అఫైర్ రూమర్స్ వేళ గణనాథుడి సన్నిధిలో గోవిందా!

బాలీవుడ్ నటుడు గోవిందా ముంబైలోని ప్రసిద్ధ లాల్‌బాగ్చా రాజా గణపతి మండపాన్ని దర్శించుకుని ప్రత్యేక పూజలు నిర్వహించారు. గణేష్ చతుర్థి వేడుకల్లో భాగంగా బప్పా ఆశీస్సులు పొందేందుకు వచ్చిన ఆయన చివరి హారతి వేడుకలో కూడా పాల్గొన్నారు. అయితే ఈ పర్యటనలో గోవింద‌ భార్య సునీతా అహుజాతో కాకుండా, తన రాబోయే చిత్రం `రూపా` కో-స్టార్ కోమల్ రాణి స్వర్ణకార్‌తో కలిసి రావడం చర్చనీయాంశంగా మారింది.

గోవిందా రాకకు కొన్ని గంటల ముందే సునీతా అహుజా ఒంటరిగా లాల్‌బాగ్చా రాజాను దర్శించుకుని పూజలు చేశారు. మధ్యాహ్నం సునీత ఒంటరిగా వచ్చి వెళ్లగా ఆ తర్వాత సాయంత్రం వేళ గోవిందా సహ నటి కోమల్ రాణితో కలిసి రావడం భక్తులను, మీడియా ప్రతినిధులను ఆశ్చర్యపరిచింది. భార్యాభర్తలిద్దరూ ఒకే రోజు వేర్వేరు సమయాల్లో దర్శనానికి రావడం ప్రాధాన్యత సంతరించుకుంది.

ఈ దర్శన సమయానికి గోవిందా సాంప్రదాయ తెల్లని కుర్తా-పైజామా ధరించగా, కోమల్ రాణి ఎరుపు, పసుపు రంగుల చీరలో సాంప్రదాయ ఆభరణాలతో కనిపించారు. పండల్‌కు చేరుకోగానే గణపతి బప్పా మోరియా అని నినాదాలు చేస్తూ అభిమానులకు అభివాదం చేశారు. పూజారి వారికి తిలకం దిద్ది పూజలు నిర్వహించగా, ఆ రోజు చివరి ఆరతిలో ఇద్దరూ పాల్గొని భక్తిశ్రద్ధలతో ప్రార్థనలు చేశారు.

గోవిందా-సునీతల వైవాహిక జీవితంలో విభేదాలు న‌డుస్తోన్న స‌మ‌యంలో? ఈ పర్యటన జరగడం విశేషం. ఇటీవల సునీతా అహుజా ఓ ఇంటర్వ్యూలో తమ కుమార్తె వయసున్న కోమల్ రాణితో గోవిందాకు సంబంధం ఉందంటూ తీవ్ర ఆరోపణలు చేశారు. దాదాపు 39 ఏళ్ల సుదీర్ఘ దాంపత్య బంధంలో అలజడులు రేగుతున్నాయనే పుకార్లకు ఈ వివాదం మరింత బలాన్ని చేకూర్చింది.

అయితే ఈ ఆరోపణలపై గోవిందా తీవ్రంగా స్పందించారు. తనపై వస్తున్న అఫైర్ వార్తలను ఖండిస్తూ తన భార్య సునీత పాడ్‌కాస్ట్‌లు, మీడియా వేదికగా ఇష్టారీతిన వ్యాఖ్యలు చేయవద్దని పరిమితుల్లో ఉండాలని సూచించారు. కోమల్ రాణి కేవలం తన రీ-ఎంట్రీ చిత్రం `రూపా`లో నటిస్తున్న సహ నటి మాత్రమేనని వారి మధ్య ఎలాంటి ఇతర అనుబంధం లేదన్నారు.

ఈ నేప‌థ్యంలో లాల్‌బాగ్చా రాజా మండపంలో గోవిందా, కోమల్ రాణి కలిసి పూజలు చేసిన వీడియోలు, ఫోటోలు సోషల్ మీడియాలో వైరల్ అవుతున్నాయి. వ్యక్తిగత జీవితంలో వివాదాలు నడుస్తున్నప్పటికీ గోవిందా `రూపా` సినిమాతో కమ్‌బ్యాక్ కోసం సిద్ధమవుతున్నారు. ఈ పర్యటన బాలీవుడ్ వర్గాల్లోనూ, అభిమానుల్లోనూ ఆసక్తికరమైన చర్చకు దారితీసింది.