మార్చి కొత్త చిత్రాలు.. ధురంధర్ 2ను తట్టుకోగలవా?

మార్చి నెల చివరి వారంలో పలు చిన్న సినిమాలు థియేటర్లలో సందడి చేయడానికి సిద్ధమవుతున్నాయి. అయితే ఈసారి పరిస్థితులు మాత్రం సాధారణంగా లేవు. ఎందుకంటే థియేటర్స్ లో బాలీవుడ్ భారీ చిత్రం ధురంధర్ 2 ఇప్పటికే బాక్సాఫీస్ వద్ద గట్టి ప్రభావాన్ని చూపుతోంది. దీంతో చిన్న సినిమాల పరిస్థితి ఏంటి అన్న ప్రశ్నలు ఇండస్ట్రీలో చర్చనీయాంశంగా మారాయి.

ఈ వారం విడుదలకు సిద్ధమైన చిత్రాల్లో బ్యాండ్ మేళం మూవీతోపాటు డబ్బింగ్ సినిమాలు యూత్, హ్యాపీ రాజ్ ప్రధానంగా ఉన్నాయి. ఆ సినిమాల్లో పెద్దగా స్టార్ క్యాస్టింగ్ లేకపోయినా, ప్రముఖ తెలుగు డిస్ట్రిబ్యూటర్లు వాటిని విడుదల చేస్తున్నారు. మంచి కంటెంట్ ఉంటే ప్రేక్షకులు ఆదరిస్తారని నమ్మకంతో వీటిని థియేటర్లకు తీసుకువస్తున్నారు.

కానీ ప్రస్తుత పరిస్థితుల్లో అవి నిలదొక్కుకోవడం అంత సులభం కాదు. ఇప్పటికే ధురంధర్ 2 భారీ వసూళ్లతో దూసుకుపోతూ ప్రేక్షకుల నుంచి మంచి రెస్పాన్స్ ను అందుకుంటోంది. యాక్షన్, ఎమోషన్స్, కొత్త తరహా కథనం సినిమాకు ప్రధాన బలంగా నిలిచాయి. ఆ ప్రభావం వల్ల ఇటీవల విడుదలైన ఉస్తాద్ భగత్ సింగ్ వంటి సినిమాలు కూడా బాక్సాఫీస్ వద్ద ఆశించిన స్థాయిలో నిలబడలేకపోయాయి.

ఇలాంటి పరిస్థితుల్లో చిన్న సినిమాలకు థియేటర్లలో షోలు దక్కడం కూడా కష్టంగా మారుతోంది. చాలా థియేటర్లు ఇంకా ధురంధర్ 2కే ప్రియారిటీ ఇస్తున్నాయి. ప్రేక్షకులు కూడా ఆ సినిమా వైపు మొగ్గు చూపుతున్నారని టాక్. అయితే చిన్న సినిమాలకు పూర్తిగా అవకాశాలు లేవని చెప్పలేం. మంచి కథ, ఆకట్టుకునే స్క్రీన్‌ ప్లే ఉంటే ప్రేక్షకులు ఎప్పుడూ ఆదరిస్తారనే నమ్మకం ఇండస్ట్రీలో ఉంది.

గతంలో కూడా పెద్ద సినిమాల మధ్యలో చిన్న చిత్రాలు హిట్ అయిన సందర్భాలు ఉన్నాయి. ఇప్పుడు కూడా అదే పరిస్థితి రిపీట్ అవుతుందా అన్నది ఆసక్తికరంగా మారింది. ఇంకా మరో విషయంపై కూడా చర్చ జరుగుతోంది. ఏ సినిమాకు అయినా మౌత్ పబ్లిసిటీ చాలా ముఖ్యం. మొదటి రోజు నుంచే మంచి టాక్ వస్తే, క్రమంగా థియేటర్లలో ప్రేక్షకుల సంఖ్య పెరిగే అవకాశం ఉంటుంది.

లేదంటే మొదటి వీకెండ్‌ కే ఆ సినిమాలు మాయమయ్యే ప్రమాదం కూడా ఉంది. ఏదేమైనా మార్చి చివరి వారంలో విడుదలవుతున్న ఆ చిన్న సినిమాలకు ఇది ఒక పెద్ద పరీక్షగా మారింది. ధురంధర్ 2 ప్రభావాన్ని తట్టుకుని నిలబడతాయా? లేక బాక్సాఫీస్ వద్ద పలు సినిమాల్లాగే ఇబ్బంది పడతాయా? అన్నది రాబోయే రోజుల్లో తేలనుంది. ఏదేమైనా ప్రేక్షకుల రెస్పాన్స్ పై వాటి ఫ్యూచర్ పూర్తిగా ఆధారపడి ఉందని చెప్పడంలో డౌట్ అక్కర్లేదు.