నాని.. ఆ మాస్ లుక్ వెనుక పెద్ద కథే..

నేచురల్ స్టార్ నాని సాధారణంగా చాలా కూల్ గా కనిపిస్తుంటారు. కానీ ఈ మధ్య తన బాడీ లాంగ్వేజ్‌ను, రూపాన్ని పూర్తిగా మార్చేస్తున్నారు. ప్రస్తుతం జిమ్‌లో చేస్తున్న కసరత్తులు చూస్తుంటే నాని ఏదో పెద్ద అద్భుతం చేయబోతున్నారని అర్థమవుతోంది. సోషల్ మీడియాలో షేర్ చేసిన ఒక ఫోటో ఇప్పుడు ఇండస్ట్రీ వర్గాల్లో హాట్ టాపిక్ గా మారింది. నిశ్శబ్దంగా కష్టపడుతూ.. ఒక తుఫానును సిద్ధం చేస్తున్నట్లు నాని పెట్టిన పోస్ట్ వైరల్ అవుతోంది.

ప్రస్తుతం నాని పూర్తి ఫోకస్ శ్రీకాంత్ ఓదెల దర్శకత్వంలో తెరకెక్కుతున్న ‘ద ప్యారడైజ్’ మీద ఉంది. ఈ సినిమా కోసం నాని తన ఫిట్నెస్ ని పెంచి, ఒక రగ్గడ్ లుక్ లోకి మారిపోయారు. న్యూ హెయిర్ స్టైల్, గుబురు గడ్డంతో ఒక పక్కా మాస్ అవతారంలో కనిపిస్తున్నారు. ఒక రకంగా చెప్పాలంటే నాని తన కెరీర్ లోనే అత్యంత ఇంటెన్స్ లుక్ లో కనిపించనున్నట్లు అర్థమవుతోంది. ఈ ఏప్రిల్ నెలలో ఆయన చేస్తున్న ఈ బాడీ మేకోవర్ కేవలం ఒక సినిమా కోసమే కాదు, తన ఇమేజ్‌ను మరో మెట్టు ఎక్కించే ప్రయత్నం అని చెప్పొచ్చు.

ఇక నాని ముందు ఒక పెద్ద సవాల్ ఉంది. ఒకవైపు ‘ద ప్యారడైజ్’ కోసం పూర్తి మాస్ గా మారుతూనే, మరోవైపు సుజిత్ తో చేయబోయే ‘బ్లడీ రోమియో’ కోసం స్టైలిష్ గా కనిపించాల్సి ఉంటుంది. ఈ రెండు సినిమాల మధ్య ఉండే కాంట్రాస్ట్ చాలా ఎక్కువ. ‘జడల్’ అనే క్యారెక్టర్ లో ఉండే ఆ రఫ్ లుక్ నుంచి సుజిత్ మార్క్ అల్ట్రా మోడరన్ లుక్ కి మారడం అనేది నానికి ఒక మెంటల్ షిఫ్ట్ అని చెప్పాలి. అందుకే ఆయన ఏప్రిల్ నుంచి జూన్ వరకు తనను తాను ఫిజికల్ గా పూర్తి స్థాయిలో సిద్ధం చేసుకుంటున్నారు.

శ్రీకాంత్ ఓదెల సినిమాలో ఉండే ఆ మాస్ ఫ్లేవర్ కు తగ్గట్లుగా నాని ఇప్పుడు తన ఫిజిక్ ను ట్యూన్ చేసుకుంటున్నారు. ఇప్పటికే ఈ సినిమా నుంచి వచ్చిన ‘ఆయా షేర్’ సాంగ్ తో నాని క్రేజ్ పాన్ ఇండియా లెవల్లో పాకిపోయింది. ఒక సామాన్య నటుడి నుంచి ఒక యాక్షన్ హీరోగా ఎదగడానికి నాని ఎంచుకున్న మార్గం ఇది. జిమ్ లో చెమట చిందిస్తూ చేస్తున్న ఈ కసరత్తులు ద ప్యారడైజ్ లోని యాక్షన్ సీక్వెన్సుల కోసం అని స్పష్టంగా తెలుస్తోంది.

నాని తన సినిమాల విషయంలో ఎక్కడా కాంప్రమైజ్ అవ్వకుండా చాలా పక్కాగా ప్లాన్ చేసుకుంటున్నారు. అందుకే ‘బ్లడీ రోమియో’ షూటింగ్‌ను కూడా కాస్త వెనక్కి జరిపి, ఈలోపు తన మేకోవర్ పై దృష్టి పెట్టారు. అభిమానులు కూడా నానిలోని ఈ కొత్త యాంగిల్ ను చూసి థ్రిల్ అవుతున్నారు. కేవలం నటనతోనే కాకుండా తన ఫిజిక్ తో కూడా ప్రేక్షకులను మెప్పించాలని నాని పట్టుదలతో ఉన్నారు. ఈ ఏప్రిల్ లుక్ చూస్తుంటే ఆ తుఫాను ఏ రేంజ్ లో ఉండబోతోందో అర్థమవుతోంది.