స్కూల్- కాలేజ్ రోజుల్లో NCC క్ర‌మ‌శిక్ష‌ణ‌.. చిరు, మాధ‌వ‌న్‌ని స్ఫూర్తిగా తీసుకోవాలి!

ఏ రంగంలోనైనా విజయం సాధించాలన్నా.. అనుకున్న లక్ష్యాలను చేరుకోవాలన్నా కేవలం ప్రతిభ ఉంటే సరిపోదు. దానికి తోడు క్రమశిక్షణ, సమయపాలన, కష్టపడే తత్వం ఉన్నప్పుడే మనిషి ఉన్నత స్థాయికి ఎదుగుతాడు. ఇటీవల రాజానగరంలో వైద్య విద్యార్థులతో ముచ్చటించిన సందర్భంగా మెగాస్టార్ చిరంజీవి కూడా ఇదే విషయాన్ని విద్యార్థుల‌కు సూచించారు. ``జీవితంలో ఉన్నత స్థాయికి చేరాలంటే ప్రతిభతో పాటు క్రమశిక్షణ, సమయపాలన ఎంతో ముఖ్యం. కళాశాల రోజుల్లో ఎన్‌సీసీ (NCC) క్యాడెట్‌గా నేను అలవర్చుకున్న శ్రమ, క్రమశిక్షణలే ఈ రోజుకీ నన్ను నడిపిస్తున్నాయి`` అని ఆయన స్పష్టం చేశారు. విద్యార్థి దశలోనే అలవడే ఈ లక్షణాలు వ్యక్తి జీవిత గమనాన్ని ఎలా మారుస్తాయో చెప్పడానికి చిరంజీవి ప్రయాణమే ఒక ప్రత్యక్ష ఉదాహరణ.

తెలుగు చలనచిత్ర పరిశ్రమలో స్వయంకృషితో అగ్రకథానాయకుడిగా ఎదిగిన చిరంజీవి తన విద్యార్థి దశలో ఎన్‌సీసీ నావల్ క్యాడెట్‌గా ఎంతో కఠినమైన శిక్షణ పొందారు. దిల్లీలో జరిగిన గణతంత్ర దినోత్సవ పరేడ్‌లోనూ పాల్గొన్న అనుభవం ఆయనకుంది. ఆ రోజుల్లో ఆర్మీ డ్రిల్స్, శిక్షణ ద్వారా నేర్చుకున్న క్రమశిక్షణే ఆ తర్వాత సినీ రంగంలో వరుస షూటింగ్‌లు, కఠినమైన డ్యాన్స్ మూవ్‌మెంట్స్ .. సుదీర్ఘమైన కెరీర్‌లో ఏమాత్రం అంకితభావం తగ్గకుండా పనిచేయడానికి ఆయనకు పునాదిగా నిలిచింది. ఒక సాధారణ నటుడిగా ప్రయాణం ప్రారంభించి `మెగాస్టార్`గా ఎదగడానికి ఆయనలోని ఎన్‌సీసీ క్యాడెట్ క్వాలిటీనే ప్రధాన కారణం.

చిరంజీవి ఒక్కరే కాదు.. భారతీయ చలనచిత్ర పరిశ్రమలో పాన్-ఇండియా స్థాయిలో అద్భుత గుర్తింపు తెచ్చుకున్న వర్సటైల్ యాక్టర్ ఆర్. మాధవన్ కూడా ఎన్‌సీసీ నేపథ్యం ఉన్నవారే. కొల్హాపూర్ రాజారామ్ కాలేజీలో చదువుతున్న సమయంలో మాధవన్ బెస్ట్ ఎన్‌సీసీ క్యాడెట్‌గా ఎంపికయ్యారు. భారతదేశం తరఫున కెనడాలో యూత్ కల్చరల్ అంబాసిడర్‌గా పాల్గొనడమే కాకుండా... బ్రిటీష్ సైన్యంతో కలిసి శిక్షణ పొందే అరుదైన అవకాశాన్ని కూడా సాధించారు. ఎన్‌సీసీ ద్వారా లభించిన ఆత్మవిశ్వాసం, నాయకత్వ లక్షణాలు, అంకితభావమే మాధవన్‌ను దక్షిణాది నుంచి బాలీవుడ్ వరకు తిరుగులేని నటుడిగా నిలబెట్టాయి.

కేవలం ఈ ఇద్దరు హీరోలే కాకుండా, భారతీయ చిత్రసీమలోని మరికొందరు ప్రముఖులు కూడా ఎన్‌సీసీ క్యాడెట్లుగా రాణించారు. బాలీవుడ్ - హాలీవుడ్‌లో దిగ్గజ నటుడిగా పేరుగాంచిన అనుపమ్ ఖేర్ తన విద్యార్థి దశలో ఎన్‌సీసీ శిక్షణ పొంది.. దేశంపై మక్కువను.. జీవిత పాఠాలను నేర్చుకున్నట్లు తెలిపారు. అలాగే ప్రముఖ నటి దివ్య త్రిపాఠి కూడా ఎన్‌సీసీ క్యాడెట్‌గా సేవలు అందించి.. ఆ శిక్షణే తనకు జీవితంలో నమ్మకాన్ని, క్రమశిక్షణను ప్రసాదించిందని వెల్లడించారు. వీరందరి విజయాల వెనుక ఎన్‌సీసీ అందించిన కఠిన శిక్షణ ఎంతటి కీలక పాత్ర పోషించిందో సులభంగా అర్థం చేసుకోవచ్చు.

విద్యార్థి దశ అనేది వ్యక్తిత్వ వికాసానికి అత్యంత కీలకమైన సమయం. ఆ సమయంలో క్రమశిక్షణ, సమయపాలన .. కష్టపడే మనస్తత్వాన్ని అలవర్చుకుంటే ఎలాంటి సవాళ్లనైనా ఎదుర్కొని ఉన్నత శిఖరాలను అధిరోహించవచ్చనడానికి ఈ సినీ ప్రముఖుల జీవితాలే నిదర్శనం. నేటి యువత కూడా కేవలం చదువు-మార్కుల కోస‌మే పరిమితం కాకుండా ఎన్‌సీసీ వంటి వ్యవస్థల ద్వారా క్రమశిక్షణను నేర్చుకుంటే, భవిష్యత్తులో ఎంచుకున్న ఏ రంగంలోనైనా తిరుగులేని విజేతలుగా నిలుస్తారనడంలో సందేహం లేదు.