కృష్ణ గారి లక్షణాలు జయకృష్ణలో ఉన్నాయి: డైరెక్టర్ అజయ్ భూపతి

ఆర్ఎక్స్ 100, మంగళవారం లాంటి డిఫరెంట్ సినిమాలతో డైరెక్టర్ అజయ్ భూపతి టాలీవుడ్ లో తనకంటూ ఒక ప్రత్యేకమైన గుర్తింపు తెచ్చుకున్నాడు. ఇప్పుడు అతను 'శ్రీనివాస మంగాపురం' అనే మరో ఇంట్రెస్టింగ్ ప్రాజెక్ట్ తో ప్రేక్షకుల ముందుకు రాబోతున్నాడు. సూపర్ స్టార్ కృష్ణ మనవడు జయకృష్ణను హీరోగా పరిచయం చేస్తూ అశ్వినీ దత్ ఈ చిత్రాన్ని నిర్మిస్తున్నారు. ఈ మూవీ ఈవెంట్ లో అజయ్ భూపతి మాట్లాడుతూ హీరో గురించి, సినిమా గురించి ఆసక్తికరమైన విషయాలను బయటపెట్టారు.

తెలుగు ఇండస్ట్రీలో సూపర్ స్టార్ కృష్ణ గారికి ఉన్న ట్రాక్ రికార్డ్ గురించి అజయ్ భూపతి ఈ వేదికపై ప్రత్యేకంగా మాట్లాడాడు. టెక్నాలజీ పరంగా అయినా, కొత్త తరహా స్టోరీల విషయంలో అయినా గతం లో కృష్ణ గారు తీసుకున్నంత రిస్క్ మరే ఏ హీరో కూడా తీసుకోలేదని ఆయన ప్రశంసించాడు. పోటీ తత్వం, అవతలి వాళ్ళతో ఎదురొడ్డి నిలబడటం, ఎదగాలి అనే ఒక గట్టి కసి కృష్ణ గారిలో ఉండేవని చెబుతూ ఆయన గొప్పదనాన్ని డైరెక్టర్ గుర్తుచేశాడు.

కృష్ణ గారిలో ఉన్న ఆ అద్భుతమైన లక్షణాలు, ఆ కసి అన్నీ ఆయన మనవడు జయకృష్ణలో కూడా తనకు స్పష్టంగా కనిపించాయని అజయ్ భూపతి చాలా కాన్ఫిడెంట్ గా చెప్పాడు. సెట్స్ లో జయకృష్ణ డెడికేషన్ చూసి తాను ఆశ్చర్యపోయానని, అతని స్క్రీన్ ప్రెజెన్స్ చాలా అద్భుతంగా ఉంటుందని అన్నాడు. నటనలో కూడా తన సత్తా ఏంటో చూపించడానికి జయకృష్ణ ఎంతో కష్టపడ్డాడని, ఈ సినిమాతో అతను కచ్చితంగా ఇండస్ట్రీలో ఒక పెద్ద హీరోగా ఎదుగుతాడని డైరెక్టర్ గట్టి నమ్మకాన్ని వ్యక్తం చేశాడు.

ఇక ఈ సినిమా మ్యూజిక్ గురించి అజయ్ భూపతి మాట్లాడుతూ చాలా ఇంట్రెస్టింగ్ విషయాలు షేర్ చేశాడు. మొదటి నుంచి కూడా తన సినిమాల్లో కంటెంట్ తో పాటు సంగీతం కూడా చాలా బాగుండాలని తాను బలంగా కోరుకుంటానని తెలిపాడు. తన డెబ్యూ మూవీ ఆర్ఎక్స్ 100 ఆడియో ఎంత పెద్ద సెన్సేషనల్ హిట్ అయిందో, అలాగే తన లాస్ట్ మూవీ మంగళవారం బ్యాక్ గ్రౌండ్ స్కోర్ థియేటర్లలో ఎలాంటి ఇంపాక్ట్ క్రియేట్ చేసిందో ఇండస్ట్రీలో అందరికీ తెలుసని ఆయన గుర్తుచేశాడు.

తన పాత సినిమాల ట్రాక్ రికార్డును కంటిన్యూ చేస్తూ 'శ్రీనివాస మంగాపురం' ఆడియో కూడా వంద శాతం బ్లాక్ బస్టర్ అవుతుందని అజయ్ భూపతి గ్యారెంటీ ఇచ్చాడు. ఈ ఆల్బమ్ లో ఇంకా రిలీజ్ కావాల్సిన మరో మూడు పాటలు కూడా ఆడియన్స్ కు పిచ్చపిచ్చగా నచ్చేస్తాయని ఆయన ధీమా వ్యక్తం చేశాడు. ఈ సినిమా సాంగ్స్ తన కెరీర్ లోనే బెస్ట్ మ్యూజికల్ హిట్ గా నిలిచిపోతాయని ఆయన పూర్తి నమ్మకంతో చెప్పాడు.

తనకు ఒక సెంటిమెంట్ ఉందని, మ్యూజిక్ డైరెక్టర్ నుంచి ఏదైనా కొత్త ట్యూన్ రాగానే దాన్ని ముందుగా తీసుకెళ్లి నిర్మాత అశ్వినీ దత్ గారికి వినిపిస్తానని అజయ్ భూపతి పంచుకున్నాడు. అలాగే ఈ సినిమాలోని ఫస్ట్ రెండు పాటల ట్యూన్స్ రెడీ అవ్వగానే నేరుగా వెళ్లి దత్ గారికి వినిపించానని అన్నాడు. ఆ పాటలు విన్న వెంటనే 'మన సినిమా ఆడియో కచ్చితంగా హిట్ అమ్మ' అని దత్ గారు ఎంతో సంతోషంగా చెప్పినట్లు అజయ్ భూపతి ఈ ఈవెంట్ లో వెల్లడించాడు.