అక్టోబర్ 2.. ప్రధాని మోదీ సంచలన పిలుపు
దేశ ప్రజలు స్వయం సమృద్ధి సాధించి ‘వికసిత్ భారత్’ లక్ష్యాన్ని చేరుకోవాలంటే స్వదేశీ ఉత్పత్తుల వాడకానికి ప్రాధాన్యం ఇవ్వాలని ప్రధానమంత్రి నరేంద్ర మోదీ పిలుపునిచ్చారు.;
దేశ ప్రజలు స్వయం సమృద్ధి సాధించి ‘వికసిత్ భారత్’ లక్ష్యాన్ని చేరుకోవాలంటే స్వదేశీ ఉత్పత్తుల వాడకానికి ప్రాధాన్యం ఇవ్వాలని ప్రధానమంత్రి నరేంద్ర మోదీ పిలుపునిచ్చారు. ఆదివారం ప్రసారమైన మన్కీ బాత్ 126వ ఎపిసోడ్ లో ఆయన మాట్లాడుతూ, అక్టోబర్ 2న గాంధీ జయంతి సందర్భంగా అందరూ ఖాదీ వస్త్రాలను కొనుగోలు చేసి ధరించాలని కోరారు.
స్వదేశీపై గాంధీ ఆలోచనలకు ప్రాధాన్యం
స్వాతంత్ర్య పోరాటం కాలంలో మహాత్మా గాంధీ ఖాదీ, స్వదేశీ వస్తువుల ప్రాధాన్యతను ప్రజల్లో నాటారని మోదీ గుర్తు చేశారు. కాలక్రమంలో ఖాదీకి డిమాండ్ తగ్గినా, గత 11 ఏళ్లలో ఖాదీ ఉత్పత్తి గణనీయంగా పెరిగిందని తెలిపారు. ప్రపంచ ఆర్థిక రంగంలో ఉన్న అస్థిరత దృష్ట్యా మన దేశం కూడా స్వీయ ప్రయోజనాల కోసం స్వదేశీ ఉత్పత్తులను ప్రోత్సహించడం తప్పనిసరి అని అన్నారు.
రాజకీయ విభేదాలకతీతంగా ప్రజా విప్లవం
దేశీయ ఉత్పత్తుల వినియోగంపై రాజకీయ పార్టీలు విభేదాలను పక్కనబెట్టి దేశవ్యాప్త ఉద్యమానికి కట్టుబడి పని చేయాలని ప్రధాని సూచించారు. "మన దేశీయ వస్తువులు కొనుగోలు చేసి వాడటమే నిజమైన ఆర్థిక స్వాతంత్ర్యం" అని ఆయన నొక్కి చెప్పారు.
మహిళా నావికాదళ అధికారిణుల సాహసం
భారత నావికాదళానికి చెందిన ఇద్దరు అధికారిణులు — లెఫ్టినెంట్ కమాండర్ దిల్నా , లెఫ్టినెంట్ కమాండర్ రూపల ధైర్య సాహసాలను ప్రధాని మోదీ ప్రత్యేకంగా కొనియాడారు. సముద్ర గర్భంలో వారు చూపుతున్న పట్టుదల, ధైర్యం భారత మహిళల శక్తి, సామర్థ్యాలకు ప్రతీక అని ప్రశంసించారు. మన్కీ బాత్లో భాగంగా వారితో ఫోన్ ద్వారా కూడా మాట్లాడారు.
భగత్ సింగ్, లతా మంగేష్కర్కు నివాళి
దేశ స్వాతంత్ర్య సమరయోధుడు భగత్ సింగ్ జయంతి సందర్భంగా ఆయనను స్మరించుకున్నారు. ఉరి శిక్షకు ముందు భగత్ సింగ్ బ్రిటిష్ ప్రభుత్వానికి రాసిన లేఖలో తూటాలతో మరణదండన విధించాలని కోరిన విషయం ఆయన సాహసాన్ని ప్రతిబింబిస్తుందని మోదీ చెప్పారు. యువత ఆయనను ఆదర్శంగా తీసుకోవాలని సూచించారు.
అలాగే, భారతరత్న లతా మంగేష్కర్ జయంతి సందర్భంగా ఆమెను స్మరించారు. లతా గారి దేశభక్తి గీతాలు కోట్లాది భారతీయుల హృదయాలను కదిలించాయని, సంగీతం పట్ల ఆసక్తి ఉన్న ప్రతి ఒక్కరూ ఆమె గాత్రాన్ని విన్నపుడు మంత్రముగ్ధులవుతారని మోదీ అన్నారు.
గాంధీ జయంతి రోజున ఖాదీకి ప్రాధాన్యం ఇవ్వాలని, స్వదేశీ ఉత్పత్తుల వాడకంతో ఆర్థికంగా బలమైన భారత నిర్మాణంలో భాగస్వాములు కావాలని ప్రధాని మోదీ దేశ ప్రజలకు పిలుపునిచ్చారు.