భారత్ కు పుతిన్... వెంట టాయిలెట్ తో పాటు ఏమేమి తెచ్చుకుంటారంటే..!

రష్యా అధ్యక్షుడు వ్లాదిమిర్ పుతిన్ అతి త్వరలో భారత్ లో పర్యటించనున్న సంగతి తెలిసిందే. ఈ సమయంలో... ఆయన భద్రతకు సంబంధించి అనేక వస్తువులను తనతో తీసుకెళ్తారు. ఇందులో ఓ పోర్టబుల్ ల్యాబ్ తో పాటు టాయిలెట్ కూడా ఉండటం గమనార్హం. ఇదే సమయంలో.. రష్యా భద్రత సంస్థ నుంచి ఒక బృందం ఇప్పటికే భారత్ కు చేరుకుందని తెలుస్తోంది. ఈ సమయంలో.. ఆయన భద్రత చర్యల గురించి పలు కీలక విషయాలు తెలుసుకుందామ్..!

అవును... రష్యా అధ్యక్షుడు వ్లాదిమిర్ పుతిన్ ఈ నెల 4 - 5 తేదీలలో భారతదేశాన్ని సందర్శించనున్నారు. ఈ పర్యటన కోసం ఇప్పటికే గట్టి భద్రతా ఏర్పాట్లు చేశారు. సహజంగానే పుతిన్ వంటి శక్తివంతమైన నాయకుడికి భద్రతా ఏర్పాట్లు చాలా కఠినంగా ఉంటాయి. వాస్తవానికి ఏ దేశాధినేత అయినా మరో దేశాన్ని సందర్శించినప్పుడు ప్రత్యేక భద్రతా ప్రోటోకాల్ ఉంటుంది. అయితే.. రష్యా అధ్యక్షుడి విషయంలో ఇది మరింత భిన్నంగా ఉంటుందనే చెప్పాలి.

ఇందులో భాగంగా... ది మాస్కో టైమ్స్ నివేదిక ప్రకారం... పుతిన్ ఎక్కడకు వెళ్లినా అతని అదృశ్య సైన్యం ఆ దేశంలో లేదా ఆ ప్రాంతంలో ముందుగానే మొహరించబడుతుంది. ఈ సైన్యం అక్కడి సామాన్య ప్రజలతో, స్థానిక వాతావరణంతో కలిసిపోతుంది. ఈ సమయంలో పుతిన్ ప్రత్యేక భద్రతా బృందం.. అతని జీవితంలోని దాదాపు ప్రతీ అంశాన్ని పరిశీలిస్తాయి, నియంత్రిస్తాయి. ఇందులో అతను తీసుకునే ఆహారం నుంచి, విసర్జించే వ్యర్ధాల వరకూ ఉంటాయి!

పోర్టబుల్ ప్రయోగశాల!:

పుతిన్ ఆహారాన్ని పరీక్షించడానికి ఆయనతో పాటు ఓ పోర్టబుల్ ప్రయోగశాల కూడా ఉంటుంది. ఆయన తినే ఆహారంలో, తాగే పానియాల్లో విషం ఏమైనా కలిసిందా అనే విషయాన్ని ఈ పోర్టబుల్ ప్రయోగశాలను ఉపయోగించి తెలుసుకుంటారు. పుతిన్ దేశం లోపల, బయట ప్రయాణించినప్పుడల్లా.. అతని కాన్వాయ్ తో పాటు ఈ పోర్టబుల్ ప్రయోగశాల ప్రయాణిస్తుంది. ఇందులో పరీక్షించిన తర్వాతే పుతిన్ ఆహారాన్ని తీసుకుంటారు.

రష్యా నుంచే కిరాణా, నీరు!:

ఇదే క్రమంలో... పుతిన్ ఎక్కడకు వెళ్లినా అతనితో పాటు వ్యకిగత వంట మనిషి ఉంటారు. పుతిన్ ఏ దేశంలో పర్యటించినా.. తన వ్యక్తిగత వంట మనిషి చేసిన ఆహారాన్ని మాత్రమే తింటారు. ఈ ఆహారాన్ని కుడా ముందుగా పోర్టబుల్ ప్రయోగశాలలో పరీక్షిస్తారు. ఇదే సమయంలో.. ఆయన ఆహారాన్ని తయారు చేసే కిరాణా సామాగ్రిని రష్యా నుంచే తెస్తారు. ఓ ప్రత్యేక బృందం ఆయన ఆహారంతో పాటు పానియాలను ఏర్పాటు చేస్తుంది. వీటితో పాటు నీరు కూడా తీసుకెళ్తారు!

పోర్టబుల్ టాయిలెట్!:

ఇదే సమయంలో రష్యా అధ్యక్షుడి వెంట ఆహారం, పానియాలు, ప్రయోగశాలతో పాటు ఒక పోర్టబుల్ టాయిలెట్ ను కూడా తీసుకెళ్తారు. తన శారీరక వ్యర్థాలను మరో దేశంలో వదిలివేయకుండా చూసుకోవడానికి ఈ టాయిలెట్ ను వెంట తెచ్చుకుంటారు. ప్రధానంగా.. అధ్యక్షుడికి చెందిన ఏదైనా బయట వదిలేస్తే.. దాన్ని పరీక్షించి అతని ఆరోగ్యం గురించి ఏదైనా సమాచారం తెలుసుకుంటారేమో అని ఈ జాగ్రత్త అని చెబుతున్నారు!