రీల్ కాదు రియల్ హీరో.. అభిమాని కోసం రామ్ చేసిన పని వైరల్!

టాలీవుడ్‌లో స్టార్ హీరోల క్రేజ్ గురించి చాలా కథలు వినిపిస్తుంటాయి. కానీ కొన్నిసార్లు అభిమానుల కోసం వారు చేసే చిన్న పనులే వారిని నిజమైన హీరోలుగా నిలబెడతాయి. ఇప్పుడు అలాంటి సంఘటనే హీరో రామ్ పోతినేని విషయంలో సోషల్ మీడియాలో వైరల్ అవుతోంది. వెండితెరపై ఎనర్జిటిక్ పెర్ఫార్మెన్స్‌లతో అభిమానులను అలరించే రామ్, నిజజీవితంలో కూడా తన పెద్ద మనసును చాటుకున్నారు. గత 18 ఏళ్లుగా ఫ్రెడ్రిచ్ అటాక్సియా అనే అరుదైన నరాల సంబంధిత వ్యాధితో పోరాడుతున్న ఓ వీరాభిమాని కోరికను ఆయన స్వయంగా నెరవేర్చడం ఇప్పుడు అందరి హృదయాలను కదిలిస్తోంది.

అభిమాన హీరోని ఒక్కసారైనా కలవాలని త‌న అభిమాని చాలా కాలంగా కోరుకుంటోందని తెలుసుకున్న రామ్.. ఎలాంటి హడావుడి లేకుండా నేరుగా ఆమె ఇంటికే వెళ్లి పరామర్శించారు. కొద్దిసేపు ఆమెతో మాట్లాడి ధైర్యం చెప్పడమే కాకుండా కుటుంబ సభ్యులతో కూడా సమయం గడిపారు. ప్రస్తుతం ఈ ఘటనకు సంబంధించిన వీడియోలు, ఫొటోలు సోషల్ మీడియాలో వైరల్ అవుతుండగా.. రియల్ హీరో అంటే ఇలానే ఉండాలంటూ నెటిజన్లు ప్రశంసలు కురిపిస్తున్నారు.

ఫ్రెడ్రిచ్ అటాక్సియా అనేది చాలా అరుదుగా కనిపించే జన్యుపరమైన నరాల బలహీనత వ్యాధి. ఈ వ్యాధి వల్ల శరీర కదలికల సమన్వయం క్రమంగా దెబ్బతింటుంది. ముఖ్యంగా మెదడు, వెన్నుపాము, నరాల వ్యవస్థపై తీవ్ర ప్రభావం చూపుతుంది. నడిచేటప్పుడు బ్యాలెన్స్ కోల్పోవడం, చేతులు కాళ్ల బలహీనత, స్పష్టంగా మాట్లాడలేకపోవడం వంటి సమస్యలు తలెత్తుతాయి. వ్యాధి పెరిగే కొద్దీ రోగి సాధారణ జీవితం గడపడం కూడా కష్టమవుతుంది. కొందరికి గుండె సంబంధిత సమస్యలు, చూపు మందగించడం, వినికిడి తగ్గడం వంటి ఇబ్బందులు కూడా వస్తాయి. ఇలాంటి తీవ్రమైన పరిస్థితుల్లో ఉన్నా తన అభిమాన హీరోను కలవాలని ఆ యువతి ఎన్నో సంవత్సరాలుగా కలగన్నట్లు తెలుస్తోంది. ఆ విషయాన్ని తెలుసుకున్న రామ్.. ఆమె పరిస్థితిని అర్థం చేసుకుని ఎలాంటి ప్రచారం కోసం కాకుండా ఎంతో ఆప్యాయంగా ఇంటికెళ్లి పరామర్శించడం ఫ్యాన్స్ ను భావోద్వేగానికి గురిచేసింది. ఆమెతో ఫొటోలు దిగుతూ చిరునవ్వు పంచిన రామ్ తీరు ఇప్పుడు సోషల్ మీడియాలో ప్రత్యేక చర్చకు దారి తీసింది.

ఇక కెరీర్ విష‌యానికొస్తే, రామ్ ప్రస్తుతం తన కెరీర్‌లో కొత్త ప్రయోగానికి సిద్ధమవుతున్నారు. తన 23వ సినిమాగా తెరకెక్కుతున్న #RAPO23 ద్వారా డైరెక్ట‌ర్ గానూ కొత్త అవతారం ఎత్తుతున్నారు. ది స్టోరీ ఆఫ్ ఎ లోన్ వోల్ఫ్ అనే ట్యాగ్‌లైన్‌తో రూపొందుతున్న ఈ స్టైలిష్ సైకలాజికల్ యాక్షన్ థ్రిల్లర్‌పై ఇప్పటికే ఇండస్ట్రీలో ఆసక్తికర చర్చ మొదలైంది. జూన్ నుంచి రెగ్యులర్ షూటింగ్ ప్రారంభం కానున్న ఈ ప్రాజెక్ట్‌పై అభిమానుల్లో భారీ అంచనాలు నెలకొన్నాయి. ఒకవైపు ఈ క్రేజీ సినిమా పనుల్లో బిజీగా ఉంటూనే, మరోవైపు తన అభిమానిని కలిసేందుకు సమయం కేటాయించిన రామ్ వ్యవహారం ఆయన వ్యక్తిత్వాన్ని మరింత ఎత్తుకు తీసుకెళ్లింది. సాధారణంగా స్టార్ హీరోలు అభిమానులను మీటింగ్‌లలో లేదా ఈవెంట్‌లలో కలవడం చూస్తుంటాం. కానీ వారి ఇంటికే వెళ్లి ఓదార్చడం మాత్రం చాలా అరుదు. అందుకే ఇప్పుడు సోషల్ మీడియాలో రామ్‌పై ప్రశంసల వర్షం కురుస్తోంది.