనే ప్రపంచస్థాయి సాంకేతిక పరిశ్రమను నిర్మించుకునే అవకాశంగా మలుచుకోవాలా? ఇప్పుడు ఈ ప్రశ్న చర్చనీయాంశంగా మారింది.

‘తిరిగి రండి.. భారత్‌ను నిర్మిద్దాం’

అమెరికాలో భారతీయులకు ఎదురవుతున్న పరిస్థితుల నేపథ్యంలో జోహో సహ వ్యవస్థాపకుడు శ్రీధర్ వేము చేసిన వ్యాఖ్యలు ప్రాధాన్యం సంతరించుకున్నాయి. అమెరికా సాంకేతిక సామర్థ్యాన్ని పెంచడంలో భారతీయులు గణనీయమైన సేవలు అందించారని అయినప్పటికీ అమెరికాలోని ఒక వర్గం ఇకపై భారతీయులను కోరుకోవడం లేదని ఆయన అభిప్రాయపడ్డారు. ఈ పరిస్థితిని కొత్త భవిష్యత్తుకు నాందిగా చూడాలని పిలుపునిచ్చారు. భారతీయులు స్వదేశానికి తిరిగి వచ్చి దేశ నిర్మాణంలో భాగస్వాములు కావాలని కోరారు. శ్రీధర్ వెంబు పిలుపులో ప్రధానంగా కనిపిస్తున్నది కేవలం అమెరికాపై అసంతృప్తి కాదు. విదేశాల్లో సంపాదించిన సాంకేతిక పరిజ్ఞానం, అనుభవం, అంతర్జాతీయ వ్యాపార దృక్పథాన్ని భారత్ అభివృద్ధికి ఉపయోగించుకోవాలన్న ఆలోచన. భారతీయ నిపుణులు అమెరికాలో సాధించిన విజయాలను భారత్‌లోనూ పునరావృతం చేయగలిగితే దేశీయ టెక్నాలజీ రంగం మరింత బలోపేతమయ్యే అవకాశం ఉంది.

అయితే అమెరికాలో స్థిరపడిన వారంతా వెంటనే భారత్‌కు తిరిగి వస్తారని భావించడం వాస్తవికం కాదు. ఉద్యోగ భద్రత, కుటుంబ బాధ్యతలు, పిల్లల చదువులు, వేతనాలు, జీవన ప్రమాణాలు వంటి అంశాలు వారి నిర్ణయాలను ప్రభావితం చేస్తాయి. అందుకే తిరిగి రావాలనే పిలుపునకు సమాంతరంగా భారత్‌లో వారికి తగిన ఉద్యోగ అవకాశాలు, పరిశోధన వసతులు, పారితోషికాలు, వ్యాపార అనుకూల వాతావరణం కల్పించాల్సిన అవసరం ఉంది.

ప్రియాంక్ ఖర్గే చూస్తున్నది.. సంక్షోభంలో అవకాశం

కర్ణాటక ఐటీ మంత్రి ప్రియాంక్ ఖర్గే ఈ పరిణామాలను మరో కోణంలో విశ్లేషించారు. అమెరికా ప్రభుత్వం తీసుకున్న చర్యలు భారత ఐటీ రంగంపై సంక్లిష్టమైన, దీర్ఘకాలిక ప్రభావాలను చూపవచ్చని అభిప్రాయపడ్డారు. ముఖ్యంగా భారత్ నుంచి ఉద్యోగులను అమెరికాకు పంపించి అక్కడ కార్యకలాపాలు నిర్వహించే సంప్రదాయ ఐటీ ఔట్‌సోర్సింగ్ విధానంపై ఖర్చుల భారం పెరిగే అవకాశం ఉందని ఆయన పేర్కొన్నారు. అయితే ఇదే సమయంలో భారత్‌కు కొత్త అవకాశాలు కూడా ఏర్పడవచ్చని ఆయన ఆశాభావం వ్యక్తం చేశారు. అంతర్జాతీయ సంస్థలు తమ పరిశోధన, అభివృద్ధి, ఇంజినీరింగ్, ఉత్పత్తుల రూపకల్పనకు సంబంధించిన కార్యకలాపాలను భారత్‌లో విస్తరించే అవకాశం ఉందని భావిస్తున్నారు. గ్లోబల్ కేపబిలిటీ సెంటర్లు మరింత విస్తరించడం, భారతీయ నగరాలకు ప్రపంచస్థాయి పరిశోధన ప్రాజెక్టులు రావడం, ఉన్నత స్థాయి టెక్నాలజీ నిపుణులకు దేశీయంగా డిమాండ్ పెరగడం వంటి పరిణామాలు చోటుచేసుకోవచ్చని ఆయన అభిప్రాయం.

ఇప్పటివరకు భారతీయ ఉద్యోగులను అమెరికాకు పంపించి సేవలు అందించే విధానానికి ప్రాధాన్యం ఇచ్చిన సంస్థలు, మారుతున్న పరిస్థితులకు అనుగుణంగా భారత్‌లోనే మరిన్ని కార్యకలాపాలు నిర్వహించే దిశగా ఆలోచించవచ్చు. అదే జరిగితే భారతీయ ఉద్యోగులకు స్వదేశంలోనే అంతర్జాతీయ స్థాయి ప్రాజెక్టులపై పనిచేసే అవకాశాలు పెరగవచ్చు.

అమెరికా సమస్య.. భారత్‌కు వరమవుతుందా?

అమెరికాలో గ్రీన్‌కార్డు ప్రక్రియ కఠినతరం కావడం వల్ల కంపెనీలు తమ కార్యకలాపాలను భారత్‌కు తరలిస్తాయని ఇప్పుడే నిర్ధారించలేం. గ్రీన్‌కార్డు అనేది శాశ్వత నివాస హోదాకు సంబంధించిన ప్రక్రియ కాగా, కంపెనీల పెట్టుబడులు, పరిశోధన కేంద్రాల ఏర్పాటు, ఉద్యోగాల విస్తరణ అనేవి వ్యాపార నిర్ణయాలపై ఆధారపడి ఉంటాయి. అయినప్పటికీ అమెరికాలో ఉద్యోగులను నియమించుకోవడం.. అక్కడ కార్యకలాపాలు నిర్వహించడం ఖరీదైనదిగా మారితే కంపెనీలు ప్రత్యామ్నాయాలను పరిశీలించే అవకాశం ఉంది. నైపుణ్యం కలిగిన మానవ వనరులు, సాంకేతిక మౌలిక సదుపాయాలు, వ్యాపార వాతావరణం అనుకూలంగా ఉంటే భారత్‌కు పెట్టుబడులు, ప్రాజెక్టులు వచ్చే అవకాశాలు పెరుగుతాయి.

భారత్ ఇప్పటికే ప్రపంచ ఐటీ సేవల రంగంలో బలమైన స్థానాన్ని సంపాదించింది. ఇప్పుడు సేవలందించే కేంద్రంగా మాత్రమే కాకుండా కొత్త ఉత్పత్తులను అభివృద్ధి చేసే కేంద్రంగా కీలక పరిశోధనలు జరిగే ప్రాంతంగా.. ప్రపంచస్థాయి సాంకేతిక పరిష్కారాలు రూపొందించే దేశంగా ఎదగడం అత్యంత కీలకం.

అయితే ఈ మార్పు ఆటోమేటిక్ గా జరగదు. కంపెనీలు భారత్‌లో పెట్టుబడులు పెట్టాలంటే విధానపరమైన స్థిరత్వం, మెరుగైన పరిశోధన వసతులు, నైపుణ్యాభివృద్ధి, మేధో సంపత్తి రక్షణ, వ్యాపార నిర్వహణలో సౌలభ్యం వంటి అంశాలు కీలకం. వీటిని బలోపేతం చేయగలిగితేనే అమెరికాలో ఏర్పడుతున్న అనిశ్చితిని భారత్ తనకు అనుకూలంగా మార్చుకోగలదు.

గతంలో ఖర్చులు తగ్గించుకోవడం కోసం భారత్‌లో కార్యకలాపాలు నిర్వహించిన కంపెనీలు, ఇప్పుడు కీలకమైన ఉత్పత్తుల అభివృద్ధి, పరిశోధన, వ్యూహాత్మక నిర్ణయాలకు సంబంధించిన పనులను కూడా ఇక్కడికి విస్తరించే అవకాశం ఉంది. అదే జరిగితే సాధారణ ఐటీ ఉద్యోగాలతో పాటు ఉన్నత స్థాయి సాంకేతిక ఉద్యోగాలు కూడా పెరగవచ్చు.

ఇది భారతీయ నిపుణులకు మరో ప్రయోజనాన్ని అందించగలదు. విదేశాలకు వెళ్లకుండానే అంతర్జాతీయ కంపెనీలతో పనిచేయడం, ప్రపంచ మార్కెట్ల కోసం ఉత్పత్తులను అభివృద్ధి చేయడం, నాయకత్వ స్థానాలకు ఎదగడం సాధ్యమవుతుంది. ముఖ్యంగా బెంగళూరు, హైదరాబాద్, చెన్నై, పుణె వంటి టెక్నాలజీ కేంద్రాలకు కొత్త అవకాశాలు లభించవచ్చు. అయితే ఏ నగరానికి ఎంత పెట్టుబడి వస్తుందన్నది కంపెనీల నిర్ణయాలపైనే ఆధారపడి ఉంటుంది.

వలసల నుంచి స్వదేశీ ఆవిష్కరణల దిశగా..

శ్రీధర్ వేము పిలుపు, ప్రియాంక్ ఖర్గే వ్యాఖ్యలు రెండూ వేర్వేరు కోణాల్లో ఉన్నప్పటికీ వాటి మధ్య ఒక ఉమ్మడి అంశం ఉంది. విదేశాల్లో భారతీయులు సాధించిన ప్రతిభను దేశీయ అభివృద్ధికి ఉపయోగించుకోవడం. ఒకవైపు అమెరికాలో గ్రీన్‌కార్డు ప్రక్రియపై ఆంక్షలు భారతీయ ఉద్యోగుల భవిష్యత్తుపై అనిశ్చితిని పెంచుతున్నాయి. మరోవైపు అదే పరిస్థితి భారత్‌లో ఉన్నత స్థాయి ఉద్యోగాలు, పరిశోధన, ఉత్పత్తుల అభివృద్ధి, పెట్టుబడులను పెంచుకోవాల్సిన అవసరాన్ని గుర్తుచేస్తోంది.

అయితే భారతదేశం దీనిని నిజమైన అవకాశంగా మార్చుకోవాలంటే కేవలం విదేశాల నుంచి తిరిగి వచ్చే ఉద్యోగులపై ఆధారపడకూడదు. దేశంలోనే ప్రతిభను అభివృద్ధి చేయాలి. స్టార్టప్‌లకు ప్రోత్సాహం అందించాలి. పరిశోధనలకు పెట్టుబడులు పెంచాలి. ప్రపంచ మార్కెట్లలో పోటీపడగల భారతీయ ఉత్పత్తులు, సాంకేతిక పరిష్కారాలు అభివృద్ధి చేయాలి.

అమెరికాలో మారుతున్న వీసా, గ్రీన్‌కార్డు పరిస్థితులు భారతీయ ఐటీ నిపుణులకు సవాళ్లను విసురుతున్న మాట వాస్తవం. కానీ ఆ సవాళ్లను భారత్‌లో కొత్త అవకాశాలుగా మార్చుకోవడం దేశ విధాన నిర్ణేతలు, ఐటీ కంపెనీలు, పారిశ్రామికవేత్తల చేతుల్లో ఉంది. శ్రీధర్ వెంబు పిలుపు ప్రతిభను స్వదేశానికి ఆహ్వానిస్తుంటే ప్రియాంక్ ఖర్గే వ్యాఖ్యలు ఆ ప్రతిభకు దేశంలోనే అవకాశాలు కల్పించాల్సిన అవసరాన్ని గుర్తుచేస్తున్నాయి. అమెరికాలో అవకాశాలు తగ్గితే భారత్‌లో ప్రత్యామ్నాయాలు పెరగాలి. అప్పుడే ఈ పరిణామం భారత ఐటీ రంగానికి నిజమైన మలుపుగా మారుతుంది.