#ViralNews - పెళ్లి సంబంధాల్లో కొత్త ట్రెండ్…

పెళ్లి చూపుల్లో అబ్బాయి జీతం, ఆస్తిపాస్తులు, జాతకాలు చూడటం పాత పద్ధతి. మొన్నటివరకు జాబ్ వెరిఫికేషన్, సిబిల్ స్కోర్, హెల్త్ చెకప్‌లు కూడా చూశారు. కానీ ఇప్పుడు ట్రెండ్ మారింది! కాబోయే అల్లుడికి డ్రైవింగ్ డిసిప్లిన్ ఉందా? కార్ లేదా బైక్ మీద ఏమైనా ట్రాఫిక్ చలానాలు ఉన్నాయా? అని కూడా ఆరా తీస్తున్నారు. ఆంధ్రప్రదేశ్‌లో జరిగిన ఇలాంటి ఒక వింత ఘటనే ఇప్పుడు సోషల్ మీడియాలో విపరీతంగా వైరల్ అవుతోంది.

పెళ్లికి ముందే 'చలానా' వెరిఫికేషన్:

ఇటీవల ఒక తండ్రి, తన కూతురి కోసం వచ్చిన పెళ్లి సంబంధాన్ని ఖరారు చేసే ముందు ఒక వినూత్న ఆలోచన చేశాడు. అబ్బాయి గుణగణాలను తెలుసుకోవడానికి అతని కారు, బైక్ నంబర్లను తీసుకుని నేరుగా స్థానిక ట్రాఫిక్ సీఐ దగ్గరకు వెళ్లాడు. "మా అల్లుడిపై ఏమైనా డ్రంక్ అండ్ డ్రైవ్ కేసులు, ఓవర్ స్పీడ్ చలానాలు ఉన్నాయా?" అని వివరాలు అడిగి తెలుసుకున్నాడు.

చలానాలు ఉంటే పిల్లనివ్వను:

ఆ తండ్రి సీఐతో మాట్లాడుతూ.. "రోడ్డుపై ప్రయాణించేటప్పుడు మనిషికి ఎంత క్రమశిక్షణ, ఓపిక ఉందో అతని ట్రాఫిక్ రికార్డులను బట్టి తెలిసిపోతుంది. ఒకవేళ అబ్బాయి పేరు మీద విపరీతంగా చలానాలు, ర్యాష్ డ్రైవింగ్ కేసులు ఉంటే నా కూతురిని ఇచ్చి పెళ్లి చేయను" అని తెగేసి చెప్పాడు. ఇక తండ్రి తాపత్రయాన్ని చూసి ముగ్ధుడైన సీఐ, వెంటనే కంట్రోల్ రూమ్ ద్వారా రికార్డులను వెరిఫై చేయించారు.

గ్రీన్ సిగ్నల్ ఇచ్చిన పోలీస్:

అదృష్టవశాత్తూ అబ్బాయి వాహనాలపై ఎలాంటి పెండింగ్ చలానాలు, డ్రంక్ అండ్ డ్రైవ్ కేసులు లేవని తేలింది. "మీ అల్లుడు చాలా పద్ధతి గలవాడు, నిశ్చింతగా పెళ్లి చేసుకోండి" అని సీఐ క్లీన్ చిట్ ఇవ్వడంతో ఆ తండ్రి హమ్మయ్య అనుకుంటూ ఊపిరి పీల్చుకున్నాడు. భార్య లేకపోయినా కూతురిని ఎంతో కష్టపడి ఇంజనీరింగ్ చదివించిన ఆ తండ్రి, కూతురి భద్రత కోసం ఇంతలా ఆలోచించడం అందరినీ ఆకట్టుకుంటోంది.

అబ్బాయిలూ.. ఇకనైనా జాగ్రత్త:

ఈ వార్త బయటకు రావడంతో సోషల్ మీడియాలో నెటిజన్లు రకరకాలుగా స్పందిస్తున్నారు. "ఇప్పటివరకు సిబిల్ స్కోర్, ఫైనాన్షియల్ డీటెయిల్స్ చూస్తేనే బాబోయ్ అనుకున్నాం.. ఇప్పుడు ట్రాఫిక్ చలానాలు కూడా చూస్తున్నారా!" అంటూ అబ్బాయిలు తలలు పట్టుకుంటున్నారు. ఇక బైక్ లేదా కార్లపై చలానాలు పెండింగ్‌లో ఉంచుకుంటే పెళ్లిళ్లు కావడం కష్టమేనని జోకులు పేలుస్తున్నారు.

కాలంతో పాటు పెళ్లి సంబంధాల వెరిఫికేషన్ స్టైల్ కూడా మారిపోతోంది. రోడ్డుపై బాధ్యతగా నడుచుకునేవాడే కుటుంబంలోనూ బాధ్యతగా ఉంటాడనే ఈ తండ్రి నమ్మకం చాలామందికి నచ్చింది. కాబట్టి పెళ్లి కావాల్సిన అబ్బాయిలు.. మీ జాతకాలతో పాటు మీ బండి నంబర్‌పై ఉన్న ఈ-చలానాలను కూడా ఒకసారి చెక్ చేసుకుని, క్లియర్ చేసుకోవడం చాలా మంచిది. ఇక ఇదే కాదు చూస్తూ ఉంటే ఇంకెన్ని వెరిఫికేషన్ పుట్టుకొస్తాయో చూడాలి అంటూ నెటిజన్స్ సరదాగా కామెంట్లు చేస్తున్నారు.