ట్రైల‌ర్ టాక్: స్పైడ‌ర్‌మేన్ చిలిపి అల్ల‌రి అంత‌కుమించి..!

ప్ర‌పంచ‌వ్యాప్తంగా `స్పైడ‌ర్‌మేన్` ఫ్రాంఛైజీకి ఉన్న క్రేజ్ గురంచి తెలిసిందే. ఇప్ప‌టికే చాలా సినిమాలు బిలియ‌న్ల డాల‌ర్ల వ‌సూళ్లను సాధించాయి. ఇప్పుడు `స్పైడర్ మేన్: బ్రాండ్ న్యూ డే` విడుద‌ల‌కు సిద్ధ‌మ‌వుతోంది. ఈ ఉగాది రోజున‌ ట్రైలర్ విడుదలయ్యింది. ఈ ట్రైలర్ చూస్తుంటే మన ప్రియతమ సూపర్ హీరో పీటర్ పార్కర్ మళ్ళీ తన పాత చిలిపి అల్లరి వేషాలతో వినోదాన్ని పంచడానికి సిద్ధంగా ఉన్నాడని అర్థమవుతోంది. కేవలం సాహసాలే కాకుండా.. ఈ ట్రైలర్ లో గగుర్పొడిచే విన్యాసాలు, చిలిపి మాటలు, మనసుని హత్తుకునే ప్రేమ భావోద్వేగాలు అన్నీ నిండి ఉన్నాయి. పిల్లల నుండి పెద్దల వరకు అందరినీ ఒక విజువల్ ట్రీట్ లాంటి సాహస ప్రపంచంలోకి ఇది తీసుకెళ్లేలా ఉంది.

ఈ సరికొత్త అధ్యాయం `స్పైడ‌ర్‌మేన్‌- నో వే హోమ్` ఘనవిజయం తర్వాత నాలుగు సంవత్సరాల విరామంతో మొదలవుతుంది. ఇప్పుడు పీటర్ పార్కర్ ఒక పెద్దవాడిగా, ఎవరికీ తెలియని తన కొత్త జీవితాన్ని ఒంటరిగా గడుపుతున్నాడు. తనను ప్రేమించే వారందరి జ్ఞాపకాల నుండి తనను తాను చెరిపేసుకున్న తర్వాత.. న్యూయార్క్ నగరానికి అతను కేవలం ఒక పేరు లేని హీరో మాత్రమే. తన బాధ్యతల నడుమ అతడు ఎదుర్కొనే కొత్త సవాళ్లు ..అత‌డి శరీరంలో వచ్చే ఊహించని మార్పులు ఈ కథకు మరింత ఉత్కంఠను కలిగిస్తున్నాయి.

ట్రైలర్ లో స్పైడర్ మేన్ విన్యాసాలు, విలన్ల మధ్య జరిగే పిల్లి-ఎలుక ఆట ప్రేక్షకులను సీటు అంచున కూర్చోబెడుతుంది. పీటర్ పార్కర్ ఒకవైపు నేరాలను అరికడుతూనే.. మరోవైపు తన ఉనికిని కాపాడుకోవడానికి పడే తాపత్రయం ఇందులో స్పష్టంగా కనిపిస్తోంది. టోమ్ హాలండ్ తన అద్భుతమైన నటనతో మరొకసారి స్పైడర్ మేన్ పాత్రకు జీవం పోశారని ట్రైలర్ చెబుతోంది.

జులై 31న విడుదల కానున్న ఈ చిత్రం తెలుగు వెర్షన్ పై కూడా భారీ అంచనాలు నెలకొన్నాయి. హాలీవుడ్ సినిమాలు ఇప్పుడు తెలుగు మార్కెట్లో మంచి డిమాండ్ సంపాదించుకుంటున్న తరుణంలో స్పైడర్ మేన్ లాంటి యూనివర్సల్ అప్పీల్ ఉన్న సినిమాలు బాక్సాఫీస్ వద్ద స్థానిక మార్కెట్ల‌లోను రికార్డులు సృష్టించడం ఖాయం. తెలుగు సినీ ప్రమాణాలు గ్లోబల్ స్థాయికి చేరుకుంటున్న నేపథ్యంలో ఇటువంటి ప్రపంచ స్థాయి చిత్రాలు మన ప్రేక్షకులకు మరింత వినోదాన్ని పంచుతాయి.

మొత్తానికి `స్పైడర్ మేన్: బ్రాండ్ న్యూ డే` ఒక సరికొత్త ప్రారంభానికి నాందిగా భావించాలి. ట్రైల‌ర్ వీక్షించిన ప్ర‌తి ఒక్క‌రూ ఆ సాలెగూడులో చిక్కుకోవడానికి సిద్ధంగా ఉండండి. జులై 31న థియేటర్లలో ఈ సాహసయాత్రను వీక్షించాల‌న‌ని మ‌న‌సు ప‌డ‌టం ఖాయం.