విమానాశ్రయంలో అనుమానిత వ్యక్తి.. ఆరా తీస్తే సంచలన నిజాలు.. 67 మంది మహిళల జీవితాలతో చలగాటం..!

బాలకృష్ణ అనే ఈ కిలాడీ చేసిన దారుణాలు వింటుంటే ఒళ్లు గగుర్పొడుస్తుంది. ఒక వ్యక్తి పోలీస్ యూనిఫాం వేసుకొని, విమానాశ్రయం లాంటి హై సెక్యూరిటీ జోన్‌లో తిరుగుతూ ఏకంగా 67 మంది మహిళల జీవితాలతో ఆడుకోవడం అనేది వ్యవస్థకే సవాలు. శ్రీకాకుళం జిల్లాకు చెందిన ఈ నిందితుడు పక్కాగా స్కెచ్ వేసి అమాయక యువతులను బలి తీసుకున్నాడు.

శంషాబాద్ ఎయిర్‌పోర్టులో అరెస్ట్! 

సమాజంలో మహిళల భద్రత కోసం పని చేయాల్సిన ఖాకీ దుస్తులను అడ్డుపెట్టుకొని, ఒక కామాంధుడు సాగించిన ఉదంతం ఇప్పుడు తెలుగు రాష్ట్రాల్లో సంచలనం సృష్టిస్తోంది. శ్రీకాకుళం జిల్లాకు చెందిన బాలకృష్ణ అనే వ్యక్తి, సీఐఎస్ఎఫ్ (CISF) అధికారిగా నటిస్తూ 67 మంది మహిళలను లైంగికంగా, ఆర్థికంగా దోపిడీ చేశాడు. అబద్ధాలతో కోటలు కట్టి, పెళ్లి పేరుతో యువతులకు వల వేసి వారి జీవితాలను చీకటి మయం చేసిన ఈ నిందితుడి ఉదంతం వెనుక ఉన్న భయంకరమైన నిజాలు ఇవీ..

విమానాశ్రయంలో వింత ప్రవర్తన..

హైదరాబాద్‌లోని రాజీవ్ గాంధీ అంతర్జాతీయ విమానాశ్రయం (RGIA) ఎప్పుడూ భారీ భద్రతతో ఉంటుంది. అలాంటి చోట సీఐఎస్ఎఫ్ ఆఫీసర్ యూనిఫాం ధరించి బాలకృష్ణ అనుమానాస్పదంగా తిరుగుతున్నాడు. అతని నడక, ప్రవర్తనలో తేడా ఉందని గమనించిన తోటి భద్రతా సిబ్బంది అతడిని ప్రశ్నించారు. ఐడీ కార్డు అడగగా పొంతన లేని సమాధానాలు చెప్పడం, భయపడడం చూసి అది నకిలీ ఆఫీసర్ అని వారు నిర్ధారించుకున్నారు. వెంటనే శంషాబాద్ పోలీసులకు సమాచారం అందించడంతో, అసలు రంగు బయటపడింది.

మ్యాట్రిమోనియల్ సైట్లే వేటస్థలాలు

విచారణ ప్రారంభించిన పోలీసులకు బాలకృష్ణ వెల్లడించిన విషయాలు విని బుర్ర తిరిగిపోయింది. తను ఒక పోలీస్ అధికారిగా ఫోజులు కొట్టడానికి యూనిఫాం ధరించేవాడని, అదే డ్రెస్‌లో ఫోటోలు దిగి పేరున్న మ్యాట్రిమోనియల్ వెబ్‌సైట్లలో ప్రొఫైల్స్ క్రియేట్ చేసేవాడని ఒప్పుకున్నాడు. మంచి హోదాలో ఉన్నాడని భావించిన బాధితులు అతడిని నమ్మి పరిచయం చేసుకునేవారు.

నన్ను పెళ్లి చేసుకోబోయే వాళ్లు అదృష్టవంతులు

నమ్మకం కుదిరిన తర్వాత, పెళ్లికి ముందే వారిని గెస్ట్ హౌస్‌లకు లేదా హోటళ్లకు పిలిపించి లైంగికంగా అనుభవించేవాడు. ఫొటోలు, వీడియోలు తీసుకొని బ్లాక్ మెయిల్ చేసి అత్యవసరంగా డబ్బు కావాలని అడిగి లక్షలాది రూపాయలు కాజేసేవాడు. ఇలా ఒక్కరు కాదు, ఇద్దరు కాదు.. ఏకంగా 67 మంది మహిళలను అతను మోసం చేసినట్లు అంగీకరించాడు.

శ్రీకాకుళం నుంచి శంషాబాద్ వరకు మోసాల ప్రస్థానం

నిందితుడు బాలకృష్ణ స్వస్థలం శ్రీకాకుళం జిల్లా. అక్కడి నుంచి హైదరాబాద్‌కు వచ్చి ఒక ప్రణాళిక ప్రకారం ఈ మోసాలకు పాల్పడుతున్నాడు. అతని వద్ద నుంచి పలు నకిలీ ఐడీ కార్డులు, పోలీస్ యూనిఫామ్‌. బాధితులకు సంబంధించిన ఫొటోలు ఉన్న మొబైల్ ఫోన్లను పోలీసులు స్వాధీనం చేసుకున్నారు. సామాన్యుడు అంత ధైర్యంగా ఎయిర్‌పోర్ట్ లాంటి చోట ఎలా తిరగగలిగాడు? అతనికి ఎవరైనా సహకరించారా? అనే కోణంలో పోలీసులు లోతుగా విచారణ జరుపుతున్నారు.

మహిళల భద్రతపై ప్రశ్నలు

ఈ ఘటన కొన్ని తీవ్రమైన ప్రశ్నలను లేవనెత్తుతోంది. పోలీస్ యూనిఫాంలు సామాన్యులకు ఇంత సులభంగా ఎలా దొరుకుతున్నాయి? దుకాణదారులు ఐడీ కార్డులు చూడకుండా ఎందుకు అమ్ముతున్నారు? వెబ్‌సైట్లు ఐడీ కార్డులను పక్కాగా వెరిఫై చేయకపోవడం వల్ల ఇలాంటి వారు అమాయక యువతుల జీవితాలతో ఆడుకుంటున్నారు. పరువు పోతుందనే భయంతో చాలా మంది మహిళలు ఫిర్యాదు చేయడం లేదు. అందుకే బాలకృష్ణ యువతులను మోసం చేసిన వారి సంఖ్య 67 వరకు వెళ్లింది.

బాలకృష్ణ లాంటి మోసగాళ్లు ఖాకీ డ్రెస్ వేసుకున్నంత మాత్రాన ఆఫీసర్లు అయిపోరు. ఎవరైనా సంబంధం కోసం వచ్చినప్పుడు వారి ఆఫీసులో, వారి ఊరిలో ఎంక్వయిరీ చేసుకోవడం ప్రాథమిక బాధ్యత. కేవలం డ్రెస్ చూసి, మాటలు విని మోసపోతే ప్రాణాలు, మానాలు పోయే ప్రమాదం ఉందని ఈ కేసు నిరూపించింది. ప్రస్తుతం నిందితుడు రిమాండ్‌లో ఉన్నాడు. అతని వల్ల నష్టపోయిన బాధితులు ధైర్యంగా ముందుకు వచ్చి ఫిర్యాదు చేయాలని పోలీసులు కోరుతున్నారు.