ఆ సెటైర్లు వింటే ఇప్ప‌టికీ బాధ క‌లుగుతుంది

సినీ ప్రపంచంలో మెరిసే గ్లామర్ వెనుక చాలా సార్లు కనిపించని బాధలు, పోరాటాలు దాగి ఉంటాయి. అలాంటి నిజాయితీతో తన జీవితాన్ని పంచుకున్న వారిలో అల‌నాటి న‌టి స‌మీరా రెడ్డి ఒకరు. చిన్నతనంలో తాను నత్తిగా మాట్లాడేదాన్నని, దాని వల్ల స్కూల్ డేస్ లో హేళనను ఎదుర్కొన్నానని ఆమె రీసెంట్ గా ఓ ఇంటర్వ్యూలో వెల్లడించారు. చిన్ననాటి గాయాలు ఇంకా వెంటాడుతూనే ఉంటాయ‌ని ఆమె చెప్పిన మాటలు వినేవారిని కదిలించేలా ఉన్నాయి.

ఆ కామెంట్స్ మ‌న‌సుపై గాఢ ముద్ర‌ను వేశాయి

ఆమె చెప్పిన ప్రకారం, తనకు ఆత్మవిశ్వాసం పెరగడం అంత ఈజీగా జరగలేద‌ని తెలుస్తోంది. నత్తి కారణంగా తాను పలుమార్లు వెనుకబడిపోయాననే ఫీలింగ్ కలిగేదని, ఇతరుల వ్యాఖ్యలు తన మనసుపై గాఢమైన ముద్ర వేశాయని ఆమె గుర్తుచేసుకున్నారు. ఈ పరిస్థితి నుంచి బయటపడేందుకు కొన్నేళ్ల పాటు థెరపీ తీసుకున్నానని చెప్పడం ద్వారా మెంటల్ హెల్త్ ప్రాధాన్యతను ఆమె హైలైట్ చేశారు. థెరపీ త‌న‌పై త‌న‌కు నమ్మకాన్ని కలిగించింద‌ని, దాని ద్వారానే తానెవ‌ర‌నేది త‌న‌కు అర్థమయ్యేలా చేసింద‌నే భావనను ఆమె పంచుకున్నారు.

వ్య‌క్తిగ‌త పోరాటంగా స‌మీరా క‌థ‌

అయితే త‌ర్వాత దాన్నుంచి బయటపడినా గాయాలు మాత్రం పూర్తిగా మాయం కాలేదని ఆమె అంగీకరించారు. ఇప్పటికీ ఎవ‌రైనా తన మాట్లాడే విధానంపై సెటైర్లు వేస్తే బాధ కలుగుతుందని చెప్పడం, చిన్ననాటి అనుభవాలు ఎంత కాలం మనసులో నిలిచిపోతాయో స్పష్టంగా తెలియ‌చేస్తోంది. ఈ యాంగిల్ లో చూస్తే, సమీరా కథ ఒక వ్యక్తిగత పోరాటమే కాకుండా మానసిక ఆరోగ్యంపై ఒక బలమైన సందేశంగా నిలుస్తుంది.

వీక్, స్లో అని పిల‌వొద్దు

ఇక తల్లి పాత్రలోకి వచ్చిన తర్వాత, తన అనుభవాలను పిల్లల పెంపకంలో ఉపయోగించుకుంటున్నానని సమీరా చెప్పారు. పిల్లలను వీక్, స్లో అని పిలవడం ఎంత ప్రమాదకరమో ఆమె హెచ్చరించారు. అలాంటి పదాలు పిల్లల్లో భయాన్ని, ఆత్మన్యూనతను పెంచుతాయని, వారు నెమ్మదిగా సైలెంట్ అయిపోతారని ఆమె అభిప్రాయపడ్డారు. అందుకే తన పిల్లలకు ఏ సమస్య వచ్చినా తనతో ఓపెన్‌గా మాట్లాడాలని ప్రోత్సహిస్తానని, ఎవరినీ కించపరచేలా మాట్లాడకూడదని నేర్పుతానని చెప్పారు.

పిల్ల‌ల‌కు మ‌ద్ద‌తు అవ‌స‌రం

పేరెంట్స్, టీచర్స్, మరియు తోటి పిల్లలు కలిసి ఒక సపోర్టివ్ వాతావరణం కల్పిస్తే పిల్లలు తమ సమస్యలను ధైర్యంగా ఎదుర్కొంటార‌ని స‌మీరా అభిప్రాయ‌ప‌డ్డారు. పిల్ల‌ల్లో చిన్ననాటి మాటలు, అనుభవాలు వారి వ్యక్తిత్వాన్ని నిర్మిస్తాయని, అందుకే ప్రతి ఒక్కరూ బాధ్యతతో వ్యవహరించాల్సిన అవసరం ఉందని ఆమె సూచించారు. అయితే ఈ విష‌యం తెలుసుకున్న త‌ర్వాత అభిమానులు స‌మీరా జ‌ర్నీని కేవ‌లం గ్లామ‌ర్ స్టోరీగా కాకుండా న‌మ్మ‌కాన్ని తిరిగి పొందిన వ్య‌క్తి క‌థ‌గా చెప్పుకుంటున్నారు. కష్టాలను ఎదుర్కొని ముందుకు సాగాలనుకునే వారికి, అలాగే పిల్లలను ఎలా పెంచాలో ఆలోచించే ప్రతి ఒక్కరికీ, సమీరా కథ ఒక ప్రేరణగా మారుతోంది.