ట్రేండింగ్ లో సమంత ‘బంగారం’ ప్లాన్

సోషల్ మీడియాలో ఒక పాట వైరల్ అయితే సినిమా సగం జనాల్లోకి వెళ్ళిపోయినట్లే. ఇప్పుడు సమంత కూడా సరిగ్గా ఇదే ఫార్ములాను నమ్ముకుంది. తన కొత్త సినిమా ప్రమోషన్ల కోసం భారీ స్పీచ్‌లు, ఈవెంట్లు కాకుండా.. ఒకే ఒక్క పాటతో ఇన్‌స్టాగ్రామ్ రీల్స్‌ను షేక్ చేస్తోంది. ‘మా ఇంటి బంగారం’ అంటూ వస్తున్న ఈ సినిమా చుట్టూ ఇప్పుడిప్పుడే పాజిటివ్ బజ్ మొదలవుతోంది. అయితే కేవలం పాటలతోనే థియేటర్లకు జనం వస్తారా? లేక లోపల కంటెంట్ కూడా అదే రేంజ్‌లో ఉందా? అనే చర్చ ఇప్పుడు ఆసక్తికరంగా మారింది.

సినిమాలోని ‘తస్సాదియ్యా’ సాంగ్ ఇప్పుడు నెట్టింట ట్రెండ్ అవుతోంది. సంతోష్ నారాయణన్ మార్క్ బీట్స్‌కు తోడు, సమంత ఎనర్జీ తోడవ్వడంతో ఇప్పటికే 20 వేలకు పైగా రీల్స్ వచ్చాయి. ఈ సినిమాను మే 15న ప్రపంచవ్యాప్తంగా విడుదల చేయడానికి మేకర్స్ డేట్ ఫిక్స్ చేశారు. రీసెంట్‌గా వచ్చిన టీజర్ చూస్తుంటే, ఒక సాదాసీదా ఇల్లాలు తన కుటుంబాన్ని కాపాడుకోవడానికి చేసే పోరాటమే ఈ ‘మా ఇంటి బంగారం’ అని అర్థమవుతోంది.

ఈ సినిమాకు సమంత నిర్మాత కూడా. రాజ్ నిడిమోరు, హిమాంక్ దువ్వూరుతో కలిసి తన సొంత బ్యానర్ ‘ట్రాలాలా మూవింగ్ పిక్చర్స్’పై ఈ రిస్క్ తీసుకున్నారు. స్టార్ హోదా ఉన్నా సరే, సొంతంగా డబ్బులు పెట్టి సినిమా తీయడం అంటే అది ఒక అగ్ని పరీక్షే. అందుకే ప్రమోషన్ల విషయంలో వెన్నెల కిషోర్ లాంటి వాళ్లతో ఫన్నీ వీడియోలు చేయిస్తూ ఆడియన్స్‌ను ఎంగేజ్ చేసే ప్రయత్నం చేస్తోంది. ఎమోషనల్ ఫ్యామిలీ డ్రామాకు పక్కా యాక్షన్ సీన్లను జోడించి ఈ చిత్రాన్ని తెరకెక్కించారు.

నందిని రెడ్డి దర్శకత్వం వహిస్తున్న ఈ సినిమాలో గుల్షన్ దేవయ్య, శ్రీముఖి, గౌతమి వంటి నటులు కీలక పాత్రలు పోషిస్తున్నారు. ‘సిటాడెల్’ తర్వాత సమంత నుంచి వస్తున్న ప్రాజెక్ట్ కావడంతో ఆడియన్స్‌లో కూడా ఒక రకమైన అంచనాలు ఉన్నాయి. కేవలం గ్లామర్ పాత్రలకే పరిమితం కాకుండా, ఒక బాధ్యత గల గృహిణిగా ఆమె చేస్తున్న ఈ యాక్షన్ అటెంప్ట్ ఎంతవరకు సక్సెస్ అవుతుందో చూడాలి.

సమ్మర్ సీజన్ కాబట్టి ఫ్యామిలీ ఆడియన్స్ థియేటర్లకు వచ్చే ఛాన్స్ ఎక్కువగా ఉంది. సాంకేతికంగా సంతోష్ నారాయణన్ మ్యూజిక్ సినిమాకు పెద్ద బలం. ఇప్పటికే పాటలతో బజ్ క్రియేట్ చేయడంలో టీమ్ సక్సెస్ అయ్యింది. అయితే ఇదే ఊపు సినిమా రిలీజ్ వరకు కొనసాగుతుందా అన్నది చూడాలి. బాక్సాఫీస్ దగ్గర నిలబడాలంటే కేవలం సాంగ్స్ వైరల్ అయితే సరిపోదు, సినిమాలో ఎమోషన్ పక్కాగా పండాలి. ఇక మే 15న ఈ ‘బంగారం’ బాక్సాఫీస్ దగ్గర ఎలాంటి వండర్స్ క్రియేట్ చేస్తుందో మరికొద్ది రోజుల్లోనే తేలిపోనుంది.