వేరే ఆప్షన్ ఉన్నా ఒప్పుకోని వరుణ్.. సత్యకే గ్రీన్ సిగ్నల్?

మెగా ప్రిన్స్ వరుణ్ తేజ్ హీరోగా, మేర్లపాక గాంధీ దర్శకత్వంలో తెరకెక్కిన హారర్ కామెడీ చిత్రం 'కొరియన్ కనకరాజు' థియేటర్లలో పాజిటివ్ టాక్‌తో దూసుకుపోతోంది. రాయలసీమ బ్యాక్‌డ్రాప్, కొరియన్ అండర్‌వరల్డ్, అతీంద్రియ శక్తుల కలయికతో వినోదాత్మకంగా రూపుదిద్దుకున్న ఈ సినిమా ప్రేక్షకులను విశేషంగా ఆకట్టుకుంటోంది. ముఖ్యంగా వరుణ్ తేజ్ నటనతో పాటు కమెడియన్ సత్య కామెడీ టైమింగ్ సినిమాకు ప్రధాన బలంగా నిలిచింది. ఈ నేపథ్యంలో సత్య ఎంపిక వెనుక ఉన్న ఆసక్తికర కథనాన్ని దర్శకుడు మేర్లపాక గాంధీ తుపాకీ న్యూస్ కి ఇచ్చిన ఇంటర్వ్యూ లో పంచుకున్నారు.

వరుణ్ తేజ్ పట్టుబట్టడం వల్లే సత్య ఎంట్రీ:

ఈ చిత్రంలో కీలకమైన కమెడియన్ పాత్ర కోసం మొదట సత్యనే అనుకున్నప్పటికీ, ఆయన కాల్ షీట్లు ఖాళీ లేకపోవడంతో తీవ్ర ఆలస్యమైంది. దీంతో దర్శకుడు మేర్లపాక గాంధీ వేరే నటుడిని తీసుకుందామని ప్రతిపాదించారు. అయితే కథానాయకుడు వరుణ్ తేజ్ మాత్రం వేరే ఆప్షన్ వైపు చూడటానికి అస్సలు ఒప్పుకోలేదు. ఇక ఎంత లేట్ అయినా పర్లేదు, సత్య తోనే ఈ రోల్ చేయించాలని మొండిగా పట్టుబట్టి కూర్చున్నారు.

నిజమైన హీరో నమ్మకం:

వరుణ్ తేజ్ ఉంచిన ఆ నమ్మకమే ఈరోజు థియేటర్లలో నవ్వుల వర్షం కురిపిస్తోంది. సత్య డేట్ల కోసం వేచి చూసి షూటింగ్ చేయడం వల్ల అనుకున్న సమయం కంటే కాస్త ఆలస్యమైనప్పటికీ, వరుణ్ తీసుకున్న నిర్ణయం సరైనదని రుజువైంది.ఇక ఆ క్యారెక్టర్‌కు సత్య తప్ప వేరే ఎవరూ న్యాయం చేయలేరని, ఈ రోజు సినిమా ఈ స్థాయిలో ఆడుతోందంటే అందులో సత్య పాత్ర కూడా ఒక ముఖ్యమైన కారణమని దర్శకుడు మేర్లపాక గాంధీ తెలిపారు.

థియేటర్లలో వినోదం.. నవ్వుల పంట:

కొరియా నుంచి వచ్చిన ఓ ఆత్మ హీరోను ఆవహించడం, ఆ తర్వాత జరిగే పరిణామాలు ప్రేక్షకులను కడుపుబ్బా నవ్విస్తున్నాయి. ఇక ముఖ్యంగా సెకండాఫ్‌లో సత్య, మురళీధర్ గౌడ్ మధ్య వచ్చే కామెడీ ట్రాక్ థియేటర్లలో విపరీతమైన రెస్పాన్స్‌ను రాబడుతోంది. కథలో హారర్ ఎలిమెంట్స్ ఉన్నప్పటికీ, సత్య అందించిన వన్-లైనర్లు మరియు కామెడీ టైమింగ్ సినిమాను నెక్స్ట్ లెవెల్‌కి తీసుకెళ్లాయి.

బాక్సాఫీస్ వద్ద కలెక్షన్ల వర్షం:

ఫుల్ లెంగ్త్ కామెడీ ఎంటర్‌టైనర్‌గా వచ్చిన ఈ సినిమా బాక్సాఫీస్ వద్ద రికార్డు కలెక్షన్లు సాధిస్తోంది. ఫస్ట్ వీకెండ్ పూర్తయ్యేసరికి ప్రపంచవ్యాప్తంగా దాదాపు రూ. 37.4 కోట్ల గ్రాస్ రాబట్టింది. ఏపీ, తెలంగాణల్లో మొదటి ఆదివారానికే బ్రేక్ ఈవెన్ సాధించి డిస్ట్రిబ్యూటర్లకు మంచి లాభాలను తెచ్చిపెడుతోంది.

ఒక నటుడిగా పాత్ర స్వభావాన్ని అర్థం చేసుకుని, సత్యనే కావాలని పట్టుబట్టిన వరుణ్ తేజ్ నమ్మకం ఈరోజు నిజమైంది. మంచి కంటెంట్, టైమింగ్ ఉన్న కామెడీ కలిస్తే ప్రేక్షకులు ఖచ్చితంగా ఆదరిస్తారని 'కొరియన్ కనకరాజు' మరోసారి నిరూపించింది.