'అనగనగా ఒక రాజు' సెన్సార్.. నవ్వుకు నో ఏజ్ లిమిట్..

టాలీవుడ్ యంగ్ హీరో నవీన్ పోలిశెట్టి నటిస్తున్న అనగనగా ఒక రాజు మూవీ.. సంక్రాంతి పండుగ కానుకగా థియేటర్స్ లో రిలీజ్ కానున్న విషయం తెలిసిందే. కంప్లీట్ ఫ్యామిలీ ఎంటర్టైనర్ గా రూపొందిన ఆ సినిమాకు మారి దర్శకత్వం వహిస్తుండగా.. యంగ్ ప్రొడ్యూసర్ నాగవంశీ నిర్మిస్తున్నారు. జనవరి 14వ తేదీన సినిమా గ్రాండ్ గా రిలీజ్ కానుండగా.. అన్ని పనులు పూర్తి చేస్తున్నారు. ప్రమోషన్స్ వినూత్నంగా నిర్వహిస్తున్నారు.

అయితే తాజాగా సెన్సార్ ఫార్మాలిటీస్ కంప్లీట్ చేశారు మేకర్స్. సెన్సార్ బోర్డు అధికారులు.. అనగనగా ఒక రాజు మూవీ యూ/ఏ సర్టిఫికెట్ జారీ చేశారు. ఆ విషయాన్ని తాజాగా మేకర్స్ సోషల్ మీడియాలో వెల్లడించారు. అనగనగా ఒక రాజు – యూ/ఏ సర్టిఫికెట్ పొందిందని, నవ్వుకు ఏజ్ లిమిట్ లేదని రాసుకొచ్చారు. అదే సమయంలో స్పెషల్ పోస్టర్ రిలీజ్ చేయగా.. ప్రస్తుతం అది ఫుల్ వైరల్ గా మారింది.

కొత్త పోస్టర్‌ లో నవీన్ పోలిశెట్టి బుల్లెట్ బైక్‌ పై కూర్చుని పల్లెటూరిలో ఎవరికో చేతులు ఊపుతూ పలకరిస్తూ కనిపించారు. సాధారణ యువకుడి లుక్‌ లో, చలాకీగా నవ్వుతూ ఉన్న నవీన్.. తనదైన శైలిలో ఆకట్టుకున్నారు. అయితే సినిమాకు 2 గంటల 20 నిమిషాల రన్ టైం కూడా లాక్ చేసినట్లు తెలుస్తోంది. ఇప్పుడు సెన్సార్ కార్యక్రమాలు పూర్తి కావడంతో సినిమా.. ఎలాంటి ఆటంకాలు లేకుండా ప్రేక్షకుల ముందుకు రాబోతుంది.

ఇక సినిమా విషయానికొస్తే.. నవీన్ పోలిశెట్టి సరసన యంగ్ బ్యూటీ మీనాక్షి చౌదరి హీరోయిన్ గా నటిస్తున్నారు. సీనియర్ నటుడు రావు రమేష్ కీలక పాత్ర పోషిస్తున్నారు. తారక్ పొన్నప్ప, నాగ్ రాజ్ కొట్టు, సాన్వి మేఘన తదితరులు ఇతర పాత్రల్లో కనిపించనున్నారు. మిక్కీ జె. మేయర్ మ్యూజిక్ అందిస్తుండగా, జె. యువరాజ్ సినిమాటోగ్రాఫర్ గా వర్క్ చేశారు. సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ బ్యానర్లపై నాగవంశీ, సాయి సౌజన్య నిర్మించారు.

ఒక వినోదాత్మకమైన పెళ్లి నేపథ్యంలో సాగే కథతో రూపొందిన సినిమాపై ఇప్పటికే ఆడియన్స్ లో భారీ అంచనాలు నెలకొన్నాయి. దానికి తోడు మేకర్స్.. ప్రమోషన్స్ ను వెరైటీగా నిర్వహిస్తున్నారు. సినిమా కంటెక్స్ట్ కు తగ్గట్లుగా ప్లాన్ చేసుకుని సందడి చేస్తున్నారు. ఫస్ట్ అప్డేట్ నుంచి అదే ప్లాన్ ను ఫాలో అవుతున్నారు. రీసెంట్ గా వెడ్డింగ్ రిసెప్షన్ పేరుతో ఈవెంట్ ను నిర్వహించి అందరి దృష్టిని ఆకర్షించారు.

అదే సమయంలో ఇప్పటివరకు మేకర్స్ రిలీజ్ చేసిన పోస్టర్స్, సాంగ్స్, గ్లింప్సెస్ అన్నీ మంచి రెస్పాన్స్ అందుకున్నాయి. ముఖ్యంగా ట్రైలర్.. సినిమాపై అంచనాలు పెంచేసింది. మూవీ పక్కగా క్లిక్ అవుతుందనే అంచనాలను ఏర్పరచింది. మరి మరో ఐదు రోజుల్లో ప్రేక్షకుల ముందుకు రాబోతున్న సినిమా ఎలాంటి హిట్ అవుతుందో వేచి చూడాలి.