గ్లోబల్ టెన్షన్ పెరిగితే.. గోల్డ్ సేఫ్ ఇన్వెస్ట్‌మెంట్ అవుతుందా?

ప్రస్తుతం ప్రపంచవ్యాప్తంగా నెలకొన్న భౌగోళిక ఉద్రిక్తతలు, ముఖ్యంగా ఇరాన్-అమెరికా మధ్య జరుగుతున్న పరిణామాలు బంగారం మార్కెట్‌ను ఊగిసలాటలో పడేస్తున్నాయి. యుద్ధ భయాల వేళ బంగారం సురక్షితమైన పెట్టుబడిగా భావించినా, తాజా మార్పులు పెట్టుబడిదారులను గందరగోళానికి గురిచేస్తున్నాయి. అసలు ఈ సమయంలో బంగారం కొనాలా? వద్దా? నిపుణుల విశ్లేషణ ఏంటి? ధరలు ఎందుకు అస్థిరంగా ఉన్నాయి? ఇలాంటి ఎన్నో ఆసక్తికర విషయాలు మీకోసం.

ట్రంప్ ప్రకటనలతో మార్కెట్‌లో అలజడి:

అమెరికా అధ్యక్షుడు డొనాల్డ్ ట్రంప్ ఇరాన్‌పై చేస్తున్న వరుస ప్రకటనలు బంగారం ధరలపై తీవ్ర ప్రభావం చూపుతున్నాయి. ఇక ఇరాన్‌పై దాడులను ముగించేలా ఆయన పంపిన సంకేతాలతో బంగారం ధర ఒక్కసారిగా 4 శాతం పెరిగింది. హర్ముజ్ జలసంధి విషయంలో ఇరాన్ నుంచి సానుకూల స్పందన వచ్చిందని ట్రంప్ వ్యాఖ్యానించడంతో, యుద్ధం ముగిసి శాంతి చర్చలు మొదలవుతాయనే ఊహాగానాలు మార్కెట్‌లో ఊపందుకున్నాయి. దీనివల్ల అంతర్జాతీయ మార్కెట్‌లో బంగారం ధర ఔన్స్‌కు 4,550 డాలర్ల మార్కును దాటేసింది.

9 రోజుల నష్టాల తర్వాత అనూహ్య పెరుగుదల:

వరుసగా తొమ్మిది రోజుల పాటు నష్టాల్లో ఉన్న బంగారం ధరలు, ట్రంప్ ప్రకటనతో ఒక్కసారిగా పెరగడం అందరినీ ఆశ్చర్యానికి గురిచేసింది. నిజానికి ఈ ఏడాది జనవరిలో ఔన్స్ బంగారం ధర 5,626 డాలర్ల వద్ద ఉండగా, అక్కడి నుంచి దాదాపు 20 శాతం వరకు పడిపోయింది. ఇక ఇలా ధరలు భారీగా తగ్గడం వల్ల బంగారంలో పెట్టుబడి పెట్టడం ఇప్పుడు సురక్షితమేనా? అన్న అనుమానాలు వ్యక్తమవుతున్నాయి. మార్కెట్ నిపుణులు దీన్ని 'హెడ్‌లైన్ రిస్క్ వోలాటిలిటీ'గా అభివర్ణిస్తున్నారు, అంటే ఇదొక తాత్కాలిక ఊరట మాత్రమేనని వారి అభిప్రాయం.

ద్రవ్యోల్బణం, లిక్విడిటీ ఒత్తిడి.. అసలు కారణాలివే:

బంగారం ధరలు పెరగడానికి కేవలం యుద్ధ భయాలే కాదు, ఇతర ఆర్థిక కారణాలు కూడా ఉన్నాయి. చమురు ధరలు పెరగడం వల్ల ద్రవ్యోల్బణం (ధరల పెరుగుదల) పెరుగుతోంది, దీనివల్ల వడ్డీ రేట్లు కూడా ఎక్కువ కాలం అలాగే ఉండే అవకాశం ఉంది. సాధారణంగా యుద్ధం వస్తే బంగారం ధరలు పెరుగుతాయి, కానీ ఈసారి పెట్టుబడిదారులు తమ దగ్గరున్న బంగారాన్ని అమ్మి నగదు (లిక్విడిటీ) సమకూర్చుకుంటున్నారు.ఇక గత రెండేళ్లుగా కేంద్ర బ్యాంకులు భారీగా బంగారం కొన్నప్పటికీ, ఇప్పుడు ధరలు ఎక్కువగా ఉండటంతో కొద్దిగా విరామం తీసుకుంటున్నాయి.

బంగారం భవిష్యత్తు ఏంటి?:

ప్రస్తుతానికి బంగారం మార్కెట్ అస్థిరంగా ఉన్నా, దీర్ఘకాలంలో ఇది సురక్షితమైన ఆస్తిగానే కొనసాగుతుందని నిపుణులు చెబుతున్నారు. కరెన్సీ విలువ తగ్గినా లేదా ఆర్థిక వ్యవస్థలో ఇబ్బందులు వచ్చినా బంగారమే రక్షణగా నిలుస్తుంది. అయితే తక్షణమే లాభాలు ఆశించే వారు మాత్రం ప్రస్తుత వడ్డీ రేట్లు, ద్రవ్యోల్బణం వంటి అంశాలను గమనిస్తూ అడుగు వేయాలి.ఇక పరిస్థితులు కుదుటపడిన తర్వాత బంగారం మళ్లీ తన మునుపటి వైభవాన్ని అందుకుంటుందని అంచనా. కాబట్టి పెట్టుబడి పెట్టే ముందు మార్కెట్ కదలికలను నిశితంగా గమనించడం ముఖ్యం.