సినీ లవర్స్‌కు పండగే.. రెండు నెలల్లో భారీగా సినిమాల రిలీజ్‌లు!

సినిమాల పండగ మరో రెండు నెలల్లో థియేటర్లలో రాబోతోంది. నవంబర్, డిసెంబర్ మాసాల్లో టాలీవుడ్ బాక్సాఫీస్ వద్ద వరుసగా భారీ చిత్రాలు విడుదలకావడానికి క్యూ కట్టాయి. ప్రభాస్, రష్మిక మందన్న, శర్వానంద్, విశ్వక్ సేన్‌ల నుంచి మొదలుకొని బాలకృష్ణ, నాగార్జున వంటి సీనియర్ స్టార్స్ వరకు తమ క్రేజీ ప్రాజెక్టులతో ఆడియన్స్‌ను అలరించడానికి సిద్ధమవుతున్నారు. సినీ ప్రేమికులకు ఊపిరిసలపని వినోదాన్ని అందించేందుకు రాబోతున్న ఈ రెండు నెలల మూవీ రిలీజ్ చార్ట్ విశేషాలు ఇప్పుడు చూద్దాం..

నవంబర్ బరిలో స్టార్ హీరోల సినిమాలు:

నవంబర్ నెల ఆరంభం నుంచే బాక్సాఫీస్ వద్ద సందడి మొదలుకానుంది. నవంబర్ 5న బాలీవుడ్ బిగ్గెస్ట్ ప్రాజెక్ట్ 'రామాయణ: పార్ట్ 1' రాబోతుండగా, నవంబర్ 6న కిరణ్ అబ్బవరం నిర్మించిన 'హతః', సూర్య తమిళ చిత్రం 'సీన' బరిలో నిలవనున్నాయి. ఆ తర్వాత వారం నవంబర్ 12న శర్వానంద్, అనుపమల ‘భోగి’ లాక్ కాగా, నవంబర్ 19న విశ్వక్ సేన్ ‘ఈఎన్ఈ రిపీట్’, 20న దుల్కర్ సల్మాన్ ‘ఆకాశంలో ఒక తార’ విడుదల కానున్నాయి. ఇక నెల ఆఖరులో నవంబర్ 27న బెల్లంకొండ శ్రీనివాస్ ‘హైందవ’, రష్మిక మందన్న ‘మైసా’ చిత్రాలు సందడి చేయనున్నాయి.

డిసెంబర్ మొదటి వారంలో తీవ్రమైన పోటీ:

డిసెంబర్ ఆరంభంలోనే బాక్సాఫీస్ వద్ద ఊహించని ఫైట్ కనిపించబోతోంది. ప్రభాస్ ‘ఫౌజీ’ డిసెంబర్ రేసు నుంచి తప్పుకోవడంతో ఇతర హీరోలు తమ డేట్లను లాక్ చేసుకుంటున్నారు. ఇక డిసెంబర్ 3న నితిన్ ‘అలియాస్ రుక్మిణి’ ప్లాన్ చేస్తుండగా.. డిసెంబర్ 4న నాగచైతన్య ‘వృషకర్మ’, విశ్వక్ సేన్ ‘లెగసీ’ థియేటర్లలోకి రాబోతున్నాయి. వీటితో పాటు విజయ్ దేవరకొండ, కీర్తి సురేష్ల ‘రౌడీ జనార్ధన’ కూడా డిసెంబర్‌లోనే విడుదలయ్యే అవకాశం ఉంది.

క్రిస్మస్ రేసులో సీనియర్ స్టార్లు:

ఇక ఏడాది చివరిలో క్రిస్మస్ పండుగ సీజన్ బాక్సాఫీస్‌ను మరింత వేడెక్కించనుంది. అగ్ర కథానాయకులు నందమూరి బాలకృష్ణ ‘దాదా’, అక్కినేని నాగార్జున మైలురాయి చిత్రం ‘కింగ్ 100’ డిసెంబర్ 24న ఒకే రోజున బరిలోకి దిగుతుండటంతో పోటీ ఆసక్తికరంగా మారింది. అదే క్రమంలో డిసెంబర్ 25న కిరణ్ అబ్బవరం ‘రియాలిటీ’ తో పాటు హాలీవుడ్ మూవీ ‘జుమాంజీ 3’ కూడా థియేటర్లను ముంచెత్తనున్నాయి.

హాలీవుడ్ అండ్ డిజిటల్ జోష్:

కేవలం భారతీయ చిత్రాలే కాకుండా హాలీవుడ్ బిగ్గెస్ట్ ఫ్రాంచైజీలు కూడా ఈ రెండు నెలల్లో ఇండియాలో గ్రాండ్‌గా రిలీజ్ కాబోతున్నాయి. నవంబర్ 20న 'ది హంగర్ గేమ్స్: సన్‌రైజ్ ఆన్ ది రీపింగ్', డిసెంబర్ 17న అత్యంత ఆసక్తికరంగా ఎదురుచూస్తున్న 'అవేంజర్స్: డూమ్స్‌డే', డిసెంబర్ 18న 'డ్యూన్: పార్ట్ త్రీ' సినిమాలు విడుదలకానున్నాయి.

ఇక మొత్తానికి చూస్తే, రాబోయే రెండు నెలలు సినీ అభిమానులకు నిజమైన పండగే అని చెప్పాలి. చిన్న, పెద్ద సినిమాలు అనకుండా ప్రతీ వారం విభిన్నమైన కంటెంట్‌తో హీరోలు ప్రేక్షకుల ముందుకు రాబోతున్నారు. మరి ఈ రెండు నెలల బాక్సాఫీస్ రేసులో ఏ సినిమాలు విజయం సాధించి రికార్డులు క్రియేట్ చేస్తాయో వేచి చూడాలి.