'స్పిరిట్' చిన్న కథేనా..

ప్రభాస్ సినిమాలు ఈ మధ్య అన్నీ భారీ సెటప్‌లతోనే వస్తున్నాయి. ‘సాహో’, ‘సలార్’, ‘కల్కి’ ఒక్కోటి ఒక్కో పెద్ద ప్రపంచం చూపించాయి. ఇప్పుడు ‘ఫౌజీ’ కూడా పీరియడ్ బ్యాక్‌డ్రాప్‌లో వస్తోంది. అలాంటి టైమ్‌లో ‘స్పిరిట్’ ఎక్కువగా హైదరాబాద్‌లో నడిచే కథ అని నిర్మాత చెప్పడం కొంచెం వేరే ఫీలింగ్ ఇచ్చింది. మొదట బయట ప్రచారం మాత్రం దీనికి పూర్తిగా విరుద్ధంగా ఉంది.

డాన్ లీ సినిమాలో ఉంటాడని, కొరియన్ మాఫియా కనెక్షన్ ఉంటుందని, కథ చాలా దేశాల్లో తిరుగుతుందని చాలాకాలం టాక్ నడిచింది. కానీ నిర్మాత ప్రణయ్ రెడ్డి వంగా వాటికి క్లారిటీ ఇచ్చారు. డాన్ లీ సినిమాలో లేడని, కథ ఎక్కువగా హైదరాబాద్‌లోనే జరుగుతుందని చెప్పారు. దీంతో ‘స్పిరిట్’ను భారీ ఇంటర్నేషనల్ మాఫియా సినిమాగా ఊహించిన వాళ్ల లెక్క ఒక్కసారిగా మారిపోయింది.

అయితే సందీప్ రెడ్డి వంగా సినిమాలకు పెద్ద ప్రపంచం ఉండాల్సిందే అనే రూల్ లేదు. ‘అర్జున్ రెడ్డి’ మొత్తం విజయ్ దేవరకొండ పాత్ర మీదే నడిచింది. ‘యానిమల్’ పెద్ద సినిమా అయినా చివరకు ప్రేక్షకులు ఎక్కువగా మాట్లాడుకున్నది రణ్‌బీర్ పాత్ర, అతని కోపం, తండ్రితో ఉన్న బంధం గురించే. ‘స్పిరిట్’లో కూడా ప్రభాస్ పోలీస్ పాత్రను అదే స్థాయిలో బలంగా రాస్తే కథ హైదరాబాద్‌లో ఉందా, విదేశాల్లో ఉందా అన్నది పెద్ద విషయం కాకపోవచ్చు.

ప్రభాస్‌కు కూడా ఇలాంటి సినిమా ఈ సమయంలో అవసరమే అనిపిస్తోంది. గత కొన్ని సినిమాల్లో హీరోతో పాటు చాలా పాత్రలు, కొత్త ప్రపంచాలు, భారీ యాక్షన్ బ్లాక్స్ ఉన్నాయి. వాటన్నింటికీ మధ్య ప్రభాస్ పాత్రకు కూడా ఒక స్కేల్ అవసరమైంది. ‘స్పిరిట్’ లోకల్ కథ అయితే మాత్రం సినిమా ఎక్కువగా ఆయన పాత్ర చుట్టూనే తిరిగే అవకాశం ఉంటుంది. సందీప్ హీరో పాత్రలను రాసే విధానం చూస్తే ఈసారి ప్రభాస్ నుంచి కూడా రా పర్ఫామెన్స్ తీసుకునే ఛాన్స్ ఉంది.

ఇక ప్రీ క్లైమాక్స్‌లో పెద్ద ట్విస్ట్ ఉంటుందని, క్లైమాక్స్ సినిమాకు ప్రధాన బలం అవుతుందని టాక్ వినిపిస్తోంది. ఫ్లాష్‌బ్యాక్‌లో ప్రభాస్‌ను మరింత రఫ్‌గా చూపిస్తారనే సమాచారం కూడా ఉంది. త్రిప్తి డిమ్రి హీరోయిన్‌గా నటిస్తోంది. అంటే పెద్ద మాఫియా ప్రపంచం లేకపోయినా హీరో పాత్రలోనే మాస్, ఎమోషన్, షాక్ ఇచ్చేలా సందీప్ ప్లాన్ చేస్తున్నట్లు కనిపిస్తోంది.

ఇక్కడ మరో విషయం కూడా ఉంది. ప్రభాస్ ఇప్పుడు ఏ సినిమా చేసినా బడ్జెట్ భారీగా ఉండాలనే లెక్క ఏర్పడింది. ‘స్పిరిట్’ ఆ రూట్‌ను కొంచెం మార్చగలిగితే తర్వాత ఆయనకు కూడా వేరే కథలు చేయడానికి స్పేస్ వస్తుంది. ప్రతి సినిమా కోసం కొత్త ప్రపంచం, వందల కోట్ల సెట్స్ అవసరం లేకుండా ఒక బలమైన పాత్రతోనే పెద్ద మార్కెట్‌ను పట్టుకోవచ్చు. సందీప్ ‘స్పిరిట్’తో అదే చేసి చూపిస్తే ప్రభాస్ లైనప్‌లో ఈ సినిమా స్పెషల్ గా నిలబడే అవకాశం ఉంది.