తెర వెనుక ‘కింగ్ మేకర్’.. తెర పైకి వస్తే ‘కింగ్’ అవుతారా? బరిలో ‘పీకే ’

ఇన్నాళ్లూ తెర వెనుక కూర్చుని.. ఏ పార్టీకి ఎలాంటి మసాలా దట్టించాలో ఏ నాయకుడిని ఎలా ప్రొజెక్ట్ చేయాలో పక్కా ప్లాన్లు గీసిన ‘పొలిటికల్ సైంటిస్ట్’ ప్రశాంత్ కిశోర్ (పీకే) గారికి ఎట్టకేలకు ఒక ఐడియా వచ్చింది. "ఎంతకాలం పక్కనోళ్లను గెలిపించి వాళ్ల చేత దండలు వేయించుకోవడం.. ఈసారి మనమే డైరెక్ట్‌గా రంగంలోకి దిగితే పోలా?" అనుకున్నారో ఏమో.. మొత్తానికి ‘జన్ సురాజ్’ అధినేత స్వయంగా బరిలోకి దిగుతున్నారు. బిహార్‌లోని బంకీపూర్ అసెంబ్లీ ఉపఎన్నికలో తానే స్వయంగా పోటీ చేస్తున్నట్లు ప్రకటించి పొలిటికల్ సర్కిల్స్‌లో పెద్ద బాంబే పేల్చారు.

ఐడియాలు బాగానే ఉన్నాయి.. కానీ ఓట్లు ఎక్కడ బాసూ?

గత ఏడాది 2025 బిహార్ అసెంబ్లీ ఎన్నికల్లో పీకే గారు రాష్ట్రమంతా తిరిగి, మేధావులను వెతికి పట్టుకుని మరీ తన ‘జన్ సురాజ్’ తరఫున సీట్లు ఇచ్చారు. "మేం డిఫరెంట్.. మా రూటే సెపరేట్" అన్నారు. తీరా చూస్తే రిజల్ట్స్ రోజున ఒక్క సీటు అంటే ఒక్క సీటు కూడా రాలేదు. అప్పుడు అర్థమైంది పీకే గారికి వ్యూహాలు వేయడం వేరు.. జనం దగ్గరికి వెళ్లి ‘ఓటెయ్యండి బాబూ’ అని అడగడం వేరని!

అప్పట్లో తను వెనుక ఉండి నడిపించారు కాబట్టి సరిపోయింది, "మరి ఇప్పుడు పీకే గారే స్వయంగా నిలబడితే పరిస్థితి ఏంటి?" అనేదే మిలియన్ డాలర్ల ప్రశ్న. వ్యూహకర్తగా వేరే వాళ్లకు ఐడియాలు ఇచ్చినప్పుడు వర్కవుట్ అయిన మ్యాజిక్.. తన సొంత ఎన్నికల్లో పని చేస్తుందా? లేక ‘డాక్టరే రోగిగా మారినట్టు’ అవుతుందా? అని జనం నవ్వుకుంటున్నారు.

టార్గెట్ బంకీపూర్.. మామూలు స్కెచ్ కాదు ఇది!

పీకే గారు పోటీ చేయడానికి ఎంచుకున్న బంకీపూర్ నియోజకవర్గం కూడా సాదాసీదాగా లేదు. అది బీజేపీకి కంచుకోట. అక్కడ నుంచి నితిన్ నబీన్ వరుసగా నాలుగు సార్లు ఎమ్మెల్యేగా గెలిచి, ఇప్పుడు ఏకంగా బీజేపీ జాతీయ అధ్యక్షుడిగా, రాజ్యసభ సభ్యుడిగా ప్రమోషన్ కొట్టేశారు. అంటే అంతటి గట్టి కోటలోకి మన పీకే గారు కత్తి పట్టుకుని దూకుతున్నారన్నమాట.

రాజకీయ విశ్లేషకుల పంచ్

"ఇన్నాళ్లూ క్లైంట్లకు గెలుపు గుర్రాలను ఎలా తొక్కాలో నేర్పిన పీకే.. ఇప్పుడు తనే గుర్రమెక్కి రేసులోకి వచ్చారు. ఇక్కడ ప్రత్యర్థులు కూడా వ్యూహాల్లో ఆరితేరిన వాళ్లే, చూద్దాం ఎవరి ప్లాన్ రివర్స్ అవుతుందో!"

ప్లస్ అవుతుందా.. మైనస్ అవుతుందా?

ఈ ఉపఎన్నిక జన్ సురాజ్ పార్టీకి లైఫ్ అండ్ డెత్ లాంటిది. ఒకవేళ గెలిస్తే "చూశారా నా పవర్.. నేను కింగ్ మేకర్‌ని మాత్రమే కాదు, కింగ్‌ని కూడా!" అని కాలర్ ఎగరేయొచ్చు. పార్టీకి ఓ రేంజ్ మైలేజ్ వస్తుంది. ఒకవేళ తేడా కొడితే "పక్కనోళ్లకు జాతకాలు చెప్పే సిద్ధాంతి గారి ఇల్లు కాలిపోయిందట" అన్నట్టు.. పీకే గారి పొలిటికల్ కెరీర్, ఆయన వ్యూహాల బ్రాండ్ వాల్యూ ఘోరంగా పడిపోయే ప్రమాదం ఉంది.

ఏది ఏమైనా ఈ నెల 30న జరిగే బంకీపూర్ జాతరలో పీకే గారి ‘పొలిటికల్ స్క్రీన్ ప్లే’ ఎంతవరకు పండుతుందో లేక జనం ఆయనకు ‘రిటర్న్ గిఫ్ట్’ ఇస్తారో చూడాలి. ఇప్పటికైతే థియేటర్లో సినిమా రసవత్తరంగా మారింది, క్లైమాక్స్ కోసం దేశమంతా వెయిటింగ్..