పిన్, ఓటీపీ ల తిప్పలు లేవు.. యూపీఐని మించిన యాపిల్ పే.. దీని విశేషాలు ఏంటంటే?

డిజిటల్ పేమెంట్స్ రంగంలో విప్లవాత్మక మార్పులు చూస్తున్న భారత మార్కెట్‌లోకి ఎట్టకేలకు ప్రముఖ టెక్ దిగ్గజం యాపిల్ అడుగుపెట్టింది. ఐఫోన్ వినియోగదారులు ఎప్పటినుంచో ఆసక్తిగా ఎదురుచూస్తున్న ‘యాపిల్ పే’ సేవలు అధికారికంగా భారత్‌లో ప్రారంభమయ్యాయి. దీని ద్వారా ఐఫోన్, యాపిల్ వాచ్ వినియోగదారులు ఫిజికల్ డెబిట్ లేదా క్రెడిట్ కార్డులతో పనిలేకుండా డివైజ్‌ను ట్యాప్ చేయడం ద్వారా స్టోర్లలో అత్యంత సులభంగా కాంటాక్ట్‌లెస్ చెల్లింపులు పూర్తి చేసుకోవచ్చు.

తొలిదశలో కొన్ని పరిమితులు

యాపిల్ పే భారత మార్కెట్‌లోకి ప్రవేశించినప్పటికీ ప్రారంభ దశలో దీని పరిధి కొంతవరకు పరిమితంగానే ఉంది. ప్రస్తుతం యాక్సిస్ బ్యాంక్ జారీ చేసిన వీసా, మాస్టర్‌కార్డ్ క్రెడిట్ కార్డులను మాత్రమే ‘యాపిల్ వాలెట్’ కు లింక్ చేసుకునే సదుపాయాన్ని అందుబాటులోకి తెచ్చారు. ఇతర ప్రధాన బ్యాంకుల కార్డులు ఉన్న వినియోగదారులు ఈ సేవను పొందేందుకు మరికొంత కాలం వేచి చూడక తప్పదు. కార్డును ఒకసారి వాలెట్‌లో యాడ్ చేసిన తర్వాత యాపిల్ పే సపోర్ట్ చేసే కాంటాక్ట్‌లెస్ పీఓఎస్ టెర్మినల్ దగ్గర ఐఫోన్ లేదా యాపిల్ వాచ్‌ను ట్యాప్ చేస్తే సెకన్ల వ్యవధిలో పేమెంట్ పూర్తవుతుంది.

పిన్, ఓటీపీ ల తిప్పలు లేవు.. భద్రతకు డబుల్ గ్యారెంటీ

యాపిల్ పే ప్రత్యేకత ఏమిటంటే ప్రతీ లావాదేవీకి కార్డ్ పిన్ ఎంటర్ చేయడం లేదా ఫోన్‌కి వచ్చే ఓటీపీ కోసం వేచి చూడాల్సిన అవసరం ఉండదు. అయితే ఈ విధానంలో భద్రతకు అత్యధిక ప్రాధాన్యత ఇచ్చారు. వినియోగదారుడి డివైజ్‌లో ఉన్న ఫేస్ ఐడీ, టచ్ ఐడీ లేదా పాస్‌కోడ్ ఆధారిత ఆథెంటికేషన్ ద్వారానే లావాదేవీలు పూర్తవుతాయి. అంతేకాకుండా అసలు కార్డ్ వివరాలు లేదా వ్యక్తిగత సమాచారం మర్చంట్‌కు షేర్ కాకుండా 'టోకనైజేషన్' టెక్నాలజీ ద్వారా అత్యంత సురక్షితంగా చెల్లింపులు జరుగుతాయి.

యూపీఐకి పోటీగా నిలుస్తుందా?

ప్రస్తుతం భారతదేశంలో డిజిటల్ పేమెంట్స్ అనగానే అందరికీ యూపీఐ గుర్తొస్తుంది. చిన్న టీ కొట్టు నుండి పెద్ద షాపింగ్ మాల్స్ వరకు క్యూఆర్ కోడ్ స్కాన్ చేసి పేమెంట్స్ చేయడం భారత ప్రజలకు అలవాటుగా మారింది. ఈ తరుణంలో యాపిల్ పే రాక ఆసక్తికరంగా మారింది. అయితే యాపిల్ పే ప్రస్తుతం క్రెడిట్ కార్డ్ కాంటాక్ట్‌లెస్ చెల్లింపులపైనే దృష్టి పెట్టినందున ఇది నేరుగా యూపీఐ కి ప్రత్యామ్నాయం కాకపోవచ్చు. భవిష్యత్తులో మరిన్ని బ్యాంకులు, ఇతర చెల్లింపు ఆప్షన్లు ఇందులో చేరితే దీని ప్రభావం మరింత పెరిగే అవకాశం ఉంది.

ఆలస్యంగానైనా గ్రాండ్ ఎంట్రీ

అమెరికాలో 2014లోనే ప్రారంభమైన యాపిల్ పే సేవలు, ప్రపంచవ్యాప్తంగా అనేక దేశాల్లో విజయవంతంగా కొనసాగుతున్నాయి. భారత మార్కెట్లోకి ఇది కాస్త ఆలస్యంగా ప్రవేశించినప్పటికీ ప్రీమియం స్మార్ట్‌ఫోన్ వినియోగదారులకు ఇది ఒక సరికొత్త డిజిటల్ అనుభవాన్ని అందించనుంది. రాబోయే రోజుల్లో మిగిలిన బ్యాంకులు కూడా ఈ సేవలోకి తోడైతే భారత్‌లో యాపిల్ పే వినియోగం గణనీయంగా పుంజుకోవడం ఖాయంగా కనిపిస్తోంది.