అమీర్‌పేటలో బట్టల్లేకుండా తిరుగుతా అనకు: శ్రీ విష్ణు వార్నింగ్!

శ్రీ విష్ణు హీరోగా రూపొందుతున్న లేటెస్ట్ పీరియడ్ ఎంటర్‌టైనర్ కామ్రేడ్ కళ్యాణ్. 1992 నాటి ఆంధ్ర ఒడిశా సరిహద్దు నేపథ్యంలో సాగే ఈ చిత్రాన్ని దర్శకుడు జానకిరామ్ మారెళ్ల తెరకెక్కిస్తుండగా, కోన ఫిల్మ్ కార్పొరేషన్, స్కంద వాహన మోషన్ పిక్చర్స్ బ్యానర్లపై వెంకట కృష్ణ కర్నాటి, సీత కర్నాటి నిర్మిస్తున్నారు. ఈ సినిమా అక్టోబర్ 9న థియేటర్లలోకి రానుంది. ఈ క్రమంలో హైదరాబాద్‌లోని ఆర్‌కే సినీప్లెక్స్‌లో టీజర్ లాంచ్ ఈవెంట్‌ను చిత్ర యూనిట్ ఘనంగా నిర్వహించింది. వేదికపై టీజర్ రిలీజ్ చేసిన తర్వాత చిత్ర బృందం సినిమా విశేషాలను మీడియాతో పంచుకుంది.

హీరో శ్రీ విష్ణు మాట్లాడుతూ తన స్పీచ్‌తో ఆకట్టుకున్నారు. కామ్రేడ్ కళ్యాణ్ టైటిల్ వినగానే మొన్నటివరకు ఇదో చాలా సీరియస్ మూవీ అనుకున్నారని, టీజర్ వచ్చాక ఫన్ ఫిలిం అని అందరికీ క్లారిటీ వచ్చిందని అన్నారు. అసలు కామ్రేడ్ అనే పదానికి సరైన అర్థం తెలియాలనే విజయేంద్ర ప్రసాద్, ఆర్.నారాయణమూర్తి లాంటి పెద్దలను ఈవెంట్‌కు ఆహ్వానించామని చెప్పారు. తన దృష్టిలో కామ్రేడ్ అంటే ప్రాణమిచ్చే స్నేహితుడు అని, కళ్యాణ్ అంటే శుభం అని వివరించారు.

ఎప్పుడూ ఇతరుల మంచి కోరుకునే ఒక మంచి మిత్రుడి కథలా సినిమా అంతా ఫుల్ ఎంటర్‌టైనింగ్‌గా ఉంటుందనీ అన్నారు. దర్శకుడు జానకిరామ్ గురించి మాట్లాడుతూ స్టేజిపై శ్రీ విష్ణు చేసిన కామెంట్స్ అందరినీ నవ్వించాయి. డైరెక్టర్‌కు ఇప్పటికే చాలా పేర్లు ఉన్నాయని, వాటన్నింటికంటే మించి ఈ సినిమాతో ఆయనకు సూపర్ హిట్ డైరెక్టర్ అనే పెద్ద గుర్తింపు రావాలని మనస్ఫూర్తిగా కోరుకుంటున్నట్లు చెప్పారు.

అలాగే సినిమా హిట్ కాకపోతే అమీర్‌పేట్ సెంటర్‌లో బట్టలు లేకుండా తిరుగుతానంటూ పిచ్చి శపథాలు, సవాళ్లు ఏవీ చేయొద్దని డైరెక్టర్‌కు వేదికపైనే సరదాగా వార్నింగ్ ఇచ్చారు. మనం కష్టపడి నిజాయితీగా కథను తెరకెక్కించినప్పుడు, అందులో నిజంగా కంటెంట్ ఉంటే ప్రేక్షకులు దాన్ని కచ్చితంగా నెత్తిన పెట్టుకుంటారని శ్రీ విష్ణు భరోసా ఇచ్చారు.

సినిమాలోని ఎంటర్‌టైన్‌మెంట్ ఎలిమెంట్స్ గురించి చెబుతూ శ్రీ విష్ణు ఆసక్తికర విషయాలు బయటపెట్టారు. ఫస్ట్ హాఫ్ మొత్తం తనతో పాటు కమెడియన్ సుదర్శన్ మధ్య వచ్చే సీన్లు చాలా సరదాగా సాగిపోతూ ప్రేక్షకులను అలరిస్తాయన్నారు. కథ కాస్త లోపలికి వెళ్లి పీరియడ్ డ్రామాలోకి ఎంటర్ అయ్యాక సత్య క్యారెక్టర్ ఎంట్రీ ఉంటుందని వివరించారు. ఈ సినిమాలో సత్యను దర్శకుడు జానకిరామ్ చాలా కొత్తగా ప్రెజెంట్ చేశారని, ఆయన చేసే సరికొత్త వెరైటీ కామెడీ థియేటర్లలో ప్రేక్షకులను కడుపుబ్బా నవ్విస్తుందని పూర్తి నమ్మకం వ్యక్తం చేశారు.

రచయిత, నిర్మాత కోన వెంకట్ వర్కింగ్ స్టైల్ డెడికేషన్ గురించి మాట్లాడుతూ శ్రీ విష్ణు కొన్ని సరదా సీక్రెట్స్ షేర్ చేసుకున్నారు. షూటింగ్‌లో సాధారణంగా తాను అందరికంటే ముందే లొకేషన్‌కు వస్తుంటానని, అలాంటిది కోన వెంకట్ అర్ధరాత్రి 12 గంటల వరకు షూట్‌లో ఉన్నా కూడా మరుసటి రోజు ఉదయం 6 గంటలకే సెట్స్‌లో ప్రత్యక్షమై అందరికీ పెద్ద షాక్ ఇచ్చేవారని గుర్తు చేసుకున్నారు. సినిమాపై అంతటి పిచ్చి, ప్యాషన్ ఉన్న వ్యక్తి కాబట్టే ఆ ఎనర్జీ సాధ్యమని శ్రీ విష్ణు ప్రశంసల వర్షం కురిపించారు.

ఎడిటర్ చోటా కె. ప్రసాద్ నిన్న వేరే సినిమాలో ఏదో చిన్న రోల్ చేసి వైరల్ అయ్యారని, రేపు ఆయన పూర్తిస్థాయిలో ఎడిటింగ్ చేస్తారో లేక యాక్టింగ్‌లోకి వెళ్ళిపోతారో తెలీదంటూ నవ్వులు పూయించారు. కోన వెంకట్ ప్రాజెక్ట్ అంటే ఇలాంటి ఫంక్షన్లు చాలానే జరుగుతాయని, ఈ టీజర్ ఈవెంట్ జస్ట్ శాంపిల్ మాత్రమేనని చెప్పారు. మున్ముందు రాబోయే పాటలు, ట్రైలర్ ప్రమోషన్లు మరింత జోరుగా సాగుతాయని భరోసా ఇచ్చారు. సినిమా చూసి ఆడియన్స్ ఫుల్లుగా ఎంజాయ్ చేసేలా అవుట్‌పుట్ వచ్చిందని, అక్టోబర్ 9న థియేటర్లలో కామ్రేడ్ సందడి మొదలవుతుందని శ్రీ విష్ణు వివరణ ఇచ్చారు.