భారతదేశంలోనే తొలి స్లాషర్ ఫిల్మ్‌.. 'కల్ట్'పై విశ్వక్ సేన్

టాలీవుడ్ మాస్ కా దాస్ విశ్వక్‌సేన్ హీరోగా నటిస్తూ స్వయంగా దర్శకత్వం వహించిన మూవీ ‘కల్ట్'. తారక్ సినిమాస్ బ్యానర్‌పై సందీప్ కాకరాల నిర్మిస్తున్న ఈ సినిమా వాస్తవ జీవిత ఘటనల స్ఫూర్తితో తెరకెక్కుతోంది. భారతదేశపు తొలి స్లాషర్ థ్రిల్లర్‌గా వస్తున్న ఈ చిత్రం అక్టోబర్ 30న ప్రపంచవ్యాప్తంగా విడుదల కానుంది. ఈ నేపథ్యంలో హైదరాబాద్‌లో జరిగిన ట్రైలర్ లాంచ్ కార్యక్రమంలో విశ్వక్ సేన్ సినిమా గురించి పలు ఆసక్తికర విషయాలు పంచుకున్నారు. ఆ విశేషాలు ఇప్పుడు చూద్దాం..

హింసాత్మక సినిమాలపై విశ్వక్ క్లారిటీ:

ప్రస్తుతం వస్తున్న సినిమాల్లో హింస ఎక్కువైందని, సోషల్ మీడియాలో దీనిపై ప్రేక్షకుల నుంచి విసుగు వినిపిస్తోందని విశ్లేషకులు అంటున్నారు. దీనిపై విశ్వక్ స్పందిస్తూ.. ఆడియన్స్ ఫీలింగ్ తనకు తెలుసని, అయితే తన 'కల్ట్' చిత్రం ఆ కోవకు చెందినది కాదని స్పష్టం చేశారు. చిత్రంలోని హింస కేవలం బలవంతంగా ఇరికించినట్లు కాకుండా, ప్రేక్షకులకు ఒక డిఫరెంట్ కిక్ ఇచ్చేలా, కథకు తగినట్లుగా అత్యంత జాగ్రత్తగా డిజైన్ చేసినట్లు ఆయన వెల్లడించారు.

గ్లోబల్ కంటెంట్.. జపనీస్, స్పానిష్‌లోకి డబ్బింగ్:

ట్రైలర్‌కు వస్తోన్న అద్భుతమైన స్పందన చూసి ఎంతో ఆనందంగా ఉందని విశ్వక్ తెలిపారు. ఇది తెలుగు సినిమాకే పరిమితం కాదని, ప్రపంచవ్యాప్తంగా ఉన్న ప్రేక్షకులను దృష్టిలో పెట్టుకుని రూపొందిస్తున్న ప్రాజెక్ట్ అని తెలిపారు. అందుకే ఈ సినిమాను తెలుగుతో పాటు జపనీస్, స్పానిష్ భాషల్లో కూడా డబ్ చేసినట్లు పేర్కొన్నారు. ఇక భాషా భేదాలు లేకుండా ప్రపంచవ్యాప్తంగా ఉన్న ప్రేక్షకులు ఈ సినిమాకు కనెక్ట్ అవుతారనే గట్టి నమ్మకం తనకు ఉందని ఆయన ధీమా వ్యక్తం చేశారు.

యాక్షన్ కంటే ఇంటెన్స్ డ్రామా హైలెట్:

ఈ సినిమా కేవలం యాక్షన్ సీన్లకే పరిమితం కాదని, సుమారు రెండు గంటల ఇరవై నిమిషాల పాటు సాగే ఇంటెన్స్ డ్రామా ప్రేక్షకులను కట్టిపడేస్తుందని విశ్వక్ చెప్పారు. ఫైట్ల కంటే బలమైన భావోద్వేగాలు, డ్రామాకే ఆడియన్స్ ఎక్కువగా కనెక్ట్ అవుతారన్నారు. ఇక తాను ఎప్పుడూ కొత్త ప్రయోగాలు చేస్తుంటానని, ప్రతిసారీ ప్రేక్షకులు తనను ఆదరించారని, ఈసారి కూడా ఆ నమ్మకంతోనే 'కల్ట్'తో వస్తున్నానని తెలిపారు.

150 మంది కొత్త నటులకు అవకాశం:

‘ఫలక్నుమా దాస్’ సినిమా సమయంలో తాను ఎలా అయితే కొత్తవారికి అవకాశాలు ఇచ్చానో, ఇప్పుడు ‘కల్ట్’ చిత్రం ద్వారా ఏకంగా 150 మంది కొత్త నటీనటులకు ఇండస్ట్రీలో లైఫ్ ఇస్తున్నట్లు విశ్వక్ గర్వంగా చెప్పారు. నిర్మాతలు, టెక్నీషియన్ల సహకారంతోనే ఈ భారీ ప్రయోగాన్ని విజయవంతంగా పూర్తి చేయగలిగామని ఆయన పేర్కొన్నారు.

మొత్తానికి, విశ్వక్‌సేన్ ‘కల్ట్’ సినిమాతో టాలీవుడ్‌లో కొత్త ట్రెండ్‌ను పరిచయం చేయబోతున్నారు. భారతదేశపు తొలి స్లాషర్ థ్రిల్లర్‌గా ప్రచారం పొందుతున్న ఈ సినిమా అక్టోబర్ 30న థియేటర్లలోకి రానుంది. ఈ చిత్రం ప్రేక్షకులను ఎంతవరకు ఆకట్టుకుంటుందో చూడాలి.