దెయ్యాలు అనే అనుమానం? తల్లి, తమ్ముడి హత్య.. భీమవరంలో సంచలనం

మతిస్థిమితం లేని ఓ వ్యక్తి తన తల్లి, తమ్ముడిని హత్య చేశాడు. పైగా ఆ ఇద్దరిని పెద్ద దెయ్యాలుగా భావించి, వారిని చంపేసినట్లు పోలీసులకు ఫోన్ చేసి మరీ చెప్పాడు. పశ్చిమగోదావరి జిల్లా భీమవరంలో జరిగిన ఈ సంఘటన తీవ్ర కలకలం రేపింది. ‘‘నా తల్లి మహాలక్ష్మి, నా తమ్ముడు రవితేజ పెద్ద దెయ్యాలు, నా మనుసులో ఏమనుకున్నా వారికి తెలిసిపోతుంది. నన్ను పిచ్చివాడిని చేసి ఇంట్లో బంధించి బయటకు వెళ్లకుండా అడ్డుకుంటున్నారు. అందుకే వారిద్దరిని చాకుతో పొడిచేశా, వారి శరీరాలు చాలా గట్టివి. చాకు కూడా దిగడం లేదు. మళ్లీ ఇప్పుడు లేచి వస్తారేమో?’’ అంటూ నిందితుడు గునుపూటి శ్రీనివాస్ చెప్పిన మాటలతో పోలీసులు షాక్ తిన్నారు.

పశ్చిమగోదావరి జిల్లా భీమవరం పట్టణంలో సొంత తల్లి, తమ్ముడిని చంపేసినట్లు గునుపూటి శ్రీనివాస్ అనే నిందితుడు సోమవారం వేకువజామున ఉదయం 3 గంటల సమయంలో పోలీసులకు ఫోన్ ఫోన్ చేసి చెప్పాడు. పోలీస్ టోల్ ఫ్రీ 112కి కాల్ చేసిన నిందితుడు శ్రీనివాస్ తాను చాకుతో తల్లి మహాలక్ష్మి, తమ్ముడు రవితేజను హతమార్చినట్లు సమాచారమిచ్చాడు. తన ఇంటి అడ్రస్ ను కూడా పోలీసులకు తెలియజేయడంతో వారు షాక్ తిన్నారు. నిందితుడు ఇచ్చిన సమాచారంతో పోలీసులు ఆఘమేఘాలపై అక్కడికి చేరుకున్నారు.

పోలీసులు వెళ్లే సరికి రవితేజ, మహాలక్ష్మి రక్తపు మడుగులో ఉన్నారు. ఒక్కొక్కరి శరీరంపై 20 వరకు కత్తిపోట్లు ఉన్నాయి. అప్పటికే శ్రీనివాస్ మొదటి ఫ్లోర్ నుంచి కిందికి దిగి రోడ్డుపై ఉండటంతో పోలీసులు అతడిని అదుపులోకి తీసుకున్నారు. బంధవులు ఎవరూ స్పందించకపోవడంతో బెంగళూరులో ఉంటున్న హతురాలి కుమార్తెకు సమాచారం ఇచ్చారు. భీమవరం పట్టణంలోని రెస్ట్ హౌస్ రోడ్డు మన్నా చర్చి ఎదురుగా నివాసం ఉంటున్న గునుపూటి శ్రీరాములుకు భార్య, ఇద్దరు కుమారులు, ఒక కుమార్తె ఉన్నారు.

కుమార్తెకు వివాహమై బెంగళూరులో ఉండగా, శ్రీరాములు కరోనాతో గతంలోనే మరణించారు. ఈ కుటుంబం ఫైనాన్స్ వ్యాపారం చేస్తుంది. షాపులు, ఇంటి అద్దెలతో జీవనం సాగిస్తోంది. ఇటీవల పెద్దకుమారుడు శ్రీనివాస్ మతిభ్రమించినట్లు మాట్లాడుతుండటంతో ఇంట్లో నుంచి బయటకు వెళ్లకుండా చూస్తున్నారు. అప్పుడప్పుడు డబ్బుల విషయంలో అతడు తల్లి, తమ్ముడితో తగాదా పడుతున్నాడు. సోమవారం ఎవరూ ఊహించని విధంగా దురాగతానికి పాల్పడ్డాడని పోలీసులు తెలిపారు.