ఐఫోన్ ఇక అందని ద్రాక్ష.. రేపటి నుంచి షాక్ లగా..?

యాపిల్ అభిమానులకు.. ముఖ్యంగా రాబోయే ఐఫోన్ 17 సిరీస్ కొనుగోలు చేయాలని భావిస్తున్న వారికి ఒక చేదు వార్త బయటకు వచ్చింది. ఇటీవల వస్తున్న తాజా టెక్ కథనాల ప్రకారం.. ఐఫోన్ 17 సిరీస్ మోడళ్ల ధరలను పెంచేందుకు యాపిల్ సంస్థ వేగంగా సన్నాహాలు చేస్తోంది. ముఖ్యంగా ఆగస్టు 10 నుంచే ఈ ధరల పెంపు అమల్లోకి రానున్నట్లు మార్కెట్‌లో ప్రచారం జరుగుతోంది. అయితే దీనిపై యాపిల్ సంస్థ నుంచి ఇప్పటివరకు ఎటువంటి అధికారిక ప్రకటన వెలువడకపోవడం గమనార్హం.

ఈ హఠాత్తు నిర్ణయానికి అంతర్జాతీయ మార్కెట్‌లో చోటుచేసుకుంటున్న కొన్ని కీలక మార్పులే కారణమని విశ్లేషకులు భావిస్తున్నారు. రాబోయే ఐఫోన్ 18 సిరీస్ మార్కెట్‌లోకి రాకముందే యాపిల్ ఈ విధమైన ధరల సవరణకు దిగడం టెక్ ప్రపంచంలో పెద్ద చర్చకు దారితీసింది. ముఖ్యంగా స్మార్ట్‌ఫోన్ తయారీలో అత్యంత కీలకమైన మెమరీ చిప్‌ల ధరలు గణనీయంగా పెరగడమే యాపిల్ ఈ రకమైన నిర్ణయం తీసుకోవడానికి ప్రధాన కారణమని నిపుణులు అంచనా వేస్తున్నారు. విడిభాగాల తయారీ వ్యయం రోజురోజుకూ పెరుగుతుండటంతో ఆ భారాన్ని వినియోగదారులపై వేయక తప్పని పరిస్థితి నెలకొంది.

అయితే ఏయే మోడళ్లపై ఈ ప్రభావం ఎక్కువగా ఉంటుంది.. ఏ స్థాయిలో ధరలు పెరుగుతాయి అనే విషయాలపై ఇంకా స్పష్టత రావాల్సి ఉంది. ఇప్పటివరకు వచ్చిన కొన్ని లీక్స్ ఆధారంగా చూస్తే ప్రాథమికంగా ఉండే బేస్ ఐఫోన్ 17 మోడల్ ధర కూడా ఈసారి భారీగానే పెరిగే అవకాశం ఉందనే అంచనాలు వినిపిస్తున్నాయి. దీనికితోడు హై-ఎండ్ ప్రో , ప్రో మాక్స్ వేరియంట్లు మరింత ప్రియం కానున్నట్లు తెలుస్తోంది.

యాపిల్ గతంలో తీసుకున్న కొన్ని కీలక నిర్ణయాలు కూడా ఈ వార్తలకు మరింత బలాన్ని చేకూరుస్తున్నాయి. ఇప్పటికే జూన్ నెలలో భారత్‌లో అందుబాటులో ఉన్న కొన్ని మ్యాక్‌బుక్ , ఐప్యాడ్ మోడళ్ల ధరలను యాపిల్ ఏకంగా 20 శాతం నుండి 42 శాతం వరకు పెంచినట్లు కథనాలు వచ్చాయి. అదే దారిలో ఇప్పుడు ఐఫోన్ల ధరలు కూడా పెరగనున్నాయనే వార్తలు రావడంతో భారతీయ వినియోగదారుల్లో తీవ్ర ఆందోళనతో పాటు ఆసక్తి కూడా నెలకొంది.

మొత్తానికి కొత్త ఐఫోన్ కొనుగోలు చేయాలని ప్లాన్ చేసుకుంటున్న వారు ప్రస్తుత మార్కెట్ పరిణామాలపై మరియు యాపిల్ ప్రకటించే అధికారిక సమాచారంపై ఓ కన్నేసి ఉంచడం చాలా మంచిది. రేపటి నుంచి మార్కెట్‌లో ఈ ధరల పెంపు ఎలాంటి ప్రభావం చూపనుందో వేచి చూడాలి.