సాఫ్ట్వేర్ వద్దు బాబోయ్.. ఎలుగుబంటి డ్రెస్సే ముద్దు.. రోజుకు 6 గంటలు యాక్టింగ్ చేస్తే ₹14 లక్షల ప్యాకేజీ
చైనాలోని ఒక జూ పార్క్ యాజమాన్యం ఈ వినూత్న ఉద్యోగ ప్రకటనను విడుదల చేసి సోషల్ మీడియాలో సెన్సేషన్ సృష్టించింది.
బీటెక్లు చదివి.. కోడింగ్ నేర్చుకుని.. పొద్దున లేస్తే ఆర్టిఫిషియల్ ఇంటెలిజెన్స్ (ఏఐ) ఎక్కడ మన ఉద్యోగాన్ని ఊడబీకుతుందోనని ఐటీ బాబులు వణికిపోతున్న రోజులివి. కంపెనీల్లో లే-ఆఫ్ల దెబ్బకు ల్యాప్టాప్లు మూసేసి ఏం చేయాలో తెలియక జుట్టు పీక్కుంటున్న యువతకు.. చైనా నుంచి ఒక అదిరిపోయే 'లైఫ్ సెట్' అయ్యే ఆఫర్ వచ్చింది. ఎలాంటి విద్యార్హతలూ అక్కర్లేదు.. కంప్యూటర్ నాలెడ్జ్ అస్సలే వద్దు. రోజుకు కేవలం ఆరు గంటలు అలా ఎలుగుబంటిలా నటిస్తే చాలు.. సంవత్సరానికి అక్షరాలా రూ. 14 లక్షల జీతం మీ అకౌంట్లో పడిపోతుంది. నమ్మశక్యంగా లేదు కదూ? కానీ ఇది అక్షరాలా నిజం. చైనాలోని ఒక జూ పార్క్ యాజమాన్యం ఈ వినూత్న ఉద్యోగ ప్రకటనను విడుదల చేసి సోషల్ మీడియాలో సెన్సేషన్ సృష్టించింది.
ఉద్యోగ బాధ్యతలు.. ఏం చేయాలంటే?
ఈ జాబ్ ప్రొఫైల్ వింటే ఎవరైనా ముక్కున వేలేసుకోవాల్సిందే. కంపెనీ ఇచ్చిన ఎలుగుబంటి కాస్ట్యూమ్ వేసుకోవాలి. జూలో అటు ఇటు తిరుగుతూ సందర్శకులకు హాయ్ చెప్పాలి. అప్పుడప్పుడు ఎలుగుబంటిలా గాండ్రించడం, వింత శబ్దాలు చేయడం ద్వారా పబ్లిక్ను ఎంటర్టైన్ చేయాలి. శారీరకంగా పెద్దగా కష్టపడాల్సిన పనేం లేదు కానీ.. ఆ పాత్రలో జీవించేసి జనాలను నమ్మించాలన్నమాట. "నువ్వు నిజమైన ఎలుగుబంటివి కావురా బాబోయ్" అని ఎవరికీ అనుమానం రానంత రేంజ్లో యాక్టింగ్ ఇరగదీయడమే ఇక్కడ మెయిన్ క్వాలిఫికేషన్..
క్యూ కడుతున్న అభ్యర్థులు.. జూ బోర్డుకు చుక్కలు
"ఉద్యోగం చిన్నదైనా.. ప్యాకేజీ పెద్దది!" అనే సామెతను నెటిజన్లు దీనికి అన్వయిస్తున్నారు. నోటిఫికేషన్ వచ్చిన కొన్ని గంటల్లోనే వందలాది మంది అభ్యర్థులు అప్లికేషన్లు పడేశారు. ఐటీ ఉద్యోగాల ఇంటర్వ్యూల కంటే ఘోరంగా ఈ ఎలుగుబంటి ఉద్యోగానికి పోటీ పెరిగిపోవడంతో జూ నిర్వాహకులకు ఏం చేయాలో పాలుపోవడం లేదు. అసలు ఈ రేంజ్ రెస్పాన్స్ వస్తుందని వారు కూడా ఊహించలేదు. ఇప్పుడు ఎవరిని రిజెక్ట్ చేయాలి.. ఎవరిని సెలెక్ట్ చేయాలో తెలియక తలలు పట్టుకుంటున్నారు. బహుశా నడకలో అరుపుల్లో ఎవరి 'క్రియేటివిటీ' బాగుంటే వారికే ఆ లక్కీ ఛాన్స్ దక్కేలా ఉంది.
రియాలిటీ చెక్.. ఈ వింత ఉద్యోగం వెనుక అసలు కథ!
పైకి ఇదో పెద్ద జోక్లా అనిపించినా దీని వెనుక చైనాలోని తీవ్రమైన నిరుద్యోగ సమస్య దాగి ఉందనేది కాదనలేని వాస్తవం. చైనాలో తయారీ రంగం జోరు తగ్గడం.. ఎగుమతులు క్షీణించడంతో కంపెనీలు ఉద్యోగులను రోడ్డున పడేస్తున్నాయి. టెక్నాలజీ పెరిగిపోతుండటంతో సంప్రదాయ ఉద్యోగాలు మాయమవుతున్నాయి. ఫలితంగా చదువుకున్న యువత కూడా ఐటీ హంగులు వదిలేసి ఇలాంటి "అసాధారణ" ఉద్యోగాల వైపు మొగ్గు చూపుతున్నారు.
చివరిగా నెటిజన్ల కామెంట్ ఏంటంటే.. "ఆఫీసుల్లో బాస్ల తిట్లు తింటూ టార్గెట్ల కోసం రక్తం చిందించే కంటే.. హాయిగా ఎలుగుబంటి డ్రెస్ వేసుకుని నాలుగు అరుపులు అరిస్తే లక్షలు ఇస్తామంటుంటే ఎవడండీ వదులుకుంటాడు?" అని.. మరి ఈ 14 లక్షల 'భాలూ' ఉద్యోగాన్ని ఏ అదృష్టవంతుడు కొట్టేస్తాడో చూడాలి!