యశ్.. పట్టుకునే డైరెక్టర్ ఎవరు?

పెద్ద స్టార్ హీరోల దగ్గర ఒక సినిమా పూర్తయ్యేలోపే తర్వాతి రెండు సినిమాలు లైన్‌లో ఉంటున్నాయి. కానీ యశ్ విషయంలో ఇప్పుడు పరిస్థితి కొంచెం వేరు. ‘టాక్సిక్’ ఆగస్టు 26న థియేటర్లలోకి వచ్చింది. నితేశ్ తివారీ ‘రామాయణ’లో రావణుడిగా యశ్‌కు ఇంకా పని ఉంది. అయితే అది యశ్ సోలో హీరోగా చేసే సినిమా కాదు. ‘టాక్సిక్’ తర్వాత సోలో హీరో ప్రాజెక్ట్ ఏంటన్నది మాత్రం ఇప్పటివరకు అధికారికంగా ప్రకటించలేదు.

యశ్ ఇలా టైమ్ తీసుకోవడం కొత్తేమీ కాదు. ‘కేజీఎఫ్ 2’ 2022లో వచ్చిన తర్వాత వెంటనే మరో సినిమా ఒప్పుకోలేదు. చాలా గ్యాప్ తీసుకుని గీతూ మోహన్‌దాస్‌తో ‘టాక్సిక్’ చేశాడు. అప్పట్లో కూడా పెద్ద కమర్షియల్ దర్శకుడిని ఎంచుకుంటాడని అనుకున్నారు. కానీ యశ్ మాత్రం వేరే ఛాయిస్ తీసుకున్నాడు. ఇప్పుడు మరోసారి అలాంటి గ్యాప్ వచ్చింది. మార్కెట్ ఉన్న హీరో రెడీగా ఉన్నా, అతనికి నచ్చే కథ ఎవరి దగ్గర ఉందన్నదే ప్రశ్న.

ఈ మధ్య హేమంత్ ఎం.రావు పేరు యశ్‌తో గట్టిగానే వినిపించింది. ‘సప్త సాగరదాచే ఎల్లో’తో గుర్తింపు తెచ్చుకున్న హేమంత్ దర్శకత్వంలో యశ్ సినిమా అంటూ టాక్ వచ్చింది. కానీ యశ్ టీమ్ నుంచి గానీ, హేమంత్ నుంచి గానీ సినిమా అనౌన్స్ కాలేదు. హేమంత్ ఇటీవల ‘టాక్సిక్’పై పోస్ట్ చేయడంతో ఆ టాక్ మళ్లీ బయటకు వచ్చింది.

తెలుగు దర్శకులకు కూడా యశ్ ఇప్పుడు మంచి ఆప్షనే. ప్రభాస్, ఎన్టీఆర్, రామ్ చరణ్, అల్లు అర్జున్, మహేష్ లాంటి హీరోల చేతుల్లో ఇప్పటికే పెద్ద సినిమాలు ఉన్నాయి. వాళ్ల డేట్స్ కోసం దర్శకులు సంవత్సరాల పాటు ఎదురుచూడాల్సిన పరిస్థితి ఉంది. యశ్ మాత్రం తన తర్వాతి సోలో సినిమాను ఇంకా ప్రకటించలేదు. పాన్ ఇండియా మార్కెట్ ఉన్న హీరో కావడంతో తెలుగు నుంచి కూడా కథలు వెళ్లే అవకాశం లేకపోలేదు.

అయితే యశ్‌ను ఒప్పించడం అంత ఈజీ కాదని ‘టాక్సిక్’తోనే మరోసారి తెలిసింది. ‘కేజీఎఫ్’ తర్వాత అందరూ ఊహించిన దారిలో కాకుండా గీతూ మోహన్‌దాస్‌ను ఎంచుకున్నాడు. హైదరాబాద్ ఈవెంట్‌లో దిల్ రాజు కూడా అప్పట్లో ఆ కాంబో తనను ఆశ్చర్యపరిచిందని చెప్పారు. అంటే దర్శకుడి గత బాక్సాఫీస్ రికార్డు చూసి ఒప్పుకునే రకం కాదని అర్థమవుతుంది. ఇక యశ్ నెక్స్ట్‘రామాయణ’ పని పూర్తి చేయాల్సి ఉంది. పార్ట్ 2 కోసం రణబీర్ కపూర్‌తో యశ్ కీలక సన్నివేశాలు ఇంకా షూట్ చేయాల్సి ఉందట. ఆ ప్రాజెక్టు మధ్యలోనే కొత్త సినిమా ప్రకటిస్తాడా, లేక ఆ పని పూర్తయ్యాకే నిర్ణయం తీసుకుంటాడా అన్నది చూడాలి.