లెజెండ్ స్టోరి: 47 ఏళ్ల కెరీర్ జ‌ర్నీ - చిరు ది గ్రేట్

భార‌తీయ సినిమాలో తెలుగు సినిమా స్థాయిని పెంచిన‌ క‌మ‌ర్షియ‌ల్ హీరోగా మెగాస్టార్ చిరంజీవికి గొప్ప గుర్తింపు ఉంది. తెలుగు సినిమా హిస్ట‌రీలో ఆయ‌న నాలుగున్న‌ర‌ ద‌శాబ్ధలు పైగా కెరీర్ ర‌న్ ని విజ‌య‌వంతంగా కొన‌సాగించారు. 70 వ‌య‌సులోను చిరు ఎంతో ఎన‌ర్జిటిక్ గా సినిమాల్లో న‌టిస్తున్నారు. ఏజ్ లెస్ హీరోగా ఫిజిక‌ల్ ఫిట్నెస్ ని మెయింటెయిన్ చేస్తూ అంద‌రినీ ఆశ్చ‌ర్య‌ప‌రుస్తున్నారు.

ఏజ్ లెస్ హీరోయిజం:

ఆస‌క్తిక‌రంగా 70వ‌య‌సులో 47 ఏళ్లు ఏకంగా సినిమాకే అంకితమిచ్చిన మేటి న‌టుడు మ‌న‌ మెగాస్టార్.

తెలుగు సినిమా హిస్ట‌రీలో ఇంత‌టి సుదీర్ఘ కెరీర్ ని కొన‌సాగించిన చిరు ప్ర‌స్థానం అసాధార‌ణ‌మైన‌ది. ఎన్నో అసాధార‌ణ విజ‌యాలు.. స్ఫూర్తిని నింపే ప్ర‌య‌త్నాలు ఆయ‌న జీవితంలో క‌నిపిస్తాయి.

దిగ్గ‌జ న‌టులకు వార‌సుడు:

తెలుగు సినిమా ఘ‌న‌త‌ను ఎన్టీఆర్, ఏఎన్నార్, కృష్ణ‌ వంటి దిగ్గ‌జాల త‌ర్వాత చెప్పుకోద‌గ్గ రీతిలో ప్ర‌భావితం చేసిన, కొత్త స్థాయిల‌కు తీసుకెళ్లిన‌ అసాధార‌ణ న‌టుడు మెగాస్టార్ చిరంజీవి. టాలీవుడ్‌ను క‌మ‌ర్షియ‌ల్ గా పెద్ద ఎత్తుకు చేర్చిన‌ ఘ‌న‌త మెగాస్టార్ చిరంజీవికి ద‌క్కుతుంది. త‌న కాలంలో వ‌యో లింగ భేధం లేకుండా అన్ని వ‌ర్గాల ప్ర‌జ‌ల్ని అల‌రించిన మేటి క‌థానాయ‌కుడు చిరు. 6 నుంచి 60 వ‌ర‌కూ ప్ర‌తి ఇంట్లో ప్ర‌తి ఒక్క‌రూ చిరంజీవిని త‌మ‌వాడిగా భావిస్తారు. అంద‌రి వాడుగా ఆయ‌న‌ను చూస్తారు. చిరు న‌టించిన సినిమా చూడ‌డం ఒక‌ అవ‌స‌రంలా భావిస్తారు. అందుకే తెలుగు సినిమా వాణిజ్యానికి కేంద్ర బిందువు అయ్యారు. బాక్సాఫీస్ గ‌ణాంకాల‌ను అనూహ్యంగా మ‌లుపు తిప్పిన క‌మ‌ర్షియ‌ల్ సినీదిగ్గ‌జంగా చిరంజీవి చ‌రిత్ర‌ను లిఖించారు.

పునాది వేసిన ప్రాణం ఖ‌రీదు:

కెరీర్ లో పునాది రాళ్లు(1979) చిత్రానికి తొలి సంత‌కం చేసినా `ప్రాణం ఖ‌రీదు` మొద‌టగా రిలీజైంది. 22 సెప్టెంబ‌ర్ 1978లో ఈ చిత్రం విడుద‌లైంది. ఇప్ప‌టికి ఈ సినిమా విడుద‌లై 47 సంవ‌త్స‌రాలైంది. ఐదు ద‌శాబ్ధాల‌కు చేరువ‌లో అత‌డు శిఖ‌రం ఎత్తుకు చేరుకున్నారు. భార‌త‌దేశం గ‌ర్వించ‌ద‌గ్గ అసాధార‌ణ న‌టుల‌లో ఒక‌రిగా ఆయ‌న సుస్థిర స్థానం ద‌క్కించుకున్నారు.

ఆరంభంలో కీల‌క మ‌లుపు:

బాపు తెర‌కెక్కించిన మ‌న ఊరి పాండ‌వులు(1978) విజ‌యం చిరుకి కెరీర్ ప‌రంగా ఆరంభ రేజుల్లోనే ఒక‌ మేలి మ‌లుపు. చిత్ర‌ప‌రిశ్ర‌మ త‌న ప్ర‌తిభ‌ను ఎలా ఉప‌యోగించుకోవాలో అలా వినియోగించుకుంటుంద‌ని అప్ప‌టికి యువ‌కుడైన‌ చిరంజీవి న‌మ్మ‌కం. అందుకే ప్ర‌తినాయ‌క పాత్ర‌లు చేయ‌డానికి సైతం కెరీర్ ఆరంభంలో వెన‌కాడ‌లేదు. తొలుత త‌న సీనియ‌ర్లు అయిన‌ ఎన్టీ రామారావుతో `తిరుగులేని మ‌నిషి`, కృష్ణ తో క‌లిసి `కొత్త పేట రౌడీ`, శోభ‌న్ బాబుతో `మోస‌గాడు` వంటి చిత్రాల్లో విల‌న్ పాత్ర‌ల్లో న‌టించారు..1980లో నెగెటివ్ షేడ్ ఉన్న హీరో పాత్ర `పున్న‌మి నాగు` చిరుకి ఆరంభంలోనే గొప్ప మ‌లుపు. త‌న‌లో న‌టుడిని చాలా ఎత్తున ఆవిష్క‌రించిన చిత్ర‌మిది. అప్ప‌ట్లో ఇది చిరుకు యువ‌త‌లో ప్ర‌త్యేక‌మైన‌ క్రేజును పెంచింది. న‌టుడిగా వ్య‌క్తిగ‌తంగానూ 1980 ఆయ‌న‌కు మ‌ర‌పురాని సంవ‌త్స‌రంగా మారింది.

అల్లు వారి అల్లుడుగా...

ఇదే ఏడాది సుప్ర‌సిద్ధ నిర్మాత‌ అల్లు రామ‌లింగ‌య్య గారి కుమార్తె సురేఖ‌ను చిరంజీవి పెళ్లాడారు. ప్ర‌ముఖ నిర్మాత‌కు అల్లుడుగా చిరు క్రేజ్ మ‌రింత పెరిగింది. 1982లో ఇంట్లో రామ‌య్య వీధిలో కృష్ణ‌య్య .. శుభ‌లేఖ చిత్రాలు మోడ్ర‌న్ హీరోగా గుర్తింపును తెచ్చి పెట్టాయి. చిరంజీవి రాక‌తో తెలుగు సినిమా మౌలిక ల‌క్ష‌ణాలు మారిపోయాయి. అంత‌వ‌ర‌కూ ధీరోదాత్త‌త ఉన్న హీరో పాత్ర‌ల స్థానే హీరోదాత్త‌త ప్ర‌స్పుటంగా క‌నిపించే పాత్ర‌లు చోటు చేసుకోవ‌డం ప్రారంభించాయి.

రియ‌ల్ గేమ్ ఛేంజ‌ర్ ఇదే:

1982లో విడుద‌లైన `ఖైదీ` చిత్రం తెలుగు సినిమా రూపురేఖ‌ల్ని స‌మూలంగా మార్చివేసింది. చిరంజీవి కెరీర్ లో బిగ్గెస్ట్ హిట్ చిత్రంగా నిలిచిన ఖైదీ అత‌డికి మాస్ హీరోగా అసాధార‌ణ ఫాలోయింగ్ ని తెచ్చింది. చిరు కెరీర్ కీల‌క మ‌లుపు ఇది. ఎ.కోదండ రామిరెడ్డి దర్శ‌క‌త్వంలో వ‌చ్చిన `ఖైదీ` చిరంజీవిలోని యాక్ష‌న్ స్టార్ ని బ‌య‌ట‌కు తీసింది. ఆయ‌న‌ స్టార్ డ‌మ్‌ని అమాంతం పెంచేసింది ఈ చిత్రం. ఖైదీ చిత్రం తెలుగు సినిమా గ‌మ‌నాన్నే మార్చివేసింది. ఈ చిత్రంతో తెలుగు సినీప‌రిశ్ర‌మ‌లో ఎదురేలేని హీరోగా స్థిర‌ప‌డ్డారు చిరంజీవి.

ఎన్టీఆర్, కృష్ణ త‌ర్వాత మాస్‌లో...

మ‌గ‌మ‌హారాజు-అభిలాష‌-విజేత‌-మ‌గ‌ధీరుడు వంటి చిత్రాలు కుటుంబ క‌థ‌ల‌తో తెర‌కెక్కి ఫ్యామిలీ ప్రేక్ష‌కుల్ని అభిమానులుగా మారిస్తే.. మంత్రిగారి వియ్యంకుడు-ఛాలెంజ్ - సంఘ‌ర్ష‌ణ వంటి చిత్రాలు యువ‌త‌ను చేరువ చేసాయి. రాక్ష‌సుడు క‌మ‌ర్షియ‌ల్ గా ప‌రిధిని పెంచితే ఆరాధ‌న న‌టుడిగా ఆయ‌న‌లోని కొత్త కోణాన్ని ఆవిష్క‌రించింది. 80వ ద‌శ‌కం ఆరంభంలో అద్భుత‌ విజ‌యాలతో కెరీర్ ని సుసంప‌న్నం చేసుకుంటూ మాస్ ప్రేక్ష‌కుల్లో తిరుగులేని మ‌హ‌త్త‌ర శ‌క్తిగా ఎదిగారు చిరంజీవి. దాదాపు మూడు ద‌శాబ్ధాలు ఆ ప్ర‌భంజ‌నం అదే వ‌రుస కొన‌సాగింది. ఎన్టీ రామారావు, కృష్ణ‌ త‌ర్వాత‌ మాస్ లో అంత‌టి ఫాలోయింగ్ సంపాదించుకున్న హీరోగా చిరంజీవి ఎదిగారు. ప్ర‌తి సినిమాలో వైవిధ్యం కోసం చిరు త‌పించేవారు. న‌ట‌న‌లో, డ్యాన్సుల్లో ప‌రిణ‌తిని వైరుధ్యాన్ని ప్ర‌ద‌ర్శిస్తూ వ‌చ్చిన చిరంజీవి తెలుగు సినిమా వాణిజ్య విస్త్ర‌తిని అమాంతం పెంచారు. చిరంజీవి న‌టించిన ప్ర‌తి సినిమా ట్రేడ్ ప‌రంగా విప‌రీత‌మైన సంచ‌ల‌నాలను సృష్టించాయి. ప‌రిశ్ర‌మ వ్యాపార వ‌ర్గాలు విస్తుపోయి విస్మ‌యం పొందే రీతిలో చిరంజీవి సినిమాల‌ బిజినెస్ సాగింది. అంత‌వ‌ర‌కూ సినిమా ప‌రిశ్ర‌మ ఎరుగ‌ని వాణిజ్య‌పు లెక్క‌లు చిరంజీవి సినిమాల‌తోనే చ‌రిత్ర‌లో వెలుగు చూశాయి.

తొలి తెలుగు క‌థానాయ‌కుడు:

నేటి తెలుగు సినిమా వ్యాపారానికి స‌మూల‌మైన మార్పులు తీసుకొచ్చి సువ‌ర్ణ‌మ‌య‌పు దారులు వేసిన‌ తొలి తెలుగు క‌థానాయ‌కుడు చిరంజీవి అంటే అతిశ‌యోక్తి కాదు అని ప్ర‌ముఖ ద‌ర్శ‌క‌నిర్మాత‌లు విశ్లేషించారు. మూస‌ధోర‌ణిలో డ్యాన్సులు చేసే ప‌ద్ధ‌తుల‌కు స్వ‌స్థి చెప్పి పాశ్చాత్య నృత్య రీతుల‌ను చేయ‌డం నేర్పింది చిరంజీవి. ప‌సివాడి ప్రాణం సినిమాతో బ్రేక్ డ్యాన్సులు ప్ర‌వేశ‌పెట్టి నృత్యాల్ని కొత్త పోక‌డ ప‌ట్టించిన హీరో చిరంజీవి. కె.రాఘ‌వేంద్ర‌రావు ద‌ర్శ‌క‌త్వంలో కొండ‌వీటి దొంగ‌- జ‌గ‌దేక వీరుడు అతిలోక సుంద‌రి- ఘ‌రానా మొగుడు వంటి క‌మ‌ర్షియ‌ల్ బ్లాక్ బ‌స్ట‌ర్ల‌తో సంచ‌ల‌నాలు న‌మోదు చేశారు. కె.విశ్వ‌నాథ్ ద‌ర్శ‌క‌త్వంలో శుభ‌లేఖ కుటుంబ ఆడియెన్ ని చేరువ చేసింది.

90ల‌లో కీల‌క మ‌లుపు :

అంజ‌నా ప్రొడ‌క్ష‌న్స్ `రుద్ర‌వీణ` జాతీయ ఉత్త‌మ ప్రాంతీయ చిత్రంగా సంచ‌ల‌నం సృష్టించింది. 1990లో వ‌ర‌ద‌ల్లో `జ‌గ‌దేక వీరుడు అతిలోక సుంద‌రి` చిరు కెరీర్ లో మ‌రో కీల‌క మ‌లుపు. ఆ త‌ర్వాత‌ `ఘ‌రానా మొగుడు` చిరంజీవి మాస్ ఇమేజ్ ని స్కైలోకి తీసుకెళ్లింది. మ‌ధ్య‌లో కొన్ని ఒడిదుడుకులు ఉన్నా హిట్ల‌ర్- మాస్ట‌ర్ - బావ‌గారు బాగున్నారా- ఇద్ద‌రు మిత్రులు- అన్న‌య్య లాంటి హిట్ చిత్రాల్లో నటించారు. ఇంద్ర - ఠాగూర్ - స్టాలిన్ లాంటి సంచ‌ల‌న చిత్రాలు తెలుగు ప్ర‌జ‌ల మ‌న‌న్న‌న‌లు అందుకున్నాయి. సైరా న‌ర‌సింహారెడ్డి తో పాన్ ఇండియా స్టార్ గా త‌న‌ను తాను ఆవిష్క‌రించుకున్నారు. సైరా చిత్రానికి హిందీ క్రిటిక్స్ నుంచి గొప్ప ప్ర‌శంస‌లు కురిసాయి. ఇటీవ‌ల గాడ్ ఫాద‌ర్ చిత్రంలో త‌న న‌ట‌న‌కు మంచి పేరొచ్చింది. అలాగే వాల్తేరు వీర‌య్య చిత్రంతో మ‌రోసారి త‌న‌లోని మాస్ ని బ‌య‌ట‌కు తీసి గ్రాండ్ స‌క్సెస్ అందుకున్నారు. ఇప్పుడు వీట‌న్నిటి కంటే విభిన్న‌మైన ఫాంట‌సీ క‌థాంశంతో విశ్వంభ‌ర తెర‌కెక్కుతోంది. ఈ సినిమా పోస్ట‌ర్లు ఇప్ప‌టికే ఫ్యాన్స్ ప్ర‌జ‌ల్లో గొప్ప క్రేజ్ ని పెంచాయి. 2025 సంక్రాంతి కానుక‌గా ఈ సినిమా విడుద‌ల కానుంది.

ప్ర‌జాసేవ‌లో మ‌హిమాన్వితుడు:

స్టార్ హీరోగా ఎంతో ఎత్తుకు ఎదిగిన చిరంజీవి ప్ర‌జాసేవ‌లోను శిఖ‌రం ఎత్తు అని నిరూపించారు. 1998 అక్టోబ‌ర్ లో చిరంజీవి చారిట‌బుల్ ట్ర‌స్ట్ స్తాపించి ఐ అండ్ బ్ల‌డ్ బ్యాంకుల‌తో సేవ‌లు ప్రారంభించారు. ప్ర‌పంచ‌వ్యాప్తంగా ఉన్న త‌న‌ అభిమానులను ఇందులో భాగం చేశారు. త‌లసేమియా అనే ప్ర‌మాద‌క‌ర రుగ్మ‌త ఉన్న వారిని ఆదుకునేందుకు చిరు త‌న‌వంతు కృషి చేస్తున్నారు.

పుర‌స్కారాలలో ఘ‌న చ‌రిత‌:

స్వ‌యం కృషి- ఆప‌ద్భాంద‌వుడు వంటి సినిమాలు చిరంజీవిలోని న‌టుడిని మ‌రో కోణంలో ప‌రిచ‌యం చేసాయి. కెరీర్ లో నంది అవార్డులు, జాతీయ అవార్డుల‌ను అందుకున్నారు. ఫిలింఫేర్‌లు, ఇత‌ర ప్ర‌యివేట్ పుర‌స్కారాల‌కు అయితే కొద‌వే లేదు. ఒక న‌టుడిగానే కాకుండా ఒక మ‌నిషిగా ఆయ‌న చేసిన సేవ‌ల్ని ప్ర‌భుత్వాలు గుర్తించాయి. చాలా కాలం త‌ర్వాత‌ కేంద్ర ప్ర‌భుత్వం ప‌ద్మ‌భూష‌ణ్‌, ప‌ద్మ‌విభూష‌ణ్ బిరుదుల‌తోను స‌త్క‌రించింది. త‌న సీనియ‌ర్ న‌టుల విష‌యంలో ఎప్ప‌టికీ విధేయ‌త‌తో ఉండే మెగాస్టార్ చిరంజీవి.. న‌వ‌ర‌స‌న‌ట‌సార్వ‌భౌమ సీనియ‌ర్ ఎన్టీఆర్ కి `భార‌త‌ర‌త్న` ఇవ్వాల‌ని డిమాండ్ చేస్తున్నారు.

ఓవ‌ర్ నైట్ స్టార్ కాదు:

చాలామందిలా మెగాస్టార్ ఓవ‌ర్‌నైట్ స్టార్ కాదు. ప‌డుతూ లేస్తూ ఒడిదుడుకుల‌ను ఎదుర్కొంటూ అజేయంగా ఎదిగిన స్ఫూర్తి ప్ర‌ధాత‌. నేడు 157 సినిమాల్లో న‌టించిన అజేయ‌మైన స్టార్ మ‌న మెగాస్టార్. వ‌రుస‌గా సినిమాల్లో న‌టిస్తూ డ‌బుల్ సెంచ‌రీ వైపు అడుగులు వేస్తూ చ‌రిత్ర సృష్టించ‌బోతున్నారు.

ఆ రోజుల్లోకి తీసుకెళ్ల‌డం ఖాయం:

ప్ర‌స్తుతం సోషియో ఫాంట‌సీ చిత్రం `విశ్వంభ‌ర‌` (మెగా 157)లో చిరు యంగ్ లుక్ తో క‌నిపిస్తున్నారు. చిరు కెరీర్ బెస్ట్ హిట్ చిత్రం `జ‌గ‌దేక వీరుడు అతిలోక సుంద‌రి` లైన్స్ లో వ‌స్తున్న సినిమా కావ‌డంతో అంద‌రిలో ఒక‌టే ఆస‌క్తి నెలకొంది. ఫాంట‌సీ చిత్రంలో చిరు త‌న‌దైన అద్భుత న‌ట ప్ర‌ద‌ర్శ‌న‌తో మ‌రోసారి నాటి రోజుల్లోకి తీసుకెళ‌తార‌ని అభిమానులు భావిస్తున్నారు.