ఎలాన్ మస్క్ 'ఏఐ' వ్యూహం రివర్స్? స్పేస్ఎక్స్ పతనానికి అసలు కారణాలు ఇవే
ఇటీవల రికార్డు స్థాయి ఐపీఓతో ప్రపంచ మార్కెట్లను ఆకర్షించిన ప్రముఖ బిలియనీర్ ఎలాన్ మస్క్కు చెందిన స్పేస్ఎక్స్ సంస్థకు అనూహ్యంగా భారీ ఎదురుదెబ్బ తగిలింది.
ఇటీవల రికార్డు స్థాయి ఐపీఓతో ప్రపంచ మార్కెట్లను ఆకర్షించిన ప్రముఖ బిలియనీర్ ఎలాన్ మస్క్కు చెందిన స్పేస్ఎక్స్ సంస్థకు అనూహ్యంగా భారీ ఎదురుదెబ్బ తగిలింది. మార్కెట్లో సరికొత్త రికార్డులు సృష్టిస్తూ దూసుకెళ్లిన ఈ స్పేస్ దిగ్గజం.. కేవలం మూడు రోజుల్లోనే ఏకంగా 620 బిలియన్ డాలర్ల (సుమారు రూ.56 లక్షల కోట్లకు పైగా) మార్కెట్ విలువను కోల్పోయింది. లాభాల ఉత్సాహంలో ఉన్న ఇన్వెస్టర్లకు ఈ ఆకస్మిక పతనం తీవ్ర దిగ్భ్రాంతిని కలిగించింది.
రికార్డుల లిస్టింగ్.. ఆపై భారీ పతనం
ప్రపంచంలోనే అతిపెద్ద ఐపీఓలలో ఒకటిగా నిలిచిన స్పేస్ఎక్స్, రికార్డు స్థాయిలో 85.7 బిలియన్ డాలర్ల నిధులను సమీకరించి మార్కెట్లో సంచలనం సృష్టించింది. ఐపీఓ ధర $135 గా ఉంది. దాదాపు 12 శాతం ప్రీమియంతో $150 వద్ద ట్రేడింగ్ ప్రారంభమైంది. కొనుగోళ్ల జోరుతో షేరు ధర గరిష్ఠంగా $225.64 కి చేరింది. ఈ అద్భుతమైన వృద్ధితో ఎలాన్ మస్క్ సంపద అమాంతం పెరిగి ఆయన ప్రపంచంలోనే తొలి 'ట్రిలియనీర్' గా నిలిచారనే ప్రచారం కూడా సాగింది. అయితే ఈ ఆనందం ఎక్కువ రోజులు నిలవలేదు. గత మూడు ట్రేడింగ్ సెషన్లలో స్పేస్ఎక్స్ షేర్లు ఏకంగా 30 శాతం వరకు కుప్పకూలాయి. ఒక్క జూన్ 22 నాటి ట్రేడింగ్ సెషన్లోనే షేరు విలువ 16 శాతానికి పైగా క్షీణించి $154.60 వద్దకు పడిపోయింది. దీంతో ఐపీఓ తర్వాత వచ్చిన లాభాలన్నీ దాదాపుగా ఆవిరైపోయాయి.
ఎలాన్ మస్క్ సంపదకు గండి
కంపెనీ షేర్ల పతనం ఎలాన్ మస్క్ వ్యక్తిగత సంపదపై తీవ్ర ప్రభావాన్ని చూపించింది. కేవలం ఒక్క రోజులోనే మస్క్ వ్యక్తిగత సంపద సుమారు 152 బిలియన్ డాలర్లు క్షీణించింది. బ్లూమ్బెర్గ్ బిలియనీర్స్ ఇండెక్స్ ప్రకారం ఈ పతనం తర్వాత కూడా ఆయన నికర సంపద ప్రస్తుతం 1.08 ట్రిలియన్ డాలర్లుగా కొనసాగుతోంది.
పతనానికి ప్రధాన కారణాలు ఏమిటి?
స్పేస్ఎక్స్ షేర్లు ఈ స్థాయిలో ఒక్కసారిగా పడిపోవడానికి కంపెనీ ఇటీవల తీసుకున్న కొన్ని కీలక నిర్ణయాలే కారణమని మార్కెట్ విశ్లేషకులు చెబుతున్నారు. ఆర్టిఫిషియల్ ఇంటెలిజెన్స్ (ఏఐ) రంగంలో విస్తరణకు అవసరమైన నిధుల కోసం సంస్థ తొలిసారిగా 'ఇన్వెస్ట్మెంట్ గ్రేడ్ బాండ్లను' విక్రయించనున్నట్లు ప్రకటించింది. సుమారు 60 బిలియన్ డాలర్ల విలువైన ఆల్-స్టాక్ డీల్ ద్వారా ఏఐ కోడింగ్ స్టార్టప్ 'కర్సర్' ను కొనుగోలు చేస్తున్నట్లు వెల్లడించింది. ఈ భారీ డీల్ కారణంగా మార్కెట్లో షేర్ డైల్యూషన్ జరుగుతుందని, అలాగే కంపెనీకి అధిక విలువ కట్టారనే ఆందోళనలు పెట్టుబడిదారుల్లో వ్యక్తమయ్యాయి. ఫలితంగా ఇన్వెస్టర్లు పెద్ద ఎత్తున షేర్లను విక్రయించడంతో అమ్మకాల ఒత్తిడి పెరిగి మార్కెట్ విలువ భారీగా పడిపోయింది.
రికార్డుల వేట నుంచి ఒక్కసారిగా కుప్పకూలిన స్పేస్ఎక్స్ షేర్ల పతనం తాత్కాలికమా? లేక దీర్ఘకాలం కొనసాగుతుందా? అనే అంశంపై ఇప్పుడు గ్లోబల్ మార్కెట్ వర్గాల్లో తీవ్ర చర్చ నడుస్తోంది. రాబోయే రోజుల్లో కంపెనీ ప్రకటించే భవిష్యత్ వ్యూహాలు, ఏఐ రంగంలో వారు పెట్టే పెట్టుబడుల ఫలితాలపైనే స్పేస్ఎక్స్ మళ్లీ పుంజుకుంటుందా లేదా అనేది ఆధారపడి ఉంటుంది.