సందీప్ పిలిచినప్పుడు వెళ్లకపోతే నేను బతికి వేస్ట్.. విజయ్ ఎమోషనల్ స్పీచ్

హైదరాబాద్‌లో జరిగిన రోమాంచకం ప్రీ రిలీజ్ ఈవెంట్‌లో హీరో విజయ్ దేవరకొండ ముఖ్య అతిథిగా పాల్గొని తన మనసులోని మాటలను చాలా ఎమోషనల్‌గా తెలియజేశారు. అర్జున్ రెడ్డి సినిమాతో మొదలైన తన ప్రయాణాన్ని గుర్తుచేసుకుంటూ సందీప్ రెడ్డి వంగాతో తనకున్న బంధం ఒక డైరెక్టర్ యాక్టర్ రిలేషన్ కాదని ఒక అన్నదమ్ముల అనుబంధం కంటే గొప్పదని చెప్పాడు. ఆ సినిమా తీస్తున్నప్పుడు తమ చేతుల్లో డబ్బులు లేవని ఎలాంటి బ్యాక్‌గ్రౌండ్ లేకపోయినా సందీప్ ప్రణయ్ ప్రభాకర్ అంకుల్ వాళ్ల పొలాలు అమ్మి సినిమా తీశారని ఆ రోజుల్లో పంచుకున్న బాధలు కష్టాలను తలుచుకున్నాడు.

సాధించిన విజయాల కంటే కూడా ఆ సమయంలో ఇద్దరం కలిసి గడిపిన క్షణాలనే తాను ఎక్కువగా మిస్ అవుతుంటానని విజయ్ తెలిపాడు. సందీప్ ఏ ఫంక్షన్‌కు పిలిచినా తాను వస్తానని ఒకవేళ తాను రాకపోతే తను బతికి వేస్ట్ అని వాళ్ల మీద తనకున్న ప్రేమను చాటుకున్నాడు. భద్రకాళీ పిక్చర్స్ లోగో తెరమీద పడిన ప్రతిసారి తన చెవుల్లో అర్జున్ రెడ్డి బ్యాక్‌గ్రౌండ్ మ్యూజిక్ వినిపిస్తుందని ఆ లోగో చూసిన ప్రతిసారి తెలుగు వాళ్లకు అర్జున్ రెడ్డి గుర్తొస్తుందని ఎమోషనల్ అయ్యాడు.

హీరో సుమంత్ ప్రభాస్ గురించి మాట్లాడుతూ ఒకప్పుడు తన రౌడీ ఆఫీస్‌లో అతన్ని చూసినప్పుడే కళ్లలో ఒక ఫైర్ కనిపించిందని ఎప్పటికైనా డైరెక్టర్ లేదా హీరో అవుతాడని అనుకున్నానని చెప్పాడు. మేమ్ ఫేమస్ సినిమా ప్రమోషన్స్ కోసం ఆ తరువాత సుమంత్‌తో కలిసి దుబాయ్ వెళ్లిన రోజులను గుర్తుచేసుకుంటూ రూమ్‌లో ఎవరూ లేకపోయినా తాను ఎప్పుడూ తోడుగా ఉంటానని సుమంత్‌కు భరోసా ఇచ్చాడు.

రోమాంచకం సినిమాలోని రాధా రమణ పాటను తన తమ్ముడు ఆనంద్ దేవరకొండ ఇంట్లో లూప్‌లో పెట్టి తెగ వింటున్నాడని అతడికి ఆ పాట బాగా కనెక్ట్ అయిందని తెలిపాడు. సందీప్ ప్రణయ్ నిర్మిస్తున్న ఈ సినిమా కచ్చితంగా పెద్ద హిట్ అవ్వాలని డైరెక్టర్ వేణు వాసుకి అనంతికతో పాటు కలలు కనే ప్రతి ఒక్కరికి ఈ సినిమా సక్సెస్ ఇవ్వాలని విజయ్ మనస్ఫూర్తిగా కోరుకున్నాడు.

అర్జున్ రెడ్డి టైమ్‌లో హిట్టు ఫ్లాపుల గురించి ఆలోచించకుండా ప్రాసెస్ ఎంజాయ్ చేసినట్లే సుమంత్‌ను కూడా ఈ సినిమా ప్రయాణాన్ని ఆస్వాదించమని సలహా ఇచ్చాడు. తాను కూడా ప్రస్తుతం చేస్తున్న సినిమాలను అలాగే ఎంజాయ్ చేస్తున్నానని డైరెక్టర్ శౌర్యువ్ తో సినిమా ఎప్పుడు స్టార్ట్ చేస్తానా అని ఎంతో ఎక్సయిటింగ్ గా ఎదురుచూస్తున్నానని తెలిపాడు.

యువతను ఉద్దేశించి విజయ్ ఒక మోటివేషనల్ మెసేజ్ ఇచ్చాడు. మన కళ్లలో ఆశయం గుండెల్లో కసి ఉంటే విజయం ఎప్పటికైనా సొంతం అవుతుందని నమ్మకం వ్యక్తం చేశాడు. ఆరు నెలలు పట్టొచ్చు లేదా రెండు మూడేళ్లు పట్టొచ్చు కానీ కచ్చితంగా అనుకున్నది సాధించి తీరుతామని ఎవరు ఊహించని రేంజ్‌లో సక్సెస్ కొడతారని కుర్రాళ్లకు ధైర్యం చెప్పాడు. సెప్టెంబర్ 3న థియేటర్లలోకి వస్తున్న ఈ సినిమా అందరినీ అలరిస్తుందని నమ్మకం వ్యక్తం చేశాడు. చివరగా యాంకర్ తన జీవితంలో రోమాంచకం కలిగించిన క్షణాల గురించి అడగగా విజయ్ తనదైన స్టైల్‌లో బదులిచ్చాడు. పుట్టినప్పటి నుంచి జేబులో డబ్బులు ఉన్నా లేకపోయినా బ్లెండర్స్ ప్రైడ్ తాగినా లవ్ బ్రేకప్ అయినా అంతా రోమాంచకమే అని సరదాగా నవ్వించాడు.